Yoga Vasistha · Chapter 5.83

tryaśītitamaḥ sargaḥ

śrīvasiṣṭha uvāca /
bhūyo munivaro dhīro dhiyā dhavalamedhayā /
svamindriyagaṇaṃ gupto bodhayāmāsa sādhvidam

taccendriyagaṇasyārthe śrṛṇu vakṣyāmi te sphuṭam /
śrutvā tadbhāvanāmetya parāṃ nirduḥkhatāṃ vraja

bhavatāmātmasattaiṣā duḥkhāyaivāntadāyinī /
asatyāmātmanaḥ sattāṃ tadbhavantastyajantviti

madīyenopadeśena sattaiṣā bhavatāṃ kṣayam /
gataiveti sphuṭaṃ manye yūyaṃ hyajñānasaṃbhavāḥ

svasattā sphuṭatāṃ yāti duḥkhāya tava cittaka /
taptakāñcanarullāso dāhāyaiva svapārśvayoḥ

paśya tvayi sati bhrāntajalakallolasaṃkulāḥ /
viśanti kālajaladhiṃ saṃsārasaritāṃ gaṇāḥ

patantyahamahamikāvihitānyonyacintitāḥ /
kuto'pi duḥkhāvalayo dhārā āsāragā iva

parisphuratyaparyantā hṛdayonmūlanodyatā /
ākrandakāriṇī krūrā bhāvābhāvaviṣūcikā

kāsaśvāsaraṇadbhṛṅgā kalevarajaraddrume /
vikasatyamalodyotā jarāmaraṇamañjarī

kallolavyālavalite śarīraśvabhrakoṭare /
ghananīhārakhe svāntaścintācapalamarkaṭī

lobhanāṭyāraṭatpakṣī tīkṣṇayā dvandvatuṇḍayā /
kāyajīrṇadrumādasmādguṇakhaṇḍaṃ nikṛntati

hṛdayāvakaraṃ kīrṇamitaścetaśca karkaśaḥ /
apavitro durācāraḥ kurute kāmakukkuṭaḥ

mahatyāṃ mohayāminyāmulbaṇo'jñānakauśikaḥ /
śmaśāna iva vetālaḥ parivalgati hṛddrume

etāścānyāśca bahvyo'pi tvayīndriyagaṇe sati /
piśācya iva śarvaryāṃ pravalgantyaśubhaśriyaḥ

tvayi tvasati he sādho sarvā eva śubhaśriyaḥ /
prabhāta iva padminyaḥ sālokaṃ vilasantyalam

praśāntamohamihikaṃ rājate hṛdayāmbaram /
nirmalālokavalitaṃ nīrajaskatarāntaram

aśaṅkitanabhaḥkośapatitākulapūravat /
nāpatanti vikalpaughāściraṃ vaikalyakāriṇaḥ

sarvasyāhlādanī śāntā maitrī paramapāvanī /
abhyudeti hṛdo hṛdyā sutaroriva mañjarī

antaśchidravatī jāḍyayuktāyuktaguṇā svayam /
cintā śoṣamupāyāti himadagdheva padminī

ālokaḥ sphuṭatāmantarāyātyajñānasaṃkṣaye /
praśāmyatyambude vyomni śaradīvārkamaṇḍalam

prasannaṃ sphāragāmbhīryamakṣubdhamaparāhatam /
hṛdayaṃ samatāmeti śāntavāta ivārṇavaḥ

amṛtāpūrapūrṇena nityānandamayena ca /
sthīyate puruṣeṇāntaḥ śītena śaśinā yathā

saṃvidaḥ sphuṭatāmantarāyāntyajñānasaṃkṣaye /
saṃvidaṃśaikaviśrāntaṃ samagraṃ sacarācaram

bhāvyate bharitākāraṃ vapurānandamantharam /
na bhavatyasusaṅgānāmāśāpāśavidhāyinām

dagdhānāmiva parṇānāṃ rasānāṃ punarāgatiḥ / /
puṃsāṃ kṣapitasaṃsārajarājanmamahādhvanām

apunarbhramaṇāyātmadrume viśramyate ciram /
evaṃprāyāstathānyāśca bhavanti guṇasaṃpadaḥ

asati tvayi sarvāśinsarvāśākṣayasaṃkṣaye /
pakṣayoretayościttasattāsattāsvarūpayoḥ

yenaiva paśyasi śreyastamevāṅgīkuru kṣaṇam /
svātmabhāvastava sukhaṃ manye mānavatāṃ vara

tameva bhāvayābhāvaṃ sukhatyāgo hi mūḍhatā /
yadi tvasti bhavetsatyamantarbhāvitacetanam

jīvatastattavātyantamabhāvaṃ ka ivecchati /
kiṃtu nāstyasi satyena vadāmi tava sundara

tena mithyaiva jīvāmītyāśayā mā sukhī bhava /
pūrvamevāsi nāstyeva yāvadbhrāntyā tvadastitā

saivedānīṃ vicāreṇa bhṛśaṃ kṣayamupāgatā /
etāvadeva te rūpaṃ sādho yadavicāraṇam

vicāre vihite samyaksamarūpaṃ samaṃ sthitam /
avicārātprajātaṃ tvamanālokāttamo yathā

vicāreṇopaśāntaṃ tvamālokena tamo yathā /
etāvantaṃ sakhe kālaṃ babhūvālpavivekitā

tavānenābhipīnatvamabhūdduḥkhaikakāraṇam /
mohasaṃkalpamātreṇa bālavetālavadbhavet

dvandvaṃ cādyantasaṃkalpakṣīṇaṃ kṣayi bhava sthitam /
idānīmuditaṃ nityaṃ svaprāgrūpe kṣayaṃ gate

vivekasya prasādena vivekāya namo namaḥ /
bahudhāpi prabuddhastvaṃ cittakāpyanubodhitaḥ

cittatāyāṃ pranaṣṭāyāṃ sthitastvaṃ parameśvaraḥ /
prāksvarūpavilāsaste śreyase sthitimāgataḥ

samastavāsanonmuktaḥ saṃpratyasi maheśvaraḥ /
yasyāvivekādutpattiḥ sa vivekādvinaśyati

prakāśena prayātyantamanāloko'bhavattamaḥ /
anicchato'pi te sādho vicāre sthitimāgate

sarvato'yamupāyāto vināśaḥ sukhasiddhaye /
tasmānnāstyasi nirṇītamiti siddhāntayuktibhiḥ

cittendriyeśvara svasti bhavate tvantamāgataḥ /
nityaṃ pūrvamabhūtāya nāstirūpāya saṃprati

bhaviṣyate ca nodarkaṃ svamanaḥ svasti te'stviti /
parinirvāmiśānto'smi diṣṭyāsmi vigatajvaraḥ

svātmanyevāvatiṣṭhe'haṃ turyarūpapade sthitaḥ /
ato nāstyeva nāstyeva saṃsāre cittamasthiti

ātmā tvastveva cāstveva yasmādanyatra vidyate /
ayamātmāhamevāsau nāstyanyanmadṛte kvacit

sphuraccideva bodhātmā sarvatrāhaṃ sthitaḥ sadā /
ayamātmeti kalanā manye no nirmalāntare

pratiyogivyavacchedakalanaikasya vai kutaḥ /
ahaṃ tenāyamātmeti kalanāmanudāharan /
maunī svātmani tiṣṭhāmi taraṅga iva vāriṇi

saṃśāntavāsanamanāśritacetanāṃśa-
maprāṇasaṃcaraṇamastamitāṃśadoṣam /
saṃvedyavarjitamupetya susaṃvidaṃśaṃ
śāmyāmi maunamahameva nirīhamantaḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe cittāsattāvicārayogopadeśo nāma tryaśītitamaḥ sargaḥ