Yoga Vasistha · Chapter 5.63

triṣaṣṭitamaḥ sargaḥ

parigha uvāca /
rājannūnaṃ prabuddho'si prāptavānasi tatpadam /
saṃśītalāntaḥkaraṇaḥ pūrṇenduriva rājase

ānandamadhusaṃpūrṇo lakṣmyā ca parayā śritaḥ /
śītalaḥ snigdhamadhuro rājīvamiva rājase

nirmalo vitataḥ pūrṇo gambhīraḥ prakaṭāśayaḥ /
velānilavilāsena mukto'bdhiriva rājase

svaccha ānandasaṃpūrṇo naṣṭāhaṃkāravāridaḥ /
sphuṭo vistīrṇagambhīraḥ śaratkhamiva rājase

sarvatra lakṣyase svasthaḥ sarvatra parituṣyasi /
sarvatra vītarāgo'si rājansarvatra rājase

sārāsāraparicchedapāragastvaṃ mahādhiyā /
jānāsi sarvamevedaṃ yathāsthitamakhaṇḍitam

bhāvābhāvaparicchedatattvajñamuditāśayam /
gamāgamadaśālaulyamuktaṃ tava vapuḥ sthitam

vastunā'vastunevāntaramṛteneva sāgaraḥ /
apunaḥprakṣayāyeva pare tṛpto'si sundara

suraghuruvāca /
na tadasti mune vastu yatropādeyatāsti naḥ /
yāvatkiṃcididaṃ dṛśyaṃ tāvadetanna kiṃcana

upādeyasya cābhāvāddheyamapyasti kiṃ kila /
pratiyogi vyavacchedyaṃ vinā heyaṃ kimucyate

tucchatvātsarvabhāvānāmatucchatvācca kālataḥ /
ciraṃ mama parikṣīṇe tucchātucche manaḥsthitī

deśakālavaśādeva tucchasyātucchatāmiha /
atucchasya tu tucchatvaṃ varjye nindāstutī budhaiḥ

rāgānnindāstutī loke rāgaśca parivāñchitam /
vāñchite ca mahodāraṃ vastu śobhanabuddhinā

trailokye ca striyaḥ śailāḥ samudravanarājayaḥ /
bhūtāni vastuśūnyāni sāro nāstyatra vastutaḥ

māṃsāsthidārumṛdratnamaye jagati jarjare /
vāñchanīyavihīne'smiñśūnye kimiva vāñchyate

vāñchāyāṃ vinivṛttāyāṃ saṃkṣayo dveṣarāgayoḥ /
dinalakṣmyāṃ vyapetāyāmālokātapayoriva

alamativitatairvacaḥprapañcai-
riyamuciteha sukhāya dṛṣṭirekā /
upaśamitarasaṃ samaṃ mano'nta-
ryadi muditaṃ tadanuttamā pratiṣṭhā

ityārṣe śrīvāsiṣṭhamahārāmāyaṇe vālmīkīye devadūtokte mo. upaśamaprakaraṇe suraghuparighaniścayo nāma triṣaṣṭitamaḥ sargaḥ