Yoga Vasistha · Chapter 5.76

ṣaṭsaptatitamaḥ sargaḥ

śrīvasiṣṭha uvāca /
brahmaṇaḥ samupāyānti jagantīmāni rāghava /
sthairyaṃ yāntyavivekena śāmyantyeva vivekataḥ

jagajjālajalāvartavṛttayo brahmavāridhau /
saṃkhyātuṃ kena śakyante bhāsāṃ ca trasareṇavaḥ

asamyakprekṣaṇaṃ viddhi kāraṇaṃ jagataḥ sthitau /
saṃsāraśāntaye kānta kāraṇaṃ samyagīkṣaṇam

ayaṃ hi paraduṣpāro ghoraḥ saṃsārasāgaraḥ /
vinā yuktiprayatnābhyāmasmādrāma na tīryate

yasyāyaṃ sāgaraḥ pūrṇo mohāmbubharapūritaḥ /
agādhamaraṇāvartakallolākulakoṭaraḥ

prabhramatpuṇyaḍiṇḍīro jvalannarakavāḍavaḥ /
tṛṣṇāvilolalaharirmanojalamataṅgajaḥ

ālīnajīvitasaridbhogaratnasamudgakaḥ /
kṣubdharogoragākīrṇa indriyagrāhaghargharaḥ

paśyāsminprasṛtā rāma vīcayaścārucañcalāḥ /
imā mugdhāṅganānāmnyaḥ śikharākarṣaṇakṣamāḥ

chadaśrīpadmarāgāḍhyā netranīlotpalākulāḥ /
dantapuṣpaphalākīrṇāḥ smitaphenopaśobhitāḥ

keśendranīlavalayā bhrūvilāsataraṅgitāḥ /
nitambapulinasphītāḥ kaṇṭhakambuvibhūṣitāḥ

lalāṭamaṇipaṭṭāḍhyā vilāsagrāhasaṃkulāḥ /
kaṭākṣalolagahanā varṇakāñcanavālukāḥ

evaṃ vilolalaharībhīmātsaṃsārasāgarāt /
uttīryate cenmagnena tatparaṃ pauruṣaṃ bhavet

satyāṃ prajñāmahānāvi viveke sati nāvike /
saṃsārasāgarādasmādyo na tīrṇo dhigastu tam

apārāvāramākramya prameyīkṛtya sarvataḥ /
saṃsārābdhiṃ gāhate yaḥ sa eva puruṣaḥ smṛtaḥ

vicāryāryaiḥ sahālokya dhiyā saṃsārasāgaram /
etasmiṃstadanu krīḍā śobhate rāma nānyathā

iha bhavyo bhavānsādho vicāraparayā dhiyā /
tvayādhunaiva tenāyaṃ saṃsāraḥ pravicāryate

bhavāniva vicāryādau saṃsāramatikāntayā /
matyā yo gāhate loko nehāsau parimajjati

pūrvaṃ dhiyā vicāryaite bhogā bhogibhayapradāḥ /
bhoktavyāścaramaṃ rāma garuḍeneva pannagāḥ

vicārya tattvamālokya sevyante yā vibhūtayaḥ /
tā udarkodayā jantoḥ śeṣā duḥkhāya kevalam

balaṃ buddhiśca tejaśca dṛṣṭatattvasya vardhate /
savasantasya vṛkṣasya saundaryādyā guṇā iva

ghanarasāyanapūrṇasuśītayā
vimalayā samayā satataṃ śriyā /
śiśiraraśmirivātivirājase
viditavedya sukhaṃ raghunandana

ityārṣe śrīvāsiṣṭhamahārāmāyaṇe vā० de० mokṣopāyeṣūpaśamaprakaraṇe saṃsārasāgarasāmyapratipādanaṃ nāma ṣaṭasaptatitamaḥ sargaḥ