Yoga Vasistha · Chapter 5.68

śrīrāma uvāca /
kīdṛśo bhagavansaṅgaḥ kathaṃ bandhāya vā nṛṇām /
kaśca mokṣāya kathitaḥ kathaṃ vaiṣa cikitsyate

śrīvasiṣṭha uvāca /
dehadehivibhāgaikaparityāgena bhāvanāt /
dehamātre tu viśvāsaḥ saṅgo bandhārha ucyate

anantasyātmatattvasya saparyantatvaniścaye /
yatsukhārthitvamantaḥ sa saṅgo bandhārha ucyate

sarvamātmedamakhilaṃ kiṃ vāñchāmi tyajāmi kim /
ityasaṅgasthitiṃ viddhi jīvanmuktatanusthitim

nāhamasmi na cānyo'sti mā bhavantu bhavantu vā /
sukhānyasakta ityantaḥ kathyate muktibhāṅnaraḥ

nābhinandati naiṣkarmyaṃ na karmasvanuṣajjate /
susamo yaḥ phalatyāgī so'saṃsakta iti smṛtaḥ

ātmatattvaikaniṣṭhasya harṣāmarṣavaśaṃ manaḥ /
yasya nāyātyasakto'sau jīvanmuktaḥ sa kathyate

sarvakarmaphalādīnāṃ manasaiva na karmaṇā /
nipuṇaṃ yaḥ parityāgī so'saṃsakta iti smṛtaḥ

asaṃsaṅgena sakalāśceṣṭā nānā vijṛmbhitāḥ /
cikitsitā bhavantīha śreyaḥ saṃpādayanti ca

saṃsaktivaśataḥ sarve vitatā duḥkharāśayaḥ /
prayānti śataśākhatvaṃ śvabhrakaṇṭakavṛkṣavat

rajjukṛṣṭaghanaghrāṇo yadgatyā pathi gardabhaḥ /
bhāraṃ vahati bhītātmā tatsaṃsaktivijṛmbhitam

śītavātātapakleśamekadeśaniṣaṇṇayā /
tarurvahati yattanvā tatsaṃsaktivijṛmbhitam

dharāvivaranirmagno yatkīṭaḥ pīḍitāṅgakaḥ /
kṣiṇoti vikalaḥ kālaṃ tatsaṃsaktivijṛmbhitam

kṣutkṣāmakukṣiḥ kṣapayatyāyurvyāghātabhīrudhīḥ /
pakṣī vṛkṣaśikhāśāyī tatsaṃsaktivijṛmbhitam

dūrvāṅkuratṛṇāhāraḥ kirātaśarapīḍayā /
jahāti yanmṛgo dehaṃ tatsaṃsaktivijṛmbhitam

kṛmikīṭatvamāyānti jāyamānāḥ punaḥpunaḥ /
yadimā janatā jīrṇāstatsaṃsaktivijṛmbhitam

utpattyotpattya līyante taraṅgiṇi taraṅgavat /
bhūtāni yadanantāni tatsaṃsaktivijṛmbhitam

vīruttṛṇadaśāṃ yātā mriyante yatpunaḥpunaḥ /
narā vigatasaṃcārāstatsaṃsaktivijṛmbhitam

rasātalarasāyogāttṛṇagulmalatādayaḥ /
janayanti yadākāraṃ tatsaṃsaktivijṛmbhitam

svānarthāntarasaṃkāśapadārthaśatasaṃkulā /
yatsaṃsāranadī mattā tatsaṃsaktivijṛmbhitam

saṃsaktirdvividhā proktā vandyā vandhyā ca rāghava /
vandhyā sarvatra mūḍhānāṃ vandyā tattvavidāṃ nijā

ātmatattvāvabodhena hīnā dehādivastujā /
bhūyaḥ saṃsārasaktiryā dṛḍhā vandhyeti kathyate

ātmatattvāvabodhena satyabhūtavivekajā /
vandyā hi kathyate saktirbhūyaḥ saṃsāravarjitā

