Yoga Vasistha · Chapter 5.35

pañcatriṃśaḥ sargaḥ

prahlāda uvāca /
omityekocitākāro vikāraparivarjitaḥ /
ātmaivāyamidaṃ sarvaṃ yatkiṃcijjagatīgatam

medosthimāṃsamajjāsṛgatīto'pyeṣa cetanaḥ /
antarastho hi sūryādīnprakāśayati dīpakaḥ

uṣṇīkaroti dahanaṃ rasayatyamṛtaṃ rasam /
indriyānubhavānbhuṅkate bhogānivamahīpatiḥ

tiṣṭhannapi hi nāsīno gacchannapi na gacchati /
śānto'pi vyavahārasthaḥ kurvannapi na lipyate

pūrvamadya tathedānīmihāmutrobhayatra ca /
vihito'vihito'pyeṣa samaḥ sarvāsu vṛttiṣu

udbhavatyabhayo bhāvaṃ bhuvanāni tatastataḥ /
brahmāditṛṇaparyantaṃ jagadāvartayansthitaḥ

nityaspandamayo nityamapi devātsadāgateḥ /
sthāṇorapyakriyo nityamākāśādapyalepakaḥ

manāṃsi kṣobhayatyeṣa pallavānīva mārutaḥ /
vāhayatyakṣapaṅkatiṃ svāmaśvālīmiva sārathiḥ

atidurvidhavaddehagehe karmarataḥ sadā /
samrāḍivātmani svasthaḥ saṃsthito bhogabhugvibhuḥ

eṣa eva sadā'nviṣyaḥ stutyo dhyātavya eva tu /
jarāmaraṇasaṃmohādanenottīrya gamyate

sulabhaścāyamatyantaṃ sujeyaścāptabandhuvat /
śarīrapadmakuhare sarveṣāmeva ṣaṭpadaḥ

anākruṣṭo'pyanāhūtaḥ svadehādeva labhyate /
manāgevopahūto'pi kṣaṇādbhavati sanmukhaḥ

nāsya saṃsevyamānasya sarvasaṃpattiśālinaḥ /
dhanānāmīśvarasyeva smayo garvo yathā bhavet

āmoda iva puṣpeṣu tailaṃ tilakaṇeṣviva /
rasajātiṣvivāsvādo devo deheṣu saṃsthitaḥ

avicāravaśādeṣa hṛdayastho'pi cetanaḥ /
na jñāyate cirādṛṣṭo dṛṣṭabandhurivāgrataḥ

vicāraṇāparijñāta etasminparameśvare /
abhyudeti parānando labdhe priyajane yathā

asmindṛṣṭe pare bandhāvuddāmānandadāyini /
āyānti dṛṣṭayastāstā yābhirbhaṅgo vilīyate

truṭyante sarvataḥ pāśāḥ kṣīyante sarvaśatravaḥ /
na kṛntanti manāṃsyāśā gṛhāṇīva durākhavaḥ

asmindṛṣṭe jagaddṛṣṭaṃ śrute'sminsakalaṃ śrutam /
spṛṣṭecāsmiñjagatspṛṣṭaṃ sthite'sminsaṃsthitaṃ jagat

eṣa jāgarti suptānāṃ praharatyavivekinām /
haratyāpadamārtānāṃ vitaratyamahātmanām

vicaratyeṣa lokeṣu jīva eva jagatsthitau /
vilasatyeva bhogeṣu prasphuratyeva vastuṣu

ātmanātmānamevātaḥ śāntenānubhavanbhavī /
sthitaḥ sarveṣu deheṣu tīkṣṇatvaṃ mariceṣviva

cetanākalanārūpī sabāhyābhyantarāśritaḥ /
jagatpadārthasaṃbhāre sattāsāmānyamāsthitaḥ

eṣa śūnyatvamākāśe spanda eṣa sadāgatau /
prakāśaścaiva tejastu payassveṣa rasaḥ paraḥ

kāṭhinyamavanāvevamauṣṇyameva hutāśane /
śaityameṣa niśānāthe sattā caiṣa jagadgaṇe

maṣīpiṇḍe yathā kārṣṇyaṃ śaityaṃ himakaṇe yathā /
yathā puṣpeṣu saugandhyaṃ dehe dehapatistathā

yathā sarvagatā sattā kālaḥ sarvagato yathā /
prabhuśaktirmahī yasya sarvadeśagatā yathā

rūpālokamanaskārayuktaṃ sattvaṃ tathātmanaḥ /
nityaḥ so'yaṃ mahādevo devānāmeva bodhakaḥ

ahamevāsmi me nāsti kalanāpi kiletarā /
reṇunevāṇunā vyomni padmapatramivāmbhasā

saṃbhrameṇeva pāṣāṇe saṃbandho mayi netaraiḥ /
sukhaduḥkhaśriyo dehe mā patantu patantu vā

