Yoga Vasistha · Chapter 6.10

daśamaḥ sargaḥ

bhuśuṇḍa uvāca /
viddhi tvaṃ cetanādeva cetanetaracetanam /
jale'gniriva cijjāḍye nāto bhinne manāgapi

tadvedanāvedanayorabhedātsvasthamāsyatām /
niryantrameva citrasthajñaptivadvyomamadhyavat

brahmaṇyaśeṣaśaktitvādacittvaṃ vidyate tathā /
akṣubdhe vimale toye bhāviphenalavo yathā

na kāraṇaṃ vinodeti jalātphenalavo yathā /
na kāraṇaṃ vinodeti sargādi brahmaṇastathā

na ca kāraṇamastyatra sargavṛttāvakāraṇe /
nātaḥ saṃjāyate kiṃcijjagadādirna naśyati

atyantaṃ kāraṇābhāvānna kiṃcijjāyate jagat /
marāvambviva nāstyeva dṛṣṭamapyagrato jagat

brahmānantamajaṃ śāntamato'stīdaṃ na sargadhīḥ /
kāraṇābhāvatastena brahmaivedamakhaṇḍitam

ataḥ śilodarābho'si vyomakośopamopi ca /
brahmaikaghanarūpatvādajo'navayavo'si ca

jño'si kiṃcinna kiṃcidvā niḥśaṅkamalamāsyatām /
acetanācidābhāse śāmyatāmātmanātmani

nityānandatayā'jasya kāraṇaṃ nāsti kāryakṛt /
sargādyasaṃbhave tasmādyadasti tadajaṃ śivam

ajo yeṣāṃ tu cidrūpo nāsti maurkhyavilāsinām /
sarganāśe samutpanne kiṃ teṣāṃ pra vicāryate

yatra yatra paraṃ brahma tatra santi jaganti hi /
jagacchabdārtharūpeṇa muktānyevaṃvidhāni ca

tṛṇe kāṣṭhe jale kuḍye sarvatraiva paraṃ sthitam /
sarvatraiva ca sargaughaḥ pariprotaḥ sthito mithaḥ

brahmaṇaḥ kaḥ svabhāvo'sāviti vaktuṃ na yujyate /
anante parame tattve svatvāsvatvātyasaṃbhavāt

abhāvasavyapekṣasya bhāvasyāsaṃbhavādapi /
padaṃ badhnanti nānante svabhāvādyā duruktayaḥ

asvatvābhāvayornitye'nante'tyantamasaṃbhavāt /
svatvabhāveṣu siddheṣu svabhāvoktirna tiṣṭhati

nāhantvaṃ labhyate sādho buddhyāloke nirīkṣitam /
asadeva kuto'pyetadbālayakṣa ivoditam

muktaṃ tvahantvaśabdārthairlabhyate yacca tatparam /
yuktaṃ tvahantvaśabdārthaiḥ prekṣyamāṇaṃ vilīyate

bhedo jagadbrahmadṛśorabhedaḥ paryāyaśabdārthavilāsatulyaḥ /
saṃkalpamātraṃ kathito na satyo yathānayorvai kaṭakatvahemnoḥ

ityārṣe śrīvāsiṣṭhamahārāmāyaṇe vā० de० mo० nirvāṇaprakaraṇe u० vi० svargāpavargapratipattiyogopadeśo nāma daśamaḥ sargaḥ