śaṅkhacakragadāhasto devo vividhayehayā /
vandyasaṃsaktivaśataḥ paripāti jagattrayam

anāratanirālambaṃ vyoma vartmani pānthatām /
vandyasaṃsaktivaśataḥ karoti raviranvaham

mahākalpasamādhānacirakalpitakalpanam /
vandyasaṃsaktivaśato brāhmaṃ sphurati vai vapuḥ

līlayā lalanālānalīnaṃ bhūtivibhūṣitam /
vandyasaṃsaktivaśataḥ śarīraṃ śāṅkaraṃ sthitam

vijñānagatayaḥ siddhā lokapālāstathetare /
vandyasaṃsaktivaśatastiṣṭhanti jagato'ṅgaṇe

dhatte śārīrayantraughamanyā bhuvanasaṃtatiḥ /
vandyasaṃsaktivaśato jarāmṛtivivarjitam

manaḥ patati bhogeṣu gṛdhro māṃsalaveṣviva /
vandyasaṃsaktivaśato vyarthayā ramyaśaṅkayā

saṃsaktivaśato vāti vāyurbhuvanakoṭare /
pañcabhūtāni tiṣṭhanti vahatīyaṃ jagatsthitiḥ

divi devā bhuvi narāḥ pātāle bhogino'surāḥ /
brahmāṇḍodumbaraphale sphuranmaśakavatsthitāḥ

jāyante ca mriyante ca nipatantyutpatanti ca /
bhūtāni yadanantāni taraṅgiṇi taraṅgavat

utpattyotpattya līyante tatsaṃsaktivijṛmbhitam /
bhūtāni virasaṃ bhūyo nirjharāmbukaṇā iva

parasparanigīrṇāṅgā janatā jāḍyajarjarā /
saṃbhrāntā prabhramatyaṅga śīrṇaparṇamivāmvare

nakṣatracakraṃ gagane drume maśakasaṃtatiḥ /
sphuratyāvartavṛttyaiva pātāle'ṅga jalaughavat

pātotpātadaśājīrṇaṃ kālabālakakandukam /
adyāpi na jahātīndurjalamāmalinaṃ vapuḥ

nānāpārayugāvartaduḥkhālokanakarkaśam /
na lunāti manaḥkhaṇḍaṃ duḥkhigīrvāṇamaṇḍalam

vāsanāmātravaśataḥ pare vyomani kenacit /
idamāracitaṃ citraṃ vicitraṃ paśya rāghava

manaḥsaṅgaikaraṅgeṇa śūnye vyomni jaganmayam /
yadidaṃ racitaṃ citraṃ tatsatyaṃ na kadācana

saṃsaktamanasāmasminsaṃsāre vyavahāriṇām /
atti tṛṣṇā śarīrāṇi tṛṇānyagniśikhā yathā

parisaktamaterdehānsikatāḥ patyurambhasām /
kaḥ śaktaḥ parisaṃkhyātuṃ trasareṇugaṇaṃ yathā

muktālatāyā gaṅgāyā merorāpādamastakam /
taraṅgamuktā gaṇyante na dehāḥ saktacetasām

saṃsaktamanasāmetā ramyāntaḥpurapaṅktayaḥ /
racitā rauravā vīcikālasūtrādināmikāḥ

saktacittaṃ janaṃ duḥkhaśuṣkamindhanasaṃcayam /
jvalatāṃ narakāgnīnāṃ viddhi tena jvalanti te

duḥkhajālamidaṃ nāma yatkiṃcijjagatīgatam /
saṃsaktamanasāmarthe tatsarvaṃ parikalpitam

saṃsaktacittamāyānti sarvā duḥkhaparamparāḥ /
jalakallolavalitā mahānadya ivāmbudhim

manaḥsaṃsargarūpiṇyā bhārūbhūtaśarīrayā /
kṣayodayadaśārthinyā sarvaṃ tatamavidyayā

asaṃsaṅgena bhogānāṃ sarvā rāma vibhūtayaḥ /
paraṃ vistāramāyānti prāvṛṣīva mahāpagāḥ

antaḥsaṃsaṅgamaṅgānāmaṅgāraṃ viddhi rāghava /
anantaḥsaṅgamaṅgānāṃ viddhi rāma rasāyanam

saṃsaṅgenāntarasthena dahyate prakṛtiḥ svayam /
svakalotthe nairakāṅkṣī pāvakena yathauṣadhiḥ

sarvatrāsaktamāśāntamanantamiva saṃsthitam /
asatkalpaṃ sadābhāsaṃ sukhāyaiva mano bhavet

vidyādṛśi prodayamāgatena kṣayaṃ tvavidyāviṣaye gatena /
sarvatra saṃsaktivivarjitena svacetasā tiṣṭhati yaḥ sa muktaḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe saṅgavicārayogopadeśo nāmāṣṭaṣaṣṭitamaḥ sargaḥ