યોગવાસિષ્ઠ · અધ્યાય 6.104

ચતુરધિકશતતમઃ સર્ગઃ

શ્રીવસિષ્ઠ ઉવાચ ।
આકાશઃ શબ્દતન્માત્રં સ્પર્શતન્માત્રકોઽનિલઃ ।
તત્સઙ્ગોત્કર્ષજં તેજસ્તચ્છાન્તિશ્ચેત્યપાં સ્થિતિઃ

ભૂરેષાં સઙ્ઘઃ સ્વપ્નાભે જગદ્ભાને ક્રમસ્ત્વિતિ ।
કથં નામ કિલામૂર્તાદ્વ્યોમ્નો મૂર્તિઃ પ્રવર્તતે

ગત્વા સુદૂરમપ્યેતજ્જ્ઞપ્તેશ્ચેત્પરિકલ્પ્યતે ।
તદાદાવેવ સત્યર્થે દોષોઽસ્મિન્ક ઇવામલે

જ્ઞપ્તિરેવાતિવિમલા સ્વરૂપાત્મનિ ભાતિ યત્ ।
તદેવ જગદિત્યુક્તં સત્યમિત્યેવ સત્યતઃ

ન ક્વચિત્સન્તિ ભૂતાનિ પઞ્ચ કુટ્યાદયો ન વા ।
અસન્ત્યપ્યનુભૂતાનિ નનુ સ્વપ્નદશાસ્વિવ

સ્વભાવ એવ વિમલો યથા સ્વપ્ને પુરાદિવત્ ।
કચત્યેવં જાગ્રતીદં જગદ્વદ્વસ્તુતસ્તુ ખમ્

ચેતનાકાશ એવાહં તદેવેદં જગત્સ્થિતમ્ ।
ઇત્યહં જગદિત્યેકં ખમેવૈકં શિલાઘનમ્

યદાદિસર્ગજનનં યત્કલ્પાન્તવિવર્તનમ્ ।
યદ્વા ભુવનસંસ્થાનં તદ્ધિ વ્યોમ નિરાકૃતિ

સતિ વાઽસતિ વા દેહે
નિર્દુઃખસુખત્વમક્ષયં મોક્ષઃ ।
બુદ્ધેઽમલે સ્વભાવે
નિર્ભરવિશ્રાન્તિરસ્તુ સર્વેહ

ઇત્યાર્ષે શ્રીવાસિષ્ઠમહારામાયણે વાલ્મી૦ દે૦ મો૦ નિર્વાણપ્રકરણે ઉ૦ જગદસત્તાપ્રતિપાદનં નામ ચતુરધિકશતતમઃ સર્ગઃ