Scripture Library

Yoga Vasistha · Chapter 6.111

6.111.111

ekādaśādhikaśatatamaḥ sargaḥ

6.111.1

śrīvasiṣṭha uvāca /
iti kalpāntasadṛśe yatte samarasaṃbhrame /
patantīṣūtpatantīṣu senāsu samarejire

6.111.2

tūryabherīmahāśaṅkhakhaṅgeṣu khe nadatsu ca /
dhanurdhvaniṣu vīrāṇāṃ tārakreṃkārakāriṣu

6.111.3

anyonyakaṭhināsphoṭavikaṭe bhaṭapeṭake /
kavatkaṭakaṭāṭope kaṭukuṭṭitakaṅkaṭe

6.111.4

kiṃcitprabhajyamānāsu viśatkaśmāsu saṃgare /
vipaścitpakṣasenāsu lūyamānalatāsviva

6.111.5

udabhūtpūrayannāśā nṛpaniryāṇadundubhiḥ /
caturdhāśanisaṃpūrṇakalpābhraravamāṃsalaḥ

6.111.6

sphuṭatāṃ kulaśailānāṃ tulyakālamivotkaṭaḥ /
sphuṭaccaṭacaṭāsphoṭairjaḍitākhiladiktaṭaḥ

6.111.7

lokapālairivākārairnārāyaṇabhujairiva /
sa caturbhiścaturdikkaṃ nirjagāma mahīpatiḥ

6.111.8

caturaṅgeṇa mahatā sainyena parivāritaḥ /
aṭṭālavalayātkṛcchrānnirgatya nagarādbahiḥ

6.111.9

dadarśātmabalaṃ riktaṃ balavadripumaṇḍalam /
garjantaṃ ca layākṛtyā bhīmaṃ yuddhoddhatārṇavam

6.111.10

śarasīkaranīrandhraṃ makaravyūhasaṃkulam /
vāraṇavyūhavalitaṃ taraṅgavyūhavistṛtam

6.111.11

cakrāvartavahadvyūhakallolakalitāntaram /
caladrathaśatāvartaṃ patākālaharīgaṇam

6.111.12

prasphuracchatraphenāḍhyaṃ hayaheṣitaphītkṛtam /
samullasaddhetijalaṃ kacaddhārākaraṃ param

6.111.13

tarattaralamātaṅgaturaṅgaughataraṅgakam /
hetyambhasi kacatpāpamudyadgulugulodaram

6.111.14

darīdalanasaṃkṣubdhamarujjanitaghuṃghumam /
natonnatakṛtādrīndramahāspandaśarīrakam

6.111.15

majjanmātaṅgaturagahelāhatamahīdharam /
apāravicaratpūrakallolālamahājalam

6.111.16

akālakalpāntadaśāsamutthānaghanākṛtim /
ākrāntarodasīrandhrarudhiraikamahārṇavam

6.111.17

kacadāyudhakhaṇḍaughaḍīnaratnāvṛtodaram /
caladvyūhacalaṭyastayantrāśmakṣepaṇāśmakam

6.111.18

ratnasīkaranīhārasaṃdhyābhrapaṭalānatam /
kvacitpāṃsupayovāhapītahetipayodharam

6.111.19

tamālokya raṇāmbhodhimagastyo'sya bhavāmyaham /
iti saṃcintya manasā sa pātuṃ taṃ raṇārṇavam

6.111.20

astraṃ sasmāra vāyavyaṃ caturdikkaṃ ca saṃdadhe /
dhanuṣi śikharādhāre tripurānta ivodyataḥ

6.111.21

ātmīyadeśasainyānāṃ śreyorthaṃ śāntaye'nalam /
namaskṛtyātha japtvāśu sa tattatyāja dāruṇam

6.111.22

yathā tathaiva tatyāja tasya sāhāyakāya saḥ /
parjanyāstraṃ mahāstraiśaṃ dviṣadātapaśāntaye

6.111.23

tasmādastrajuṣo ghorāddhanuṣaḥ parinirgatāḥ /
aṣṭamūrteścaturdikkamāśākuharapūrakāḥ

6.111.24

niryayurbāṇasaritastriśūlasaritastathā /
śaktīnāmugrasarito bhuśuṇḍīsaritastathā

6.111.25

mudgarāṇāṃ ca saritaḥ prāsānāṃ sarito rayāt /
cakrāṇāṃ caiva saritaḥ paraśvadhanadīrayāḥ

6.111.26

tomarāṇāṃ ca sarito bhindipālamahāpagāḥ /
pāṣāṇānāṃ ca sarito vātāḥ kalpāntaśaṃsinaḥ

