Yoga Vasistha · Chapter 5.88

aṣṭāśītitamaḥ sargaḥ

śrīvasiṣṭha uvāca /
prāpya saṃsṛtisīmāntaṃ duḥkhābdheḥ pāramāgataḥ /
vītahavyaḥ śaśāmaivamapunarmanane muniḥ

tasmiṃstathopaśānte hi parāṃ nirvṛtimāgate /
payaḥkaṇa ivāmbhodhau sve pade pariṇāmini

tathaiva tiṣṭhanniḥspandaḥ sa kāyo mlānimāyayau /
antarvirasatāṃ prāpya mārgaśīrṣāntapadmavat

tasya dehadrumāntaḥsthaṃ tyaktvā hṛnnīḍamāyayuḥ /
proḍḍīya vihagāyanto yuntronmuktā ivāsavaḥ

bhūteṣveva pratiṣṭhāni bhūtāni sakalānyalam /
māṃsāsthiyantradehastu vanāvanitale'vasat

cidarṇavapratiṣṭhā ciddhātavo dhātuṣu sthitāḥ /
sve svarūpe sthitaṃ sarvaṃ munāvupaśamaṃ gate

eṣā te kathitā rāma vicāraśataśālinī /
viśrāntirvītahavyasya prajñayaināṃ vivecaya

evaṃprakārayā cārvyā svavicāraṇayeddhayā /
tattvamālokya tatsāramātiṣṭhottiṣṭha rāghava

yadetadakhilaṃ rāma bhavate varṇitaṃ mayā /
yadidaṃ varṇayāmyadya varṇayiṣyāmi yacca vā

trikāladarśinā nityaṃ ciraṃ ca kila jīvatā /
vicāritaṃ ca dṛṣṭaṃ ca mayā tadakhilaṃ svayam

tadetāmamalāṃ dṛṣṭimavalambya mahāmate /
jñānamāsādaya paraṃ jñānānmuktirhi labhyate

jñānānnirduḥkhatāmeti jñānādajñānasaṃkṣayaḥ /
jñānādeva parā siddhirnānyasmādrāma vastutaḥ

jñānena sakalāmāśāṃ vinikṛtya samantataḥ /
śātitāśeṣacittādrirvītahavyo munīśvaraḥ

vītahavyātmikā saṃvitsaṃkalpajagatīti sā /
anubhūtavatī dṛśyamidameva ca tajjagat

vītahavyo manomātraṃ manohaṃtvamivaindriyaḥ /
mano jagadidaṃ kṛtsnamanyatānanyate tu ke

adhigataparamārthaḥ kṣīṇarāgādidoṣaḥ
sakalamalavikāropādhisaṅgādyapetaḥ /
ciramanusṛtamantaḥ svaṃ svabhāvaṃ vivekī
padamamalamanantaṃ prāptavānśāntaśokaḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe vītahavyaviśrāntirnāmāṣṭāśītitamaḥ sargaḥ