Yoga Vasistha · Chapter 5.40

catvāriṃśaḥ sargaḥ

śrībhagavānuvāca /
sthairyaṃ dehasya dṛṣṭasya jīvitaṃ procyate janaiḥ /
dehāntarārthaṃ dehasya saṃtyāgo maraṇaṃ smṛtam

dvābhyāṃ caivāsi pakṣābhyāmābhyāṃ mukto mahāmate /
kiṃ te maraṇamastīha kiṃ vā jīvitamasti te

nidarśanārthametattu mayoktamarimardana /
na tvaṃ jīvasi sarvajña mriyase na kadācana

dehasaṃstho'pyadehatvādadeho'si videhadṛk /
vyomasaṃstho'pyasaktatvādavyomeva hi mārutaḥ

sparśasaṃbodhakāritvāddeha evāsti suvrata /
utsedhārodhakatvena khamutsedhasya kāraṇam

prabuddho jñātavastutvāddehaḥ kva śamināmiha /
idaṃ tvekaṃ paricchinnaṃ rūpamajñeṣu duḥsthitam

sarvadā sarvamevāsi citprakāśaḥ paraikadhīḥ /
ko dehaḥ ko'pyadehaste yaṃ gṛhṇāsi jahāsi ca

samudetu vasanto vā vātu vā pralayānilaḥ /
bhāvābhāvavihīnasya kimabhyāgatamātmanaḥ

praluṭhatsvapi śaileṣu kalpāgniṣu dahatsvapi /
vahatsūtpātavāteṣu svātmanyeva hi tiṣṭhati

sarvabhūtāni tiṣṭhantu sarvameva prayātu vā /
naśyantu vātha vardhantāmātmanyevābhitiṣṭhati

kṣīyate na kṣayaṃ prāpte vardhamāne na vardhate /
na spandate spandamāne dehe'sminparameśvaraḥ

dehasyāhamahaṃ dehīti kṣīṇe cittavibhrame /
tyajāmi na tyajāmīti kiṃ mudhā kalanoditā

idaṃ kṛtvā karomīdamidaṃ tyaktvedamityalam /
iti tattvavidāṃ tāta saṃkalpāḥ saṃkṣayaṃ gatāḥ

prabuddhāḥ sarvakartāraḥ kariṣyantīha kiṃcana /
na tasyākaraṇe nityamakartṛtvapadaṃ gatāḥ

akartṛtvādabhoktṛtvamarthādeva samāgatam /
saṃgṛhītaṃ kilānuptaṃ keneha bhuvanatraye

śānte kartṛtvabhoktṛtve śāntireveha śiṣyate /
prauḍhimabhyāgatā saiva muktirityucyate budhaiḥ

prabuddhāścinmayāḥ śuddhāḥ sarvamākramya saṃsthitāḥ /
kiṃ tyaktaṃ parigṛhṇantu kiṃ gṛhītaṃ tyajantu vā

grāhyagrāhakasaṃbandhapramitāvayavikramaiḥ /
hīnaḥ prameyāvayavaiḥ kiṃ gṛhṇātu jahātu kim

grāhyagrāhakasaṃbandhe kṣīṇe śāntirudetyalam /
sthitimabhyāgatā śāntirmokṣanāmnābhidhīyate

tatra sthitāḥ sadā śāntāstvādṛśāḥ puruṣottamāḥ /
suṣuptāvayavaspandasādharmyeṇa caranti hi

parāvabodhaviśrāntavāsano jagati sthitim / /
ardhasupta ivehemāṃ tvaṃ paśyātmasthayā dhiyā

na ramante hi ramyeṣu svātmanyeva gatāśayāḥ / /
nodvijante'nyaduḥkheṣu svātmanyekarasāyanāḥ

nityaprabuddhā gṛhṇanti kāryāṇīmānyasaṅginaḥ /
mukurā iva bimbāni yathāprāptānyavāñchayā

jāgrati svātmani svasthāḥ suptāḥ saṃsārasaṃsthitau /
bālavatpravivepante suṣuptasadṛśāśayāḥ

tvamajitapadavīmupāgato'ntaḥ
kamalajavāsaramekameva bhuktvā /
guṇagaṇakalitāmihaiva lakṣmīṃ
vraja paramāspadamacyutaṃ mahātman

ityārṣe śrīvāsiṣṭhamahārāmāyaṇe vālmīkīye mokṣopāyeṣūpaśamaprakaraṇe prahlādabodhanaṃ nāma catvāriṃśaḥ sargaḥ