tumbakopari dhārāśca kā naḥ kṣatirupasthitā /
dīpāṅgātigato rajvā nāloko badhyate yathā

tathā nāyamahaṃ baddhaḥ sarvabhāvagaṇātigaḥ /
saṃbandhaḥ ko'stu naḥ kāmairbhāvābhāvairathendriyaiḥ

kena saṃbadhyate vyoma kena saṃbādhyate manaḥ /
śarīre śatadhā yāte khaṇḍanā kā śarīriṇaḥ

kumbhe bhagne kṣate kṣīṇe kumbhākāśasya kā kṣatiḥ /
piśācaka ivādṛśyo mano nāmoditaṃ mudhā

jaḍe tasminkṣate bodhātkā naḥ kṣatirupasthitā /
sukhaduḥkhamayī yasya vāsanā tanmano mama

abhavatpūrvamadyaikā saṃpannā'tanunirvṛtiḥ /
anyo bhuṅkte'nya ādatte'pyanyasyānarthasaṃkaṭaḥ

anyaḥ paśyatyaho maurkhyaṃ kasyeyaṃ khalu cakrikā /
bhuṅkte prakṛtirādatte manodehasya saṃkaṭaḥ

duṣṭātmā maurkhyamastīha na kiṃcitkevale kṣatiḥ /
na me bhogasthitau vāñchā na ca bhogavivarjane

yadāyāti tadāyātu yatprayāti prayātu tat /
sukheṣu mama nāpekṣā nopekṣā duḥkhavṛttiṣu

sukhaduḥkhānyupāyāntu yāntu vāpyahameṣu kaḥ /
vāsanā vividhā dehe tvastaṃ codayameva vā

prayāntu nāhametāsu na caitā mama kāścana /
etāvantamahaṃ kālamajñānaripuṇā hataḥ

hṛtvā vivekasarvasvamekāntamavapothitam /
vaiṣṇavena prasādena svasamutthena cāruṇā

idānīṃ saṃparijñāya mayaiṣa parimoṣitaḥ /
ahaṃkārapiśāco'yaṃ śarīratarukoṭarāt

parāvabodhamantreṇa mayedānīmapākṛtaḥ /
nirahaṃkārayakṣo'yaṃ maccharīramahādrumaḥ

puṇyatāmalamāyātaḥ praphulla iva rājate /
praśāntamohadāridryo durāśādoṣasaṃkṣaye

vivekadhanasaṃbhārānsthito'smi parameśvaraḥ /
jñātaṃ jñātavyamakhilaṃ dṛṣṭā draṣṭavyadṛṣṭayaḥ

tatprāptamadhunā yena nāprāptamavaśiṣyate /
diṣṭyā dūrojjhitānarthāmapetaviṣayoragām

saṃśāntamohanīhārāṃ śāntāśāmṛgatṛṣṇikām /
rajorahitasarvāśāṃ śītalopaśamadrumām

prāpto'smi vitatāṃ bhūmimunnatāṃ pāramārthikīm /
stutyā praṇatyā vijñaptyā śamena niyamena ca

labdho'yaṃ bhagavānātmā dṛṣṭaścādhigataḥ sphuṭam /
ahaṃkārapadātītaścirātsaṃsmṛtimāgataḥ

svabhāvādbhagavānātmā viṣṇorbrahma sanātanam /
indriyoragagarteṣu maraṇaśvabhrabhūmiṣu

tṛṣṇākarañjakuñjeṣu kāmakolāhaleṣu ca /
vāsanāvanajāleṣu janmakūpāntareṣu ca

duḥkhadāvāgnidāheṣu duḥkhadāvāgnihāriṣu /
pātotpātadaśālakṣairmajjanonmajjanabhramaiḥ

āvirbhāvatirobhāvairāśāpāśaviceṣṭanaiḥ /
ahaṃ ciramahaṃkāradviṣā samavamoṣitaḥ

niśāyāmalpavīryātmā piśāceneva jaṅgale /
svayameva tvathedānīṃ kriyāśaktyā svayaiva hi

śauriṇā vyapadeśena vivekaśrīrvibodhitā /
prabuddhe bhavatīśāne tamahaṃkārarākṣasam

na paśyāmi nabhodīpe jvalite timiraṃ yathā /
tasyāhaṃkārayakṣasya manovivaravāsinaḥ

dīpasyeva praśāntasya na vedmi gatimīśvaraḥ /
dṛṣṭa eva tvayīśāne palāyanaparāyaṇaḥ

saṃpanno madahaṃkāraścoraḥ sūryodaye yathā /
asadabhyutthite tasminnahaṃkāre piśācavat

gate tiṣṭhāmyahaṃ svastho nirgonasa iva drumaḥ / /
śāmyāmi parinirvāmi jagatyasminprabodhavān

