Yoga Vasistha · Chapter 5.50

pañcāśaḥ sargaḥ

śrīvasiṣṭha uvāca /
evameṣātivitatā durjñānā raghunandana /
mahāmohamayī māyā viṣamā pāramātmikī

kva muhūrtadvayasvapnasaṃbhramāllokadṛṣṭatā /
kvānekavarṣasaṃbhuktaśvapacāvanipabhramaḥ

kva saṃbhramopalabdhatvaṃ kva pratyakṣanidarśanam /
kvāsatyatvamasaṃdigdhaṃ kva satyapariṇāmitā

ato vacmi mahābāho māyeyaṃ viṣamānvaham /
asāvadhānamanasaṃ saṃyojayati saṃkaṭe

śrīrāma uvāca /
evamasya kathaṃ brahmanmāyācakrasya rodhanam /
kuryuḥ pravahato vegātsarvāṅgacchedakāriṇaḥ

śrīvasiṣṭha uvāca /
asya saṃsārarūpasya māyācakrasya rāghava /
cittaṃ viddhi mahānābhiṃ bhramato bhramadāyinaḥ

tasmindrutamavaṣṭabdhe dhiyā puruṣayatnataḥ /
gṛhītanābhivahanānmāyācakraṃ nirudhyate

avaṣṭabdhamanonābhimohacakraṃ na gacchati /
yathā rajjvāṃ niruddhāyāṃ kīlakaṃ rajjuveṣṭitam

cakrayuddhaikatajjño'si kasmājjānāsi nānagha /
cakraṃ nābhāvavaṣṭabdhaṃ vaśamāyāti nānyathā

cittaṃ nābhimavaṣṭabhya tasmādyatnena rāghava /
saṃsāracakraṃ vahanādātmanaḥ parirodhaya

etāṃ yuktiṃ vinā duḥkhamanantamitamātmanaḥ /
asyāṃ dṛṣṭau kṣaṇādantaṃ gatamevāvalokaya

cittākramaṇamātrāttu paramādauṣadhādṛte /
prayatnenāpi saṃsāramahārogo na śāmyati

tasmādrāghava saṃtyajya tīrthadānatapaḥkriyāḥ /
śreyase paramāyāntaścittameva vaśaṃ kuru

cittāntareva saṃsāraḥ kumbhāntaḥ kumbhakhaṃ yathā /
cittanāśe na saṃsāraḥ kumbhanāśe na kumbhakham

ciraṃ saṃsaraṇākāśakoṭaraṃ cittakumbhakham /
vināśyātulitākāśasvarūpaṃ rūpamāviśa

vartamānamanāyāsaṃ bhajadvāhyadhiyā kṣaṇam /
bhūtaṃ bhaviṣyadabhajadyāti cittamacittatām

saṃkalpāṃśānusaṃdhānavarjanaṃ cetpratikṣaṇam /
karoṣi tadacittatvaṃ prāpta evāsi pāvanam

yāvatsaṃkalpakalanā tāvaccittavibhūtayaḥ /
yāvajjaladavistārastāvatkhajalabindavaḥ

sacittaṃ cetanaṃ yāvattāvatsaṃkalpakalpanam /
sacandrāṃśu jagadyāvattāvatprāleyaleśakāḥ

cetanaṃ cittariktaṃ cedbhāvitaṃ tatsvasaṃsṛteḥ /
āmūlameva dagdhāni viddhi mūlāni siddhavat

cetanaṃ cittariktaṃ hi pratyakcetanamucyate /
nirmanaskasvabhāvaṃ tanna tatra kalanāmalaḥ

sā satyatā sā śivatā sāvasthā pāramātmikī /
sarvajñatā sā sā dṛṣṭirnatu yatra manaḥ kṣatam

mano yatra tu tatrāśāstatra duḥkhasukhāni ca /
sadā saṃnidhimāyānti śmaśāna iva vāyasāḥ

vastutattvāvabodhena sarvabhāvavyavasthiteḥ /
sasṛtivrataterbījaṃ saṃkalpenopajāyate

śāstrasajjanasaṃparkasaṃtatābhyāsayogataḥ /
jāgatānāmavastutvaṃ bhāvānāmavagamyate

avivekādupāhṛtya cetasodyamaniścayaiḥ /
balātkāreṇa saṃyojyaṃ śāstrasatpuruṣakramaiḥ

mukhyaṃ kāraṇamātmaiva paramātmāvalokane /
agādhe patitaṃ ratnaṃ ratnenaivāvalokyate

svānubhūtāni duḥkhāni svātmaiva tyaktumicchati /
tenātmaivātmavijñāne heturekaḥ paraḥ smṛtaḥ

pralapanvisṛjangṛhṇannunmiṣannimiṣannapi /
nirastamananānantasaṃvinmātraparo bhava

jāyamānastathā jīvanmriyamāṇaḥ kriyārataḥ /
svātmanyamalatāṃ prāpte saṃvidaṃśe sthiro bhava

mamedaṃ tadayaṃ so'hamiti saṃtyajya vāsanāḥ /
ekaniṣṭhatayāntasthasaṃvinmātraparo bhava

vartamānabhaviṣyantyoḥ sthityorādehamekadhīḥ /
svasaṃvittyānusaṃdhānasamādhānaparo bhava

bālyayauvanavṛddheṣu duḥkheṣu ca sukheṣu ca /
jāgratsvapnasuṣupteṣu svasaṃvittiparo bhava

malaṃ saṃvedyamutsṛjya mano nirgalayanparam /
āśāpāśamalaṃ chittvā svasaṃvittiparo bhava

