Yoga Vasistha · Chapter 5.47

saptacatvāriṃśaḥ sargaḥ

śrīvasiṣṭha uvāca /
muhūrtadvitayenātha gādhirādhibhavabhramāt /
praśaśāsākulībhāvo velāvarta ivāmbudheḥ

manonirmāṇasaṃmohāttasmātsa virarāma ha /
kalpāntasamaye brahmā jagadviracanādiva

bodhamāpa śanaiḥ śāntaḥ svamevonnidradhīriva /
kṣībatāyāṃ praśāntāyāṃ yathā pariṇatāśayaḥ

ayaṃ so'hamidaṃ kāryamidaṃ neti dadarśa ha /
niśāvyapagame loko yathā kṣīṇe tamaḥpaṭe

smṛtasvarūpo'tha padamuddadhre sa jalāntarāt /
śiśirānte pravṛttāsyaṃ sarojamiva mādhavaḥ

etadvārikakubūvyomavatīṃ vasumatīmimām /
anyāmiva punaḥ paśyanvismayaṃ paramaṃ yayau

ko'haṃ kimiva paśyāmi kimakārṣamahaṃ kila /
evaṃ vicārayaṃścitraṃ sabhrūbhaṅgamabhūtkṣaṇam

śrāntastatkṣaṇamātreṇa saṃbhramaṃ dṛṣṭavānaham /
iti vijñāya salilādudasthādudayārkavat

cintayāmāsa ca taṭe kva sā mātā kva sā priyā /
yadāhaṃ mṛtimāyāto madhye mātṛmahelayoḥ

bālasya mātāpitarau naṣṭau kila mamāmateḥ /
vātanītasya patrasya vallīvṛkṣamivāsinā

avivāho'smi jānāmi na svarūpamapi striyaḥ /
duṣṭāyāḥ kṣobhakāriṇyā madirāyā iva dvijaḥ

atidūratarībhūtāḥ svadeśasya svabāndhavāḥ /
ke nāma mama yeṣāṃ te madhye jīvaṃ tyajāmyaham

tasmādetatsamudbhūtamahaṃ kiṃ nāma dṛṣṭavān /
vividhārambhasaṃrambhaṃ gandharvanagaraṃ yathā

tadāstāmetadeṣā hi bandhumadhye mṛtasthitiḥ /
māyāmohe manāgasminna satyamupalabhyate

nityamevamanantāsu bhrāntidṛṣṭiṣu dehinām /
ceto bhramati śārdūlo vanarājiṣvivonmadaḥ

avadhāryeti taṃ citte mohaṃ gādhirnināya saḥ /
dināni katicittasminsvaka evāśrame tadā

ekadā gādhimagamatkaścittatra priyo'tithiḥ /
brahmāṇamiva durvāsāḥ sa viśaśrāma saśramaḥ

paramāṃ tuṣṭimānītaḥ phalapuṣparasāśanaiḥ /
so'tithirgādhinā tena vasanteneva pādapaḥ

mitho vanditasaṃdhyau tau kṛtajāpyāvubhāvapi /
kramācchayanamāsādya tasthaturmṛdupallavam

tataḥ prāvartate śāntā tayostāpasayoḥ kathā /
svavyāpārocitā puṣpaśrīrivartutvamāśayoḥ

taṃ papracchātithiṃ gādhiḥ prasaṅgapatitaṃ vacaḥ /
kiṃ brahmansukṛśāṅgastvaṃ kimiti śramavānasi

atithiruvāca /
mamātikārśyaśramayorbhagavan śrṛṇu kāraṇam /
kathayāmi tathābhūtaṃ vayaṃ nāsatyavādinaḥ

astyasminvasudhāpīṭhe uttarāśānikuñjake /
kīro nāmātivikhyātaḥ śrīmāñjanapado mahān

tatrāhamavasaṃ māsaṃ pūjyamānaḥ pure janaiḥ /
nānātmasvādalolātmā cittavetālamohitaḥ

ekadaikena tatroktaṃ kathāprastāvataḥ kvacit /
ihābhūcchvapaco rājā varṣāṇyaṣṭau dvijeti me

tato grāmeṣu tatpṛṣṭaiḥ proktaṃ sakalajantubhiḥ /
rājā babhūva śvapaco varṣāṇyaṣṭāviheti taiḥ

so'yamante parijñātaḥ praviṣṭo jvalanaṃ javāt /
tato dvijaśatānīha praviṣṭāni hutāśanam

iti teṣāṃ mukhācchrutvā tasmānnirgatya maṇḍalāt /
prayāge'karavaṃ śuddhyai prāyaścittamahaṃ dvija

kṛtvā cāndrāyaṇasyānte tṛtīyasyādya pāraṇam /
ihāhamāgatastena śrāntosmyatikṛśosmi ca

