Yoga Vasistha · Verses 6.114-2

caturdaśādhikaśatatamaḥ sargaḥ

śrīvasiṣṭha uvāca /
parasmādbrahmaṇaḥ pūrvaṃ manaḥ prathamamutthitam /
mananātmakamābhogi tatsthameva sthitiṃ gatam

puṣpakośa ivāmodo mahormiriva sāgare /
raśmijālamivāditye mano brahmaṇi rāghava

tasyādṛśyātmatattvasya vismṛtyaiva gataṃ sthitim /
nānyasmādāgataṃ rāma jagadrajjubhujaṅgavat

ādityavyatirekeṇa yo bhāvayati rāghava /
raśmijālamidaṃ hyetattasyānyadiva bhāsvataḥ

kanakavyatirekeṇa keyūraṃ yena bhāvitam /
keyūrameva tattasya na tasya kanakaṃ hi tat

ādityāvyatirekeṇa raśmayo yena bhāvitāḥ /
āditya eva te tasya nirvikalpaḥ sa ucyate

salilavyatirekeṇa taraṅgo yena bhāvitaḥ /
taraṅgabuddhirevaikā sthitā tasya na vāridhīḥ

salilāvyatirekeṇa taraṅgo yena bhāvyate /
ambusāmānyatābuddhirnirvikalpaḥ sa ucyate

kanakāvyatirekeṇa keyūraṃ yena bhāvyate /
kanakaikamahābuddhirnirvikalpaḥ sa ucyate

pāvakavyatirekeṇa jvālālī yena bhāvitā /
tasyāgnibuddhirgalati jvālādhīreva tiṣṭhati

jvālājālābhralekheva rañjitā sā tathā sthitiḥ /
tāmevāsthāṃ samādatte tadgatānyākulā matiḥ

pāvakāvyatirekeṇa jvālālī yena bhāvyate /
tasyāgnibuddhirekāsti nirvikalpaḥ sa ucyate

yo nirvikalpaḥ sumahānso'saṃkṣīṇamahāmatiḥ /
prāptavyaṃ tena saṃprāptaṃ nāsau vastuṣu majjati

nānātāmakhilāṃ tyaktvā śuddhacinmātrakoṭare /
saṃvedyena vinirmukte saṃvittattve sthito bhava

svayamevātmanaivātmā śaktiṃ saṃkalpanāmikām /
yadā karoti sphuratā spandaśaktimivānilaḥ

tadā pṛthagivābhāsaṃ saṃkalpakalanāmayam /
mano bhavati viśvātmā bhāvayansvākṛtiṃ svayam

tatsaṃkalpātmakaṃ ceto yathedamakhilaṃ jagat /
saṃkalpayati saṃkalpaistathaiva bhavati kṣaṇāt

kīṭatvamabjajatvaṃ ca merutvaṃ marutāṃ tathā /
mano jīvamahaṃkārabuddhicittādināmakam

saṃkalpato dvitaikatvametya ceto jagatsthitim /
tanoti tasyāṃ tadanu nānātāṃ gacchati svayam

saṃkalpamayamevedaṃ jagadābhogi dṛśyate /
na satyaṃ na ca mithyaiva svapnajālamivotthitam

jantoryathā manorājyaṃ vividhārambhabhāsuram /
brāhmaṃ tathedaṃ vitataṃ manorājyaṃ virājate

yathābhūtārthabhāvitvāttadetatpravilīyate /
paramārthena dṛṣṭaṃ cettadidaṃ naiva kiṃcana

dṛśyaṃ tvaparamārthena prayāti śataśākhatām /
jalamūrmitaraṅgādikalanārhaṃ parisphuran

yathāmbudhirvapurdhatte svabhāvena tathā citaḥ /
kurvankarmasahasrāṇi hyaṇucitspandanādṛte

nāpūrvaṃ kurute kiṃcitkiṃcidbhedamatastyajan /
gacchanśrṛṇvanspṛśanjighranvadanvyavaharansvapan

nāpūrvaṃ vidyate kiṃcitsatyamityeva bhāvayan /
yadyatkaroṣi tadviddhi cinmātramamalaṃ tatam

brahma prabṛṃhitākāraṃ tasmādanyanna vidyate /
padārthajāte sarvasminsaṃvitsāramaye sthite

saṃvidevedamakhilaṃ jagannānyāsti kalpanā /
saṃvitsphuraṇamātre'smiñjagajjālakanāmani

idamanyadidaṃ cānyaditi mithyāgrahaḥ kutaḥ /
saṃbhavādakhilākāreṣvekasyā eva saṃvidaḥ /
saṃvedyamapi nāstyeva bandhamokṣāvataḥ katham

mokṣo'yameṣa khalu bandha iti prasahya
cintāṃ nirasya sakalāṃ viphalābhimānām /
maunī vaśī vigatamānamado mahātmā
kurvansvakāryamanahaṃkṛtireva tiṣṭha

ityārṣe śrīvāsiṣṭhamahārāmāyaṇe vā० de० mokṣopāyeṣu nirvāṇaprakaraṇe pū० paramārthopadeśo nāma caturdaśādhikaśatatamaḥ sargaḥ