Yoga Vasistha · Chapter 5.31

śrīvasiṣṭha uvāca /
atha duḥkhaparītātmā hariṇā hatadānave /
prahlādaścintayāmāsa maunī pātālakoṭare

konvasmākamupāyaḥ syādya evehāsurāṅkuraḥ /
tīkṣṇāgro jāyate taṃ taṃ bhuṅkte śākhāmṛgo hariḥ

na kadācana pātāle daityā dordaṇḍaśālinaḥ /
sthirā babhūvurudbhinnāḥ padmā iva himācale

utpattyotpattya naśyanti bhāsurākāraghargharāḥ /
kṣīṇaprasphuritārambhāstaraṅgā iva vāridheḥ

sabāhyābhyantaraṃ kaṣṭaṃ samagrālokahāriṇaḥ /
ripavaḥ prauḍhimāyātā apūrvatimirabhramāḥ

tamaḥprapūrṇahṛdayāḥ saṃkucatpatrasaṃpadaḥ /
suhṛdaḥ khedamāyānti niśīthakamalākarāḥ

tātasya malinairnūnaṃ pādapīṭhopamardakaiḥ /
surairviṣaya ākrānto mṛgairiva mahāvanam

nirudyamā gataśrīkā dīnāḥ prakaṭitāśayāḥ /
bāndhavā na virājante padmāḥ pluṣṭadalā iva

sphurantyasuravīrāṇāṃ gṛheṣvaviratānilaiḥ /
dhūsarā bhasmanīhārā dhūpadhūmabharā iva

hṛtadvārakapāṭāsu daityāntaḥpurabhittiṣu /
prabhā marakatasyeva jātā navayavāṅkurāḥ

trilokīnābhinalinīmattebhā dānavā api /
devavaddainyamāyātāḥ kimasādhyamaho vidheḥ

manākcalati parṇe'pi dṛṣṭāribhayabhītayaḥ /
vadhvastrasyanti vidhvastā mṛgyo grāmagatā iva

āsurīkarṇapūrārtha phullā ratnagulucchakāḥ /
narasiṃhakarālūnāḥ sthāṇutāmāgatā drumāḥ

divyāmbaralatāpatrā ratnastabakadanturāḥ /
punarāropitāstatra nandane kalpapādapāḥ

purā tvamarabandīnāmasureḥ saṃstutaṃ mukham /
adya tvasurabandīnāṃ surairālokitaṃ mukham

manye dānamahānadyaḥ surebhakaṭabhittiṣu /
pravṛttāstā bhaviṣyanti śailasānuṣvivāpagāḥ

asmākamibhagaṇḍeṣu dānadāhavibhūtayaḥ /
lasanti marukhaṇḍeṣu saṃśuṣkeṣviva dhūlayaḥ

vikāsisitamandāramakarandāruṇānilāḥ /
te meruśikharaistulyā daityā durlabhatāṃ gatāḥ

suragandharvasundaryo dānavāntaḥpurocitāḥ /
adya merau sthitiṃ yātā mañjarya iva pādape

kaṣṭaṃ tāta puraṃdhrīṇā śuṣkāmburuhanīrasāḥ /
vilāsāḥ suranārībhirbhartsyante lāsyalīlayā

pūrvaṃ yaireva mattātaścāmarairupavījitaḥ /
sahasranayanaḥ svarge kaṣṭaṃ taireva vījyate

iyamasmākamapyāpadāgatā dainyadāyinī /
tasyaikasya prasādena duṣpauruṣagaterhareḥ

taddorvanaghanacchāyālabdhaviśrāntayaḥ surāḥ /
na kadācana tapyante himādreriva sānavaḥ

śauriśauryāgraśikharasaṃśrayeṇāśritaśriyaḥ /
asmānsamuparundhanti śunaḥ śākhāmṛgā iva

tenāsurapurandhrīṇāṃ nityaṃ maṇḍanamaṇḍane /
mukhapadme sthitaṃ bāṣpamabjinīnāṃ himaṃ yathā

śīrṇabhinnaluṭhadbhittirjagajjaraṭhamaṇḍapaḥ /
ayaṃ nīlamaṇistambhaistadbhujaireva dhāryate

sa dhartā surasainyasya majjato vipadarṇave /
kṣīrododaramagnasya mandarasyeva kacchapaḥ

ete tātādayaḥ sarve tenaivāsurasattamāḥ /
pātitāḥ kṣubdhakalpāntavāteneva kulācalāḥ

sa eka eva saṃhārakarmakṣamabhujānalaḥ /
surasārthaguruḥ śrīmānviṣamo madhusūdanaḥ

daityadordaṇḍaparaśostasya vīryeṇa vīryavān /
dānavānbādhate śakro bālakāniva markaṭaḥ

durjayaḥ puṇḍarīkākṣaḥ pravimuktāyudho'pi san /
nāsau śastrāstravicchedairvajrasāro vidīryate

abhyastā bahavastena mithaḥ preritaparvatāḥ /
bhīmāḥ samarasaṃrambhāḥ samamasmatpitāmahaḥ