śubhāśubhasvasaṃketasaṃśāntāśāviṣūcikaḥ /
naṣṭeṣṭāniṣṭadṛṣṭistvaṃ saṃvitsāraparo bhava

sakartṛkarmakaraṇānsvāsparśānantarā spṛśan /
nirvikalpanirālambaḥ svacinmātraparo bhava

jāgratyeva hi saṃsuptāṃ bhāvayansusthirāṃ sthitim /
sarvamasmīti saṃcintya sattaikātmavapurbhava

nānā'nānādaśāmukto yukto muktatayā same /
samagrakalanādīpaḥ svacinmātraparo bhava

ātmatāparate tyaktvā nirvibhāgo jagatsthitau /
vajrastambhavadātmānamavalambya sthiro bhava

sthitvāntarmānasānpāśānāśārūpānudārayā /
dhiyā dhairyaikadharmiṇyā nirdharmādharmatā vraja

samāsvādayatastattvaṃ svasaṃvedanadharmiṇaḥ /
viṣaṃ hālāhalamapi yāsyatyamṛtatāmatha

tadodeti mahāmohaḥ saṃsṛtibhramakāraṇam /
nirmalāyā niraṃśāyāḥ saṃvitteścāmatiryadā

tadā saṃkṣīyate mohaḥ saṃsārabhramakāraṇam /
nirmalāyāṃ niraṃśāyāṃ svasaṃvittau sthitiryadā

svarūpamanuyātasya tīrṇasyāśāmahārṇavam /
prasariṣyati te saṃvitsaryāṃśuriva sarvataḥ

svabhāvamālokayata ānandādvayasaṃsthiteḥ /
rasāyanamapi svādu rāma prativiṣāyate

tairno bhajāmahe puṃbhirye svabhāvamupāgatāḥ /
śeṣāḥ puruṣanāmāno gardabhā dīrghabāhavaḥ

parvatātparvataṃ yānti puro'dreriva dantinaḥ /
parāṃ koṭiṃ prayātasya svasaṃvittyunnatasthiteḥ

adṛṣṭādṛśyasīmno'ntaḥ sūryādīnyakhilānyapi /
na tejāṃsyupakurvanti svasaṃviddivyacakṣuṣaḥ

avastutāṃ vrajantyete mādhyāhnā iva dīpakāḥ /
arkādayo mahālokā vidyayādhigatātmanaḥ

tejoṃśuṣu prabhāveṣu baliṣvapi mahatsvapi /
sarveṣūnnatiyukteṣu tattvajñaḥ paramonnataḥ

bhāntīha bhāsā yasyārkavahnīndumaṇitārakāḥ /
tathā jagati rājante jñātajñeyā narottamāḥ

dharāvivarakīṭebhyo gardabhebhyo'pi mānavaḥ /
tiryagbhyaścāpyatattvajñā rāma tucchatarāḥ smṛtāḥ

tāvatsaṃmohavetālo dehī yāvadanātmavān /
ātmajña eva saṃyuktaścetaneneti tadvidaḥ

anātmajño hi duḥkhehaḥ prasphurannapi bhūtale /
śava eva bhramatyuccairātmajñastu sacetanaḥ

dūrādātmajñatā yāti citte pīvaratāṃ gate /
ālokalakṣmīrabhito mahāmegha ivotthite

bhogābhogatiraskāraiḥ kārśyaṃ neyaṃ śanairmanaḥ /
rasāpahāraistajjñena kālenājīrṇaparṇavat

anyātmanyātmabhāvena dehamātrāsthayānayā /
putradārakuṭumbaiśca ceto gacchati pīnatām

ahaṃkāravikāreṇa mamatāmalahelayā /
idaṃ mameti bhāvena ceto gacchati pīnatām

jarāmaraṇaduḥkhena vyarthamunnatimīyuṣā /
doṣāśīviṣakośena ceto gacchati pīnatām

ādhivyādhivilāsena samāśvāsena saṃsṛteḥ /
heyādeyaprayatnena ceto gacchati pīnatām

snehena dhanalobhena lābhena maṇiyoṣitām /
āpātaramaṇīyena ceto gacchati pīnatām

durāśākṣīrapānena bhogānilabalena ca /
āsthādānena cāreṇa cittāhiryāti pīnatām

āgamāpāyavapuṣā viṣavaiṣamyaśaṃsinā /
bhogābhogena bhīmena ceto gacchati pīnatām

śarīraduḥśvabhraciraprarūḍhaṃ
cintācayoccākṛtimañjarīkam /
jarāmṛtivyādhiphalaughanamraṃ
kāmopabhogaughavikāsipuṣpam