taskareṇojjhito'smīti nivṛrto'smi cirodayam /
śaityamabhyāgatosmyantaḥ śāntāśāmṛgatṛṣṇikaḥ

prāvṛḍambubharasnātaḥ śāntadāva ivācalaḥ /
pramārjitehamityasminpade svārthavicārataḥ

ko mohaḥ kāni duḥkhāni kāḥ kadāśāḥ ka ādhayaḥ /
narakasvargamokṣādibhramāḥ satyāmahaṃkṛtau

bhittāveva pravartante citrehā na nabhastale /
ahaṃkārakalāpitte citte jñānacamatkṛtiḥ /
na rājateṃ'śuke mlāne yathā kuṅkumarañjanā

nirahaṃkārajalade tṛṣṇāsāravivarjite /
bhāti cittaśaradvyomni svacchatā kāntiśālinī

nirahaṃkārapaṅkāya saṃprasannāntarāya ca /
mahyamānandasarase tubhyamātmannamo namaḥ

śāntendriyogragrāhāya kṣīṇacittaurvavahnaye /
ānandāmbudhaye tubhyaṃ mahyamātmannamo namaḥ

gatāhaṃkārameghāya śāntāśādāvavahnaye /
mahyamānandaśailāya vibhrāntāya namo namaḥ

praphullānandapadmāya śāntacintāmayormave /
mahyaṃ sanmānasāyātmaṃstubhyamantarnamo namaḥ

saṃvidābhāsapakṣāya padmakoṭaravāsine /
sarvamānasahaṃsāya svātmane'ntarnamo namaḥ

kalākalitarūpāya niṣkalāyāmṛtātmane /
sadoditāya pūrṇātman śaśine te namo namaḥ

sadoditāya śāntāya mahāhṛddhvāntahāriṇe /
sarvagāyāpyadṛśyāya citsūryāya namo namaḥ

asnehasnehadīpāya vṛttiniṣkrāntavartine /
svabhāvādhāradhīrāya ciddīpāya namo namaḥ

madanānalasaṃtapte śītena manasā manaḥ /
bhagnamantarmayā taptamayaseva balādayaḥ

indriyeṇendriyaṃ chittvā chittvā ca manasā manaḥ /
ahaṃkṛtimahaṃkṛtyā chittvā śeṣo jayāmyaham

bhāvenābhāvamācchidya hitvā tṛṣṇāmatṛṣṇayā /
niṣpiṣya prajñayā'prajñāṃ jño'jñaḥ satyosi te namaḥ

manasā manasi cchinne nirahaṃkāratāṃ gate /
bhāvena galite bhāve svacchastiṣṭhāmi kevalaḥ

nirbhāvaṃ nirahaṃkāraṃ nirmanaskamanīhitam /
kevalaṃ spandaśuddhātmanyeva tiṣṭhati me vapuḥ

helānukampitānantaviśveśādatiśāyinī /
paramopaśamopetā jāteyaṃ mama nirvṛtiḥ

praśāntamohavetālo gatāhaṃkārarākṣasaḥ /
kadāśārūpikonmukto jāto'smi vigatajvaraḥ

tṛṣṇārajjuguṇaṃ chittvā maccharīrakapañjarāt /
na jāne kva gatoḍḍīya durahaṃkṛtipakṣiṇī

uddhūlite ghanājñānakulāye kāyapādapāt /
na jāne gata uḍḍīya kvāhaṃbhāvavihaṃgamaḥ

durāśādīrghadaurātmyadhūsarā bhogabhasmanā /
bhayabhogihitā diṣṭyā bhūyasyo vāsanāḥ kṣatāḥ

etāvantamahaṃ kālaṃ ko'bhūvaṃ citramīdṛśam /
yenāhameṣa mithyaiva dṛḍhāhaṃkāratāṃ gataḥ

adyāhamasmi jāto'yamahamadya mahāmatiḥ /
ahaṃkāramahābhreṇa yatkṛṣṇenālamujjhitaḥ

dṛṣṭo'yamātmā bhagavāṃstathaivādhigato mayā /
ālabdhaścānubhūto'ṅgaṃ svānubhūtau niyojitaḥ

gatāspadaṃ gatamananaṃ gataiṣaṇaṃ
tiraskṛtaṃ nipuṇamahaṃkṛtibhramaiḥ /
nirīhitaṃ vyapagatarāgarañjanaṃ
vikautukaṃ praśamamidaṃ gataṃ manaḥ

duruttarāḥ samaviṣamā mahāpadaḥ
suduḥsahāḥ prabhavanadīrghadoṣadāḥ /
gatāḥ kṣayaṃ samadhigato maheśvara-
ścidadvayo'pagatamacittvamantare

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe brahmātmacintā nāma pañcatriṃśaḥ sargaḥ