Yoga Vasistha · Chapter 5.67

saptaṣaṣṭitamaḥ sargaḥ

śrīvasiṣṭha uvāca /
evaṃ tau kuśalapraśnaṃ kṛtavantau parasparam /
kālenāsādya vimalaṃ jñānaṃ mokṣaṃ tato gatau

tato vacmi mahābāho yathā jñānetarā gatiḥ /
nāsti saṃsārataraṇe pāśabandhasya cetasaḥ

idaṃ bhavyamaterduḥkhamanantamapi pelavam /
kukhagasyā'taro'mbhodhiḥ sarpārergoṣpadāyate

dehātītā mahātmānaścinmātrasvātmani sthitāḥ /
dūrāddehaṃ samīkṣante prekṣako janatāmiva

dehe duḥkhātisaṃkṣubdhe kā naḥ kṣatirupasthitā /
rathe vidhurite bhagne sāratheḥ keva khaṇḍanā

manasi kṣubdhatāṃ yāte cittvasyāṅga kimāgatam /
taraṅgajalasaṃtāne vaiparītyaṃ kimambudheḥ

ke'bhavanpayasāṃ haṃsāḥ payasāmupalāśca ke /
kāḥ śilāḥ kila dārūṇāṃ ke bhogāḥ paramātmanaḥ

saṃbandhaḥ ka iva śrīman śailāparasamudrayoḥ /
antare girisaṃbādhe kaśca cittattvabandhayoḥ

apyutsaṅgohyamānāni padmāni saridambhasām /
kāni nāma bhavantīha śarīrāṇi tathātmanaḥ

saṃghaṭṭātkāṣṭhapayasoryathottuṅgāḥ kaṇādayaḥ /
dehātmanoḥ samāyogāttathaitāścittavṛttayaḥ

saṃbandhāddārupayasāṃ pratibimbāni dāruṇaḥ /
yathā payasi lakṣyante śarīrāṇi tathātmani

yathā darpaṇavīcyādau pratibimbāni vastutaḥ /
nāsatyāni ca satyāni śarīrāṇi tathātmanaḥ

dāruvāryupalāsphoṭe duḥkhitā na yathā kvacit /
saṃyukteṣu viyukteṣu na tathā pañcasu kṣatiḥ

dārusaṃśleṣitāttoyātkampaśabdādayo yathā /
prajāyante tathaivāsmāddehāccitparibodhitāt

na śuddhajaḍayoretāḥ saṃvidaściccharīrayoḥ /
etā hyajñānamātrasya tasminnaṣṭe cideva naḥ

yathā na kasyacidvāridāruśleṣe'nubhūtayaḥ /
tathā na kasyaciddehadehisaṅge'nubhūtayaḥ

ajñasyāyaṃ yathā dṛṣṭaḥ saṃsāraḥ satyatāṃ gataḥ /
na jñasyāyaṃ yathābhūtaḥ saṃsāraḥ satyatāṃ gataḥ

antaḥsaṅgavihīnāstu yathā snehā dṛṣajjale /
tathāsaktamanovṛttau bāhyabhogānubhūtayaḥ

antaḥsaṅgena rahito yadvatsalilakāṣṭhayoḥ /
saṃbandhastadvadevāntarasaṅgo dehadehinoḥ

antaḥsaṅgena rahitaḥ saṃbandho jalakāṣṭhayoḥ /
sa dehadehinoścaivaṃ pratibimbāmbhasostathā

sthitā sarvatra saṃvittiḥ śuddhā saṃvedyavarjitā /
dvitvopalāñchitā tvanyā duḥsaṃvittirna vidyate

aduḥkhameti duḥkhitvamantaḥsaṃvedanā sphuṭam /
sphāro bhavati vetālo vetālatvena bhāvitaḥ

asaṃbandho'pi saṃbandho bhavatyantarviniścayāt /
svapnāṅganāsuratavatsthāṇuvetālasaṅgavat