6.111.27

aśanīnāṃ ca sarito vidyutāṃ saritastathā /
jaladhārāsaritpūrāḥ khaṅgavarṣasamanvitāḥ

6.111.28

sanārācā mahāvarṣaharṣalotpātapīvarāḥ /
nāgāśca yugaparyantasphuṭitādrīndrajā iva

6.111.29

tenāstravarṣavegena dhutaḥ so'ribalārṇavaḥ /
jhaṭityeva na kālena pāṃsurāśirivābhitaḥ

6.111.30

salilāśaniśastrāṇāmāsāraiścaṇḍamārutaiḥ /
sarāṃsīva visetūni sainyāni paridudruvuḥ

6.111.31

caturaṅgaścaturdikkaṃ balaughaḥ sa parāṅmukhaḥ /
yayau prāvṛṅgiriṇadīmahāvāha iva drutaḥ

6.111.32

vahatsvinnabṛhacchinnapatākāketupādapaḥ /
marīcipuṣpaśabalavilolāsilatāvanaḥ

6.111.33

viluṭhatpuṣṭapāṣāṇapṛṣadraktadravāvacaḥ /
ghorairghuraghurārāvairalaṃ hṛdayabhaṅgadaḥ

6.111.34

uhyamānavṛhaddantidantadrumavighaṭṭanaiḥ /
sphūrjaccaṭacaṭārāvatarjitodgarjitāmbudaḥ

6.111.35

hetivṛttograsaṃghaṭṭapuṣpajātajhaṇajjhaṇaḥ /
tarattaralasārāvaturaṅgamataraṅgakaḥ

6.111.36

rathādibhaṭacakraughaśilākreṃkārapīvaraḥ /
padātirathahastyaśvaśilāsaṃghaṭṭasaṃkaṭaḥ

6.111.37

kaṭucaṃkāracītkārakreṃkāraparipīvaraḥ /
mṛtā mṛtā vayamiti ghanakolāhalākulaḥ

6.111.38

senāvārimahāvartacaladgulugulāravaḥ /
raktasīkaranīhārasaṃdhyāmbudavitānakaḥ

6.111.39

hetivīcivaṭācchinnavārivāmanavāridaḥ /
varṣapaṅkilabhūpīṭhataṭakhaṇḍanamaṇḍitaḥ

6.111.40

kuntaśūlagadāprāsavahattālatalādbhutaḥ /
sākrandabhīrujanatāpratapanmṛgapotakaḥ

6.111.41

mṛtahastyaśvayodhaughajīrṇaparṇanirantaraḥ /
piṣṭadehavasāmāṃsapaṅkasaṃjātakardamaḥ

6.111.42

cūrṇīkṛtakhurāpiṣṭamahāsthighanasaikataḥ /
uhyamānaśilāpūrakāṣṭhakoṭikaṭaṅkaṭaḥ

6.111.43

udgarjatpralayāmbhodairvahatpralayavāyubhiḥ /
prapatatpralayāsāraiḥ pralayāśanisaṃkaṭaiḥ

6.111.44

paṅkilākhilabhūpīṭhaiḥ salilopaplutasthalaiḥ /
sitaśaityavaśāśyānadhārākṛtakhapañjaraiḥ

6.111.45

samagranagaragrāmagṛhajvalitavahnibhiḥ /
prajāśvebhapadātīnāmākrandenāpi ghargharaiḥ

6.111.46

rathāmbhodharanirhrādairdivi bhūmau ghanāravaiḥ /
caturdikkaṃ ghanaṃ tārakreṃkārasya catuṣṭayaiḥ

6.111.47

vidyudvalayavistārakārisaṃghaṭṭagharṣaṇaiḥ /
śaraśaktigadāprāsabhindipālādivarṣaṇaiḥ

6.111.48

sarvadikkamasaṃkhyāni balāni balaśālinām /
bhūbhṛtāṃ vidravantyāśu vineśurmaśakaughavat

6.111.49

uddāmapāvakavanopamahetisārtha-
meghānalākulajanāśanivarṣapātaiḥ /
āsanbalāni capalābdhijalābalāni
paryākulāni vaḍavāgnimivāviśanti

6.111.111

ityārṣe śrīvāsiṣṭhamahārāmāyaṇe vālmī० de० mo० nirvā० u० vi० caturdiggatabaladravaṇaṃ nāmaikādaśādhikaśatatamaḥ sargaḥ

Original text: yogavāsiṣṭhaḥ · Sanskrit Wikisource contributors · Sanskrit Wikisource · CC BY-SA 4.0