tāsu tāsvatighorāsu vitatāsvatirājiṣu /
yo na bhīta idānīṃ sa bhayameṣyati kā kathā

upāyamekamevemaṃ harerākramaṇe sphuṭam /
manye tadvyatirekeṇa vidyate na pratikriyā

sarvātmanā sarvadhiyā sarvasaṃrambharaṃhasā /
sa eva śaraṇaṃ devo gatirastīha nānyathā

na tasmādadhikaḥ kaścidasti lokatrayāntare /
pralayasthitisargāṇāṃ hariḥ kāraṇatāṃ gataḥ

asmānnimeṣādārabhya nārāyaṇamajaṃ sadā /
saṃprapanno'smi sarvatra nārāyaṇamayo hyaham

namo nārāyaṇāyeti mantraḥ sarvārthasādhakaḥ /
nāpaiti mama hṛtkośādākāśādiva mārutaḥ

harirāśā harirvyoma harirurvī harirjagat /
ahaṃ harirameyātmā jāto viṣṇumayo hyaham

aviṣṇuḥ pūjayanviṣṇuṃ na pūjāphalabhāgbhavet /
viṣṇurbhūtvā yajedviṣṇumayaṃ viṣṇurahaṃ sthitaḥ

hariḥ prahrādanāmā yo matto nānyo hariḥ pṛthak /
iti niścayavānantarvyāpako'haṃ ca sarvataḥ

anantamidamākāśamāpūrya vinatāsutaḥ /
kanakāṅgo mamāṅgānāmayamāsanatāṃ gataḥ

karaśākhaikaviśrāntasarvahetivihaṃgamāḥ /
nakhāṃśumañjarīkīrṇā mahāmarakatadrumāḥ

ime te mṛdumandāradāmadigdhāṃsamaṇḍalāḥ /
mandarāghṛṣṭakeyūrāścatvāro mama bāhavaḥ

calacchaśikalāpūracārucāmaradhāriṇī /.
iyaṃ me pārśvagā lakṣmīḥ kṣīrodakuharotthitā

helāvilubdhabhuvanā trailokyatarumañjarī /
iyaṃ me pārśvagā kīrtiracalāmalabhāsinī

anāratajagajjālanavanirmāṇakāriṇī /
iyaṃ me pārśvagā māyā svendrajālavilāsinī

iyaṃ sā helayākrāntatrailokyatarukhaṇḍikā /
jayā sphurati me pārśve latā kalpataroriva

imau me nityaśītoṣṇau devau śītāṃśubhāskarau /
prakaṭīkṛtasaṃsārau mukhamadhye vilocane

mameyamutpalaśyāmā pīnāmbhodharasundarī /
śyāmīkṛtakakupcakrā dehadīptirvisarpiṇī

ayaṃ mama kare śaṅkhaḥ pāñcajanyaḥ sphuraddhvaniḥ /
mūrtaṃ khamiva śabdātmā kṣīroda iva saṃsthitaḥ

ayaṃ me karṇikākośanilīnabrahmaṣaṭpadaḥ /
padmaḥ karatale śrīmānsvanāḍīkuharodbhavaḥ

iyaṃ me ratnacitrāṅgī sumeruśikharopamā /
hemāṅgadā gadā gurvī daityadānavamardinī

ayaṃ me bhāskarākāra udyadaṃśuḥ sudarśanaḥ /
jvālājaṭilaparyantaparipāṭaladiktaṭaḥ

ayaṃ me ketumadvahnisundaro jvalito'sitaḥ /
kuṭhāro daityavṛkṣāṇāṃ nandayannandakaḥ sthitaḥ

idaṃ me śaradhārāṇāṃ puṣkarāvartakopamam /
śārṅgaṃ dhanurahīndrābhamindrakārmukasundaram

imānyahamanantāni jaganti jaṭhare ciram /
bibharmi jātanaṣṭāni vartamānānyanekaśaḥ

imau mahī me caraṇāvidaṃ me gaganaṃ śiraḥ /
idaṃ vapurme trijagadime me kukṣayo diśaḥ

sākṣādayamahaṃ viṣṇurnīlameghodaradyutiḥ /
suparṇaparvatārūḍhaḥ śaṅkhacakragadādharaḥ

ete mattaḥ palāyante samagrā duṣṭacetasaḥ /
tārṇāstaralasaṃcārāḥ pavanādiva rāśayaḥ

ayaṃ nīlotpalaśyāmaḥ pītavāsā gadādharaḥ /
lakṣmīvāngaruḍārūḍhaḥ svayamevāhamacyutaḥ

ko māmeti viruddhātmā trailokyadahanakṣamam /
svanāśāya tataḥ kṣubdhaṃ kālāgniṃ śalabho yathā

ime me taijasīṃ sṛṣṭiṃ mamāgrasthāḥ surāsurāḥ /
na śaknuvanti saṃroddhuṃ cakṣurmandāḥ prabhā iva

imaṃ māmīśvaraṃ viṣṇuṃ brahmendrāgniharādayaḥ /
stuvantyanantayā vācā bahuvaktrasamutthayā

ayaṃ vijṛmbhitaiśvaryo jