Yoga Vasistha · Chapter 5.87

saptāśītitamaḥ sargaḥ

śrīvasiṣṭha uvāca /
evaṃ kalitavānantaḥ praśāntamananaiṣaṇaḥ /
śanairuccārayaṃstāraṃ praṇavaṃ prāptabhūmikaḥ

mātrādipādabhedena praṇavaṃ saṃsmaranyatiḥ /
adhyāropāpavādena svarūpaṃ śuddhamavyayam

sabāhyābhyantarānbhāgānsthūlānsūkṣmatarānapi /
trailokyasaṃbhavāṃstyaktvā saṃkalpākalpakalpitān

tiṣṭhannakṣubhitākāraścintāmaṇirivātmani /
saṃpūrṇa iva śītāṃśurviśrānta iva mandaraḥ

kumbhakāragṛhe cakraṃ saṃrodhita iva bhramāt /
ambhodhiriva saṃpūrṇastimitasphāranirmalaḥ

śāntatejastamaḥpuñjaṃ vigatārkendutārakam /
adhūmābhrarajaḥsvacchamanantaṃ śaradīva kham

sahapraṇavaparyantadīrghaniḥsvanatantunā /
jahāvindriyatanmātrajālaṃ gandhamivānilaḥ

tato jahau tamomātraṃ pratibhātamivāmbare /
uttiṣṭhatprasphuradrūpaṃ prājñaḥ kopalavaṃ yathā

pratibhātaṃ tatastejo nimeṣārdhaṃ vicārya saḥ /
jahau babhūva ca tadā na tamo na prakāśakam

tāmavasthāmathāsādya manasā tanmanastṛṇam /
manāgapi prasphuritaṃ nimiṣārdhādaśātayat

tato'ṅga saṃvidaṃ svasthāṃ pratibhāsamupāgatām /
sadyo jātaśiśujñānasamānakalanāmalam

nimeṣārdhārdhabhāgena kālena kalanāṃ prabhuḥ /
jahau citaścetyadaśāṃ spandaśaktimivānilaḥ

paśyantīpadamāsādya sattāmātrātmake tataḥ /
prasuptapadamālambya tasthau giririvācalaḥ

tataḥ suṣuptasaṃsthānaṃ sthitvā sthitvā vibhurmanāk /
suṣupte sthairyamāsādya turyarūpamupāyayau

nirānando'pi sānandaḥ saccāsaccāpi tatra saḥ /
āsīnna kiṃcitkiṃcittatprakāśastimiraṃ yathā

acinmayaṃ cinmayaṃ ca neti neti yaducyate /
tatastatsaṃbabhūvāsau yadgirāmapyagocaraḥ

tadasau susamaṃ sphāraṃ padaṃ paramapāvanam /
sarvabhāvāntaragatamabhūtsarvavivarjitam

yacchūnyavādināṃ śūnyaṃ brahma brahmavidāṃ varam /
vijñānamātraṃ vijñānavidāṃ yadamalaṃ padam

puruṣaḥ sāṃkhyadṛṣṭīnāmīśvaro yogavādinām /
śivaḥ śaśikalāṅkānāṃ kālaḥ kālaikavādinām

ātmātmanastadviduṣāṃ nairātmyaṃ tādṛśātmanām /
madhyaṃ mādhyamikānāṃ ca sarvaṃ susamacetasām

yatsarvaśāstrasiddhānto yatsarvahṛdayānugam /
yatsarvaṃ sarvagaṃ sārvaṃ yattattatsadasau sthitaḥ

yadanuttamaniḥspandaṃ dīpyate tejasāmapi /
svānubhūtyaikamātraṃ yadyattattatsadasau sthitaḥ

yadekaṃ cāpyanekaṃ ca sāñjanaṃ ca nirañjanam /
yatsarvaṃ cāpyasarvaṃ ca yattattatsadasau sthitaḥ

ajamajaramanādyanekamekaṃ
padamamalaṃ sakalaṃ ca niṣkalaṃ ca /
sthita iti sa tadā nabhaḥsvarūpā-
dapi vimalasthitirīśvaraḥ kṣaṇena

ityārṣe śrīvāsiṣṭhamahārāmāyaṇe vā० de० mokṣopāyeṣūpaśamaprakaraṇe vītahavyanirvāṇo nāma saptāśītitamaḥ sargaḥ