Yoga Vasistha · Chapter 6.104

caturadhikaśatatamaḥ sargaḥ

śrīvasiṣṭha uvāca /
ākāśaḥ śabdatanmātraṃ sparśatanmātrako'nilaḥ /
tatsaṅgotkarṣajaṃ tejastacchāntiścetyapāṃ sthitiḥ

bhūreṣāṃ saṅghaḥ svapnābhe jagadbhāne kramastviti /
kathaṃ nāma kilāmūrtādvyomno mūrtiḥ pravartate

gatvā sudūramapyetajjñapteścetparikalpyate /
tadādāveva satyarthe doṣo'sminka ivāmale

jñaptirevātivimalā svarūpātmani bhāti yat /
tadeva jagadityuktaṃ satyamityeva satyataḥ

na kvacitsanti bhūtāni pañca kuṭyādayo na vā /
asantyapyanubhūtāni nanu svapnadaśāsviva

svabhāva eva vimalo yathā svapne purādivat /
kacatyevaṃ jāgratīdaṃ jagadvadvastutastu kham

cetanākāśa evāhaṃ tadevedaṃ jagatsthitam /
ityahaṃ jagadityekaṃ khamevaikaṃ śilāghanam

yadādisargajananaṃ yatkalpāntavivartanam /
yadvā bhuvanasaṃsthānaṃ taddhi vyoma nirākṛti

sati vā'sati vā dehe
nirduḥkhasukhatvamakṣayaṃ mokṣaḥ /
buddhe'male svabhāve
nirbharaviśrāntirastu sarveha

ityārṣe śrīvāsiṣṭhamahārāmāyaṇe vālmī० de० mo० nirvāṇaprakaraṇe u० jagadasattāpratipādanaṃ nāma caturadhikaśatatamaḥ sargaḥ