Yoga Vasistha · Chapter 5.30

triṃśaḥ sargaḥ

śrīvasiṣṭha uvāca /
athemaṃ paramaṃ rāma vijñānābhigame kramam /
śrṛṇu daityeśvaraḥ siddhaḥ prahrādaḥ svātmanā yathā

āsītpātālakuhare vidrāvitasurāsuraḥ /
hiraṇyakaśipurnāma nārāyaṇaparākramaḥ

ākrāntabhuvanābhogaḥ sa jahāra harerjagat /
ṣaṭpadasya bṛhatpatraṃ rājahaṃsa ivāmbujam

cakāra jagatāṃ rājyaṃ samākrāntasurāsaraḥ /
dantī nirastahaṃsaugho nalinyāmalināmiva

athāsāvasurādhīśaḥ kurvaṃstribhuvaneśatām /
kālena suṣuve putrānaṅkurāniva mādhavaḥ

te'vardhantācireṇaiva tejasyūrjitabālakāḥ /
daśārkāṃśuśatānīva vyomākrāntivilāsinaḥ

prahrādanāmā balavānpradhānātmā babhūva ha /
teṣāṃ madhye mahārhāṇāṃ maṇīnāmiva kaustubhaḥ

tenārājata putreṇa hiraṇyakaśipurbhṛśam /
sarvasaundaryayuktena vasanteneva vatsaraḥ

atha putrasahāyo'sau balakośasamanvitaḥ /
ājagāma madaṃ daityastrigaṇḍagalitebhavat

tattāpākrāntitāpena trijaganti vikāsinā /
kalpāntasūryagaṇavannavayaiva karaśriyā

akhidyantāsya tenātha sūryendupramukhāḥ surāḥ /
durvilāsavilolasya bālasyeva svabandhavaḥ

prārthayāṃcakrire'thājaṃ daityendrebhapatervadhe /
na kṣamante mahāntopi paunaḥpunyena duṣkriyām

tataḥ pralayaparyastajagaddhargharajṛmbhitam /
digdantidaśanaprakhyanakhavajrādijṛmbhitam

sthiravidyullatājālabhāsuradvijamaṇḍalam /
daśadikkoṭarodbhāntajvalajjvalanakuṇḍalam

samastakulaśailendrapiṇḍapīṭhodbhaṭodaram /
dordrumādhūtanirdhūtasphuradbrahmāṇḍakharparam

vadanodaraniṣkrāntavātotsāritaparvatam /
trijagaddahanodyuktakopakalpāgnigarvitam

saṭāvikaṭapīnāṃsaspandapreritabhāskaram /
romakūpalasadvahnipuñjāpiñjaraparvatam

kulācalamahākuḍyaghaṭanodbhaṭadiktaṭam /
sarvāvayavaniṣkrāntapaṭṭiśaprāsatomaram

nārasiṃhaṃ vapuḥ kṛtvā mādhavo'hanmahāsuram /
lasatkaṭakaṭārāvaṃ turaṅgamamiva dvipaḥ

pauramāsuramudvāntaidadāhekṣaṇavahnibhiḥ /
sa sarvabhūtakalpānte jagajjālamivānalaḥ

nṛsiṃhamārute tasminbhṛśaṃ kṣobhamupāgate //
visphūrjitaghanāsphoṭairekārṇava ivākule

dudruvurdānavaughāste digjvalanmaśakā iva /
upāyayuradṛśyatvaṃ dīpā iva gatatviṣaḥ

atha vidrutadaityendraṃ dagdhāntaḥpuramaṇḍalam /
babhūva pātālatalaṃ kalpakṣuṇṇajagatsamam

akālakalpāntavidhau hatvā daityaṃ śanairvibhau /
kvāpi yāte samāśvastasurasaṃrambhapūjite

mṛtaśiṣṭā danusutāḥ prahrādaparipālitāḥ /
dagdhaṃ taṃ deśamājagmuḥ saraḥ śuṣkamivāṇḍajāḥ

tatra kālocitāṃ kṛtvā svanāśaparidevanām /
aurdhvadehikasatkāraṃ cakruḥ preteṣu bandhuṣu

hatabandhujanaṃ pluṣṭabandhubāndhavamaṇḍalam /
śanairāśvāsayāmāsurmṛtaśiṣṭaṃ svakaṃ janam

citrārpitopamadurākṛtayo nirīhā
dīnāśayā hi mahatāmburuhopamānāḥ /
śokopataptamanaso'suranāyakāste
dagdhadrumā iva nirastavikāramāsan

ityārṣe śrīvāsiṣṭhamahārāmāyaṇe vālmīkīye mo० upaśamaprakaraṇe prahlādaviśrāntau hiraṇyakaśipuvadho nāma triṃśaḥ sargaḥ