śrīvasiṣṭha uvāca /
iti śrutavatā tena gādhinā sa tadā dvijaḥ /
bhūyaḥ pṛṣṭo'pyetadeva kathayāmāsa nānyathā

atha vismayavāngādhistāṃ nītvā tatra śarvarīm /
jagadgehamahādīpe ravāvudayamāgate

kṛtaprātaḥsnānavidhāvāpṛcchaya svātithau gate /
idaṃ saṃcintayāmāsa vismayoddhurayā dhiyā

yanmayā saṃbhrame dṛṣṭaṃ satyabhūtaṃ dvijena tat /
uktaṃ mameti kiṃ nāma syānmāyāśambarakramaḥ

yadbandhumadhye maraṇaṃ mayā taddṛṣṭamātmanaḥ /
sā māyaiva na saṃdehaḥ śeṣaṃ paśyāmi tasya tam

tadātmaśvapacodantaṃ draṣṭuṃ tāvadakhinnadhīḥ /
bhūtamaṇḍalaparyantagrāmaṃ gacchāmi satvaram

iti saṃcintayangantuṃ maṇḍalāntaramādarāt /
uttasthau bhāskaraḥ pārśvaṃ merordraṣṭumivodyataḥ

manorājyamapi prājñā labhante vyavasāyinaḥ /
gādhinā svapnasaṃdṛṣṭaṃ gatvā labdhamakhaṇḍitam

sarvamadhyavasāyena duṣprāpamapi labhyate /
paśyangādhirjaganmāyāṃ prameyīkartumudyataḥ

vinirgatyābhavanmārge prāvṛḍoghajavena saḥ /
deśānullaṃghayāmāsa bahūnvātaturaṅgavat

taccedṛśanijācāraṃ bhūtamaṇḍalamāgataḥ /
karabhaḥ kaṇṭakārthyekaḥ kārañjamiva kānanam

tatra saṃvitsthitenaiva saṃniveśena vai punaḥ /
apaśyadbhrāmakaṃ kaṃcidgandharva iva pattanam

dadarśa tasya paryante tameva śvapacālayam /
adhastādbhūvanasyeva pātāle narakavrajam

cittacintitavistāraṃ tanniveśamayaṃ param /
gandharvavadasāvātmaśvapacatvaṃ ca dṛṣṭavān

tenaiva saṃniveśena prāgdṛṣṭaṃ śvapacāspadam /
tasya kāmapi vairāgyapadavīmanayanmanaḥ

prāvṛḍāsāraluṭhitaṃ bhittijātayavāṅkuram /
paryastacchādanārdhāṅkaṃ kiṃcidādṛṣṭatalpakam

dāridryaṃ taddṛḍhamiva daurbhāgyamiva kuḍyamat /
bhraṣṭāṅgamiva daurātmyaṃ dauḥsthityamiva khaṇḍitam

gādhirdantāvadalitairgavāśvamahiṣāsthibhiḥ /
dhavalairvyāptaparyantaṃ sākṣyaṃ kartumiva sthitaiḥ

bhuktaṃ pītaṃ purā tena yeṣu kharparakeṣu vai /
tairaspandābhrasalilaiḥ pānapūrṇairivāvṛtam

tābhirevāntratantrībhiḥ saṃśuṣkābhilatāvṛtaiḥ /
tṛṣṇābhiriva dīrghābhiḥ paritaḥ pariveṣṭitam

ciramālokayāmāsa sa tadātmagṛhaṃ javāt /
prāktanaṃ śuṣkaśavatāṃ yātaṃ dehamivātmavān

ativismayamātasthau grāmakaṃ samupāyayau /
ullaṃghya mlecchanagaramāryadeśamivādhvagaḥ

tatrāpṛcchajjanaṃ sādho kaccitsmarati bho bhavān /
prāgvṛttamasya grāmasya paryante śvapacakramam

sarva eva hi dhīmantaściravṛttamapi sphuṭam /
karasthamiva paśyanti mayeti sujanācchrutam

atra śvapacamekānte vāsinaṃ vṛddhamuttamam /
smarasyenaṃ kimuta bho duḥkhānāmiva dehakam

yadi jānāsi bhoḥ sādho tanme kathaya tattvataḥ /
pāntha saṃśayavicchede mahatpuṇyaphalaṃ smṛtam

bhūyo bhūya iti grāmyāḥ pṛṣṭā gādhidvijanmanā /
analpasmayasaṃrambhamārteneva cikitsakāḥ

grāmyā ūcuḥ /
yathā kathayasi brahmaṃstattathā na tadanyathā /
kaṭaṃjanāmā śvapaca ihābhūddāruṇākṛtiḥ

putrapautrasuhṛdbhṛtyabandhusvajanapeṭakam /
yasyātivistīrṇamabhūtpatravṛndaṃ taroriva

yasya vṛddhasya tatsarvaṃ kalatraṃ mṛtyurācchinat /
adreḥ puṣpaphalopetaṃ dāvo vanamivānalaḥ

yastato deśamutsṛjya yayau kīrapurāntaram /
varṣāṇyaṣṭāvanudvegaṃ tatra rājā babhūva saḥ

yastatrārthaṃ parijñāya janairdūre nirākṛtaḥ /
yathā rāśiranarthasya yathā grāme viṣadrumaḥ

tato jane'gniṃ praviśatyātmanā yo hutāśanam /
āryatāmāryasaṃsargādāgataḥ praviveśa ha

kiṃ tvameva prayatnena śvapacaṃ pṛcchasi prabho /
kiṃ te bandhurasau kaccidabhavastvaṃ svato'thavā

evaṃ kathayato grāmyāngādhiḥ pṛcchanpunaḥpunaḥ /
sarveṣu tatra prānteṣu māsamekamuvāsa saḥ

yathā tenānubhūtaṃ tacchavāpacaṃ tattathaiva taiḥ /
grāmīṇaistasya kathitaṃ sarvairevāvakhaṇḍitam

avyāhataṃ sakalabhūtamukhādathaita-
dākarṇya samyagavalokya yathānubhūtam /
gādhiḥ śaśāṅkamalavadhṛdaye'dhirūḍhaṃ
gūḍhākṛtiḥ paramavismayamājagāma

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe gādhivṛttānte pratyakṣāvalokanaṃ nāma saptacatvāriṃśaḥ sargaḥ