asatprāyo hi saṃbandho yathā salilakāṣṭhayoḥ /
tathaiva mithyāsaṃbandhaḥ śarīraparamātmanoḥ

antaḥsaṅgaṃ vinā nāmbu kāṣṭhapātaiḥ pragṛhyate /
ātmā'ṅgasaṅgarahito dehaduḥkhairna dahyate

dehabhāvanayaivātmā dehaduḥkhavaśe sthitaḥ /
tattyāgena tato mukto bhavatīti vidurbudhāḥ

antaḥsaṅgavihīnatvādduḥkhavantyaṅga no yathā /
patrāmbumaladārūṇi śliṣṭānyapi parasparam

antaḥsaṅgena rahitā yānti nirduḥkhatāṃ parām /
śliṣṭānyapi tathaivātmadehendriyamanāṃsyalam

antaḥsaṅgo hi saṃsāre sarveṣāṃ rāma dehinām /
jarāmaraṇamohānāṃ tarūṇāṃ bījakāraṇam

antaḥsaṃsaṅgavāñjanturmagnaḥ saṃsārasāgare /
antaḥsaṃsaktimuktastu tīrṇaḥ saṃsārasāgarāt

antaḥsaṃsaṅgavaccittaṃ śataśākhamivocyate /
antaḥsaṃsaṅgarahitaṃ vilīnaṃ cittamucyate

bhagnasphaṭikavadviddhi manaḥ saktamapāvanam /
abhagnasphaṭikābhāsamasaktaṃ viddhi me manaḥ

asaktaṃ nirmalaṃ cittaṃ muktaṃ saṃsāryapi sphuṭam /
saktaṃ tu dīrghatapasā yuktamapyatibandhavat

antaḥsaktaṃ mano baddhaṃ muktaṃ saktivivarjitam /
antaḥsaṃsaktirevaikaṃ kāraṇaṃ bandhamokṣayoḥ

antaḥsaṃsaktimuktasya kurvato'pi na kartṛtā /
guṇadoṣavatī toye dāruvāhananauryathā

antaḥsaṃsaktito jantorakarturapi kartṛtā /
sukhaduḥkhavati svapne saṃbhramonmukhatā yathā

citte kartari kartṛtvamadehasyāpi vidyate /
svapnādāviva vikṣubdhasukhaduḥkhadṛśopamam

akartari manasyantarakartṛtvaṃ sphuṭaṃ bhavet /
śūnyacitto hi puruṣaḥ kurvannapi na cetati

cetasā kṛtamāpnoṣi cetasā na kṛtaṃ tu na /
na kvacitkāraṇe deho na ca cittena kartṛtā

asaṃsaktamakarteva kurvadeva mano viduḥ /
na karmaphalabhoktṛtvamasaktaṃ pratipadyate

brahmahatyāśvamedhābhyāmasaṃsakto na lipyate /
dūrasthakāntāsaṃlīnamanāḥ kāryairivāgragaiḥ

antaḥsaṃsaktinirmukto jīvo madhuravṛttimān /
bahiḥkurvannakurvanvā kartā bhoktā na hi kvacit

antaḥsaṃsaktimuktaṃ yanmanaḥ syāttadakartṛkam /
tadvimuktaṃ praśāntaṃ tattadyuktaṃ tadalepakam

tasmātsarvapadārthānāṃ śliṣṭānāṃ niścitaṃ bahiḥ /
sarvaduḥkhakarīṃ krūrāmantaḥsaktiṃ vivarjayet

virahitamalamantaḥsaṅgadoṣeṇa cetaḥ
śamamupagatamādyaṃ vyomavannirmalābham /
sakalamalavimuktenātmanaikatvameti
sthiramaṇinibhamambhovāriṇī vārinīle

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe antaḥsaṃsaṅgavicāro nāma saptaṣaṣṭitamaḥ sargaḥ