Yoga Vasistha · Chapter 5.42

śrīvasiṣṭha uvāca /
ityuktvā puṇḍarīkākṣaḥ sanarāmarakinnaraḥ /
dvitīya iva saṃsāraścacālāsuramandirāt

prahrādādivinirmuktaiḥ paścātpuṣpāñjalivrajaiḥ /
pūryamāṇo vihaṅgeśapāścātyāṅgaruhotkaraiḥ

kramātkṣīrodamāsādya visṛjya suravāhinīm /
bhogibhogāsane tasthau śvetābja iva ṣaṭpadaḥ

bhogibhogāsane viṣṇuḥ śakraḥ svarge sahāmaraiḥ /
pātāle dānavādhīśa iti tasthurgatajvarāḥ

eṣā te kathitā rāma niḥśeṣamalanāśinī /
prāhrādī bodhasaṃprāptiraindavadravaśītalā

tāṃ tu ye mānavā loke bahuduṣkṛtino'pi hi /
dhiyā vicārayiṣyanti te prāpsyantyacirātpadam

sāmānyena vicāreṇa kṣayamāyāti duṣkṛtam /
yogavākyavicāreṇa ko na yāti paraṃ padam

ajñānamucyate pāpaṃ tadvicāreṇa naśyati /
pāpamūlacchidaṃ tasmādvicāraṃ na parityajet

imāṃ prahrādasaṃsiddhiṃ pravicārayatā nṛṇām /
saptajanmakṛtaṃ pāpaṃ kṣayamāyātyasaṃśayam

śrīrāma uvāca /
pare pade pariṇataṃ pāñcajanyasvanairmanaḥ /
kathaṃ prabuddhaṃ bhagavanprahādasya mahātmanaḥ

śrīvasiṣṭha uvāca /
dvividhā muktatā loke saṃbhavatyanaghākṛte /
sadehaikā videhānyā vibhāgo'yaṃ tayoḥ śṛṇu

asaṃsaktamateryasya tyāgādāneṣu karmaṇām /
naiṣaṇā tatsthitiṃ viddhi tvaṃ jīvanmuktatāmiha

saiva dehakṣaye rāma punarjananavarjitā /
videhamuktatā proktā tatsthā nāyānti dṛśyatām

bhṛṣṭabījopamā bhūyo janmāṅkuravivarjitāḥ /
hṛdi jīvadvimuktānāṃ śuddhā bhavati vāsanā

pāvanī paramodārā śuddhasattvānupātinī /
ātmadhyānamayī nityaṃ suṣuptasyeva tiṣṭhati

api varṣasahasrānte tayevāntaravasthayā /
sati dehe prabudhyante jīvanmuktā raghūdvaha

prahrādo'ntasthayā śuddhasattvavāsanayā svayā /
bodhamāpa mahābāho śaṅkhaśabdāvabuddhayā

harirātmā hi bhūtānāṃ tasya yatpratibhāsate /
tattathaiva bhavatyāśu sarvamātmaiva kāraṇam

prabodhametu prahrādo yadaiveti vicintitam /
nimeṣādvāsudevena tadaivaitadupasthitam

ātmanyakāraṇenaiva bhūtānāṃ kāraṇena ca /
sṛṣṭyarthaṃ vapurāttaṃ hi vāsudevamayātmanā

ātmāvalokanenāśu mādhavaḥ paridṛśyate /
mādhavārādhanenāśu svayamātmāvalokyate

etāṃ dṛṣṭimavaṣṭabhya rāghavātmāvalokane /
viharāśu vicārātmā padaṃ prāpsyasi śāśvatam

duḥkhāsāravatī rāma saṃsāraprāvṛḍātatā /
jāḍyaṃ dadāti paramaṃ vicārārkamapaśyatām

prasādādātmano viṣṇormāyeyamatibhāsurā /
prabādhate na dhīrāṃstu yakṣī mantravato yathā

ātmecchayaiva ghanatāṃ samupāgatānta-
rātmecchayaiva tanutāmupayāti kāle /
saṃsārajālaracaneyamanantamāyā-
jvāleha vātavalayādiva pāvakasya

ityārṣe śrīvāsiṣṭhamahārāmāyaṇe vālmīkīye devadūtokte mo० upaśamaprakaraṇe prahrādavyavasthā nāma dvicatvāriṃśaḥ sargaḥ