Yoga Vasistha · Chapter 6.114

caturdaśādhikaśatatamaḥ sargaḥ

śrīvasiṣṭha uvāca /
atha teṣāṃ tadā tatra tatastāṃstānadarśayan /
pārśvagā vanavṛkṣābdhiśailameghavanecarān

deva paśyāsya śailasya yeyamabhraṃkaṣāgrabhūḥ /
samarunmadhyadeśāderaśmadeśamupeyuṣaḥ

imā bakulapunnāganālikerakulākulāḥ /
vipināvalayo vāntavividhāmodamārutāḥ

lunātyupatyakāṃ vārdhiḥ śailaśāliśilāvalīḥ /
vanālīrlaharīdātrairāpādaphalapallavāḥ

adhityakāsu meghālīrnṛtyatāṃ svāmbubhūbhṛtām /
dhunoti jaladhirbālo gṛhadhūmāvalīmiva

rākābdhipūrasaṃprotaśaṅkhaśākhāstaṭadrumāḥ /
candrabimbaphalāḥ kalpavṛkṣā iva vibhāntyamī

ratnapuṣpabharāpūrṇaraktapallavapāṇayaḥ /
bhavantaṃ pūjayantīva latādārānvitā drumāḥ

protormimakaragrāsairdṛṣaddantairāguhāmukhaiḥ /
ṛkṣavānṛkṣavadbhūbhṛddhatte ghuraghurāravam

mahendro mandragarjābhirabhikṣipati garjataḥ /
parjanyānūrjito janyaḥ pratijanyānyathā jaḍaiḥ

candanārūṣitaḥ śrīmāñjetuṃ jaladhivellanāḥ /
samudyata ivocco'sau mallo malayaparvataḥ

sarvataḥ kacito'jasraṃ ratnavīcibhirambudhiḥ /
bhūratnavalayabhrāntyā prekṣyate sūryamārgagaiḥ

saranti ratnamūrdhānaścalakānilapāyinaḥ /
vānapūrāḥ parvatakāḥ sarpā iva natonnataiḥ

bhramanto vīciśrṛṅgeṣu makarebhāḥ karotkaṭaiḥ /
haranti sīkarāmbhodā meghānudrāvitā iva

āvartavalitākāraḥ sīkarotkarakīrṇadik /
pūrṇatvāttu śiro'śakto mriyate'tyutkaraḥ karī

vividhaprāṇisaṃpūrṇāḥ sajalādrinatonnatāḥ /
yathaivāmbhodhayaḥ sarvāstathaiva dvīpabhūmayaḥ

āvartānātmano'nanyānapyanyāniva bhāsvarān /
gṛhyamāṇānasadrūpāndṛśyamānānapi sphuṭān

taraṅgataralānantarjaḍānapyambudhiścalān /
dhatte brahmajagantīva sāntānapyantavarjitān

yānantarindravadbhānumaṇīndhatte'mbudhirbahūn /
manthāpahṛtasarvasvo devebhyaḥ parirakṣitān

dṛśyamānānmahātejastathā pātālato'pyalam /
pratibimbavibhaṃgyāntarasatyāniva gopitān

teṣāṃ madhyādekamekaṃ pratyahaṃ paścimārṇave /
nikṣepāya kṣipati yaṃ tena manye dinaṃ bhavet

nānādigdeśapayasāmabdhau sādhusamāgamaḥ /
yātrāyāmiva lokānāṃ mithaḥ kalakalānvitaḥ

jalecarāvarā nūnaṃ sāgarārṇavasaṃgame /
anyonyavellanādyuddhaṃ na kadācana śāmyati

tāmyattimitaraṅgāgranartanāvartavibhramam /
valayanvāyurāyāti vāntasīkaramauktikaiḥ

sarinmuktālatāmadhyamadhyasthābdamaṇīśvarāḥ /
dīrghāḥ khaṇakhaṇāyante cañcalāḥ sarvato'mbudheḥ

mahendrādrerguhāgehaparāvṛttārṇavādhvanām /
bhāṃkāriṇyo bhuvaḥ siddhasādhyānāṃ susukhāvahaḥ

mandaraḥ kandarodgīrṇaiḥ prasarairmātariśvanaḥ /
kampākulavanābhogaḥ puṣpameghāṃstanoti khe

cūtanīpakadambāḍhyagandhamādanakandarān /
viśanti meghahariṇāstaḍittaralalocanāḥ

himavatkandarodgīrṇā vallīvalayatāṇḍavam /
tanvānā vāyavo yānti vibhinnābdābdhivīcayaḥ

tāta cūtakadambāgraparāmarśasugandhayaḥ /
valayantyabdhikallolāngandhamādanavāyavaḥ

jaladānvalayanvāyuralakālakatāṃ gatān /
ita āyāti puṣpābhraṃ racayanvanavīthiṣu

kundamandārasaṃdohamadhurāmodamantharān /
tuṣārasīkaronmiśrānivātra kalayānilān

nālikeralatālāsyalabdhatiktasugandhayaḥ /
patanti pavanāḥ paśya pārasīkapurīḥ purā

dhunvānāḥ puṣpiteśānavanakarpūravāridān/
cālayanto'nilā vānti kailāsakamalākarān

karīndrakumbhaniṣkrāntamadamantharamūrtayaḥ /
ime śukaśukāyante vindhyakandaravāyavaḥ

śabarīṇāṃ śarīreṣu śīrṇaparṇotkare girau /
nārācaiḥ parṇaśabarairvanālī nagarāyate

abdhyadrisaridambhodavanalekhāṅgikā diśaḥ /
tvatpratāpabalairetā hasantīvārkaraśmibhiḥ

atropaśailavanavīthiṣu puṣpaśayyā
vidyādharīviracitāḥ parivarṇayanti /
pārśvadvayasthaparivṛttapadātsamudrā-
dvyāvṛttamugdhavanitāpuruṣāyitāni

ityārṣe śrīvāsiṣṭhamahārāmāyaṇe vā० de० mo० nirvā० u० avi० vipa० digdarśanaṃ nāma caturdaśādhikaśatatamaḥ sargaḥ