Yoga Vasistha · Chapter 6.112

dvādaśādhikaśatatamaḥ sargaḥ

śrīvasiṣṭha uvāca /
lokahārāmbaravyālaṃ cedicandanakānanam /
chinnaṃ paraśudhārābhiḥ patitaṃ dakṣiṇārṇave

parṇavatprohya pūreṇa pārasīkāḥ parasparam /
praharanto vimohena vinaṣṭā vaṃjulāvane

dardurādrau duranteṣu daradīrṇahṛdantarāḥ /
darīrandhreṣu saṃlīnā daradā dānavā iva

caturāyudhadhārāgracūrṇanīhāradhāriṇaḥ /
vidyudvalayino vātā vellitāyudhavāridāḥ

dantino'nyonyamābhagnadantadehaughapīḍitāḥ /
mṛtyūdarombhakagrāsapiṇḍapiṇḍā ivābhavan

tajjā raivatikā rātrau raudratomaratāḍitāḥ /
rūpikābhiḥ piśācībhirbhuktā bhāgīkṛtāṅgakāḥ

tālītamālagahane daśārṇā jīrṇajaṅgale /
gale pādaṃ nidhāyāntaḥ kṛttāḥ siṃhairgatāsavaḥ

paścimārṇavatīrasthā nālikeradharāvanau /
yavanā vigataprāṇā nigīrṇā makarotkaraiḥ

nārācanikaraṃ nīlaṃ nimeṣaṃ nāsahañchakāḥ /
ramaṭhā nalinīṣaṇḍā iva tāṇḍavitāsavaḥ

śravaṇābhogaśṛṅgāgro mahendro'drirdivi vrajaiḥ /
vidrutairvalito nīlairjālairjalamucāmiva

cāmīkaravarākārā bhagnā taṅgaṇavāhinī /
mṛtā hṛtāmbarā corairbhuktaikānte niśācaraiḥ

dyaurivarkṣabharairāsīttadāsāraṃ bhuvastalam /
vivartamānairabhitaḥ kacadbhirjvalanāyudhaiḥ

dhārādharadharārandhrapratiśruddhanaghuṃghumā /
jagadgehaguhāsīddyaurghanaṃ gātumivodyatā

dvipāntarajanāścakrairjarjarā jīvitaṃ jahuḥ /
mīnajaṅgalajambāle jīrṇamatsyā ivājale

yāvaddvīpā jitāḥ kukṣau sahyādrau samamūrtayaḥ /
āśvasya divasānsapta yayurāyāsamantharam

gandhamādanapunnāgavanakuñjeṣu puñjitāḥ /
vidyādharakumārībhirgāndhārāḥ parirakṣitāḥ

hūṇacīnakirātānāṃ muktaistaiścakravarṣaṇaiḥ /
kamalānīva lūnāni śirāṃsyabhimukhānilaiḥ

nilīpā nalinīnāle kaṇṭakā iva niścalāḥ /
drume drume drumamayā bhayāttvasyāvasaṃściram

cārusāraṅgaraṅgāsu śailakānanabhūmiṣu /
caturdikkaṃ tadāpātaiḥ saṃpannaṃ kṣobhaṇaṃ ghanam

kaṇṭakasthalanāmānaḥ kaṇṭakasthalakarkaśāḥ /
kaṇṭakasthalagā āsankaṇṭakasthalamaṇḍale

pārasīkāḥ paraṃ pūraiḥ pāraṃ prāpya payonidheḥ /
nipetuḥ pavanaiḥ pūtāḥ pralaye tārakā iva

vavurambhodhikuṭṭākā dṛṣadāṃ kaṭakāṅkitāḥ /
sarvadigvanaluṇṭākā vātāḥ pralayaśaṅkitāḥ

āsārasārāḥ paṅkāmbuplutāḥ saghanaghuṃghumāḥ /
āsandaśadiśo'dṛśyā bahukṣubdhāyudhānilaiḥ

nirhrādakāribhirvātairvahacchapachapāravam /
prasasrurbhuvi nīhārā mahārṇavarayā iva

vidūrasthā rathebhyaśca vīcicītkārakāriṇaḥ /
sarombhasyanilaiḥ petuḥ padmebhya iva ṣaṭpadāḥ

āyudhaughe'pi cakraughātpādātaṃ valamāvilam /
rajorāśirivāsāre na samarthaṃ palāyane

hūṇā āmastakaṃ magnā uttarārṇavasaikate /
klinnāstatraiva paṅkāntaḥ pūraṇāvilaśūlavat

tīrailāvanalekhāsu śakāḥ pūrvapayonidheḥ /
nītā baddhvā dinaṃ muktā na gatā yamasādanam

mandaṃ mandrā mahendrādrau krandantaḥ patitā divaḥ /
āśvāsitā munivarairnijāśramamṛgā iva

praviṣṭā yācanaṃ sahye labdhāḥ suravilāddvayam /
anarthenā'rtha āyāti kākatālīyataḥ kvacit

patitā dardurāraṇye daśārṇā jīrṇaparṇavat /
bhuktvā viṣaphalānyajñā mṛtāstatraiva te svayam

viśalyakaraṇīṃ bhuktvā kākatālīyayogataḥ /
himādrau haihayā yātā gṛhaṃ vidyādharā iva

pṛṣṭhanṛmlānakusumā dhanurbhirgṛhamāgatāḥ /
vaṅgā nādyāpi dṛśyante piśācatvamivāgatāḥ

aṅgā vanaphalairbhuktairvidyādharapadapradaiḥ /
vidyādharībhiḥ krīḍanti divi vidyādharāḥ sthitāḥ

tālītamālakhaṇḍeṣu patitāḥ pātitāṅgakāḥ /
pārasīkā gatā mohaṃ bhramādvaimānikā iva

taralāsāramātaṅgaṃ patitaṃ taṅgaṇāṅgaṇe /
aṅgairaṃga kaliṅgānāṃ caturaṅgaṃ valaṃ hatam

kramatyaribale sālvāḥ śaraśailodakodare /
patitāḥ prabhuṇā sārdhamadyāpyevopalāḥ sthitāḥ

asaṃkhyāḥ prapalāyantaḥ kakubhaṃ kakubhaṃ prati /
narāḥ sarattaraṅgeṣu sāgareṣu layaṃ gatāḥ

kṣetrāṭavīpurajalasthalaśailakūla-
kulyāgrahārasaridabdhibhṛgudrumeṣu /
grāmārapaṭṭigirikūpaguhāgṛheṣu
bhraṣṭāni kaḥkalayituṃ kubalāni śaktaḥ

ityārṣe śrīvāsiṣṭhamahārāmāyaṇe vālmīkīye de० mo० ni० u० avi० vi० balaparibhraṃśo nāma dvādaśādhikaśatatamaḥ sargaḥ