vicārasārakrakacena citta-
viṣadrumaṃ tvadbhutamadrikalpam /
āśāmahāśākhamaśaṅkamenaṃ
chindhi prasahyātra vikalpapatram

mattekṣaṇaṃ caikataṭopaveśaṃ
viśrāntisaukhyeṣvasamarthamugram /
ālokanotkaṃ sujanakramālla-
khaṇḍasya caṇḍaṃ sukhaduḥkhagaṇḍam

cetogajaṃ kāyakukānanasthaṃ
sutīkṣṇayā dhīkarajāgrapaṅktyā /
vidārayādīrghavikāradantaṃ
kriyākaraṃ rāghava rājasiṃha

ratiṃ gataṃ nityamasatpradeśe
śarīramāṃsagrasanena puṣṭam /
duṣṭakriyākarkaśacañcudaṇḍa-
mekekṣaṇaṃ puṣṭatamoṃśukṛṣṇam

dūre samutsāraya bhārabhūtaṃ
duśceṣṭitaṃ karkaśamāraṭantam /
gandhodgataṃ kāyakulāyakośā-
ddoṣopaśāntyai nijacittakākam

tṛṣṇāpiśācyā paricaryamāṇaṃ
viśrāntamajñānamahāvaṭeṣu /
bhrāntaṃ ciraṃ dehaśateṣvaṭavyāṃ
svasaṃsṛtau cetanavarjiteṣu

vivekavairāgyaguruprayatna-
mantraiḥ svatantraiḥ svacidātmagehāt /
notsādayeccittapiśācamenaṃ
yāvatkutastāvadihātmasiddhiḥ

śubhāśubhāsyaṃ hatamānavaughaṃ
cintāviṣaṃ kāyakukañcukaṃ ca /
ajasramacchaśvasanāśanaṃ ca
sarvasya nānābhayanāśadaṃ ca

hṛdajjaduḥśālmalikoṭarastha-
mamoghayā citkhagamantraśaktyā /
nītvā śamaṃ rāma manomahāhiṃ
bhayaṃ bhṛśaṃ projjhya bhavābhayātmā

amaṅgalākāradharaḥ śarīra-
śavāvalīsaṃtatasevanena /
digāvalīsaṃbhramaṇaśramārtaḥ
śmaśānasevī vapuṣā kṣatena

bhogamiṣo dikṣvabhidhāvamāna
utkandharo dhīravivṛddhagardhaḥ /
uḍḍīya vai gacchati cittagṛdhro
dehadrumāttannipuṇaṃ jayaste

bhrāntaṃ vanānteṣu digantareṣu
phalārthinaṃ cañcalamākulāṅgam /
janmāvanerjanmamahiṃ prayātaṃ
saṃsārabandhaṃ janatāṃ hasantam

drume'kṣināsākusume bhujādi-
śākhe vilolāṅgulijālapatre /
samullasantaṃ parimārayānta-
rmanomahāmarkaṭamaṅga siddhyai

abhyutthitaṃ satphalasaṃkṣayāya
lasanmukhāsaṅgitaḍitprakāśam /
varṣantamāsāramanarthasārtha-
māndolitaṃ vāsanavātyayāntaḥ

saṃkalpasaṃkalpanavarjanogra-
mantraprabhāvādhṛdayāmbarastham /
sotsāhamutsādaya cittameghaṃ
bṛhatphalaṃ prāpya bhavālamādyaḥ

granthīkṛtaṃ karmabhirātmasṛṣṭe-
rmantrairabhedyaṃ jvalanairadagdham /
pīḍāṃ parāmātmani kalpayantaṃ
samastajātyantaradīrghadāma

saṃprotaniḥsaṃkhyaśarīramālaṃ
balādasaṃkalpanamātraśastraiḥ /
chittvā svayaṃ rāghava cittapāśaṃ
yathāsukhaṃ tvaṃ viharāstaśaṅkaḥ

phūtkāradagdhākhilapānthaloka-
matyantaduṣprāpaparaprabodham /
āśīviṣaṃ śoṣitalokakhaṇḍaṃ
vyāttyāmiṣoddhūtaśarīradaṇḍam

āmantharaṃ dehaguhāsu guptaṃ
saṃkalpaghorājagaraṃ javena /
akāmanānāmamahānalena
balena dagdhvā vibhavo bhava tvam

cittena cetaḥ śamamāśu nītvā
śuddhena ghorāstramivāstrayuktyā /
cirāya sādho tyaja cañcalatvaṃ
vimarkaṭo vṛkṣa ivākṣataśrīḥ

amalamiti ca kṛtvā cetasā vītaśaṅka-
mupaśamitamano'ntaḥ sarvamādehameva /
tṛṇalavalaghu paśyam̐llīlayā heyadṛṣṭyā
piva vihara ramasva prāptasaṃsārapāraḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe rāghavāśayaviniyogo nāma pañcāśaḥ sargaḥ