Yoga Vasistha · Chapter 6.11

ekādaśaḥ sargaḥ

bhuśuṇḍa uvāca /
śastrāṇi dayitāṅgāni lagnānyaṅge nirambare /
yo buddhyamānaḥ susamaḥ sa parasminpade sthitaḥ

tāvatpuruṣayatnena dhairyeṇābhyāsamāharet /
yāvatsuṣuptatodeti padārthodayanaṃ prati

yathā bhūtārthatattvajñamādhayo'gragatā api /
na manāgapi limpanti payāṃsīva saroruham

śastrāṅganānabhāṃsyaṅgalagnānyalamasaṃvidam /
alagnānīva śāntātmā yaḥ paśyati sa paśyati

viṣaṃ yathā svāntareva durghuṇī bhavati svayam /
na ca durghuṇatā nāma viṣādanyāsti kācana

svarūpamajahattvevaṃ jīvatāmadhitiṣṭhati /
tathātmā tatparijñānamātraikapravilāpinīm

jīvo bhavati durghūṇo'mṛtyātmaiva yathā tathā /
atyajantī nija rūpaṃ cijjaḍaṃ rūpamṛcchati

brahmaṇyananyo'pyanyābho durghuṇaḥ kvacidutthitaḥ /
tatsthaḥ sa evāsa ivāpyatatstha iva sargakaḥ

viṣaṃ viṣatvamajahadyathā svāntaḥ kṛmiḥ kramāt /
na jāyate na mriyate mriyate'pi ca jāyate

svenaiva saṃvidarthena padārthāmagnarūpiṇā /
tīryate goṣpadamiva na tu daivādbhavārṇavaḥ

sarvabhāvāntarāvasthā sarvabhāvātiśāyinī /
antaḥśītalatā yasmiṃstasminkimiva helanam

jagatpadārthasattāntaḥ sāmānyenāśu bhāvite /
manohaṃkārabuddhyādi kaḥ kalaṅko'malātmani

yathā ghaṭapaṭādyarthānpaśyasyevaṃ śarīrakam /
tathāhantvamanobuddhivedanādyapi paśya he

jagatpadārthasārthaughamanobuddhyādi saṃsthitam /
jña evāsaṃvidaṃstiṣṭha pariniṣṭhitaniṣṭhayā

na kenacitkasyacideva kaściddoṣo na caiveha guṇaḥ kadācit /
sukhena duḥkhena bhavābhavena na cāsti bhoktā na ca kartṛtā ca

ityārṣe śrīvāsiṣṭhamahārāmāyaṇe vā० de० mokṣo० nirvāṇaprakaraṇe uttarārdhe vidyādharo० yathābhūtārthavedanaṃ nāmaikādaśaḥ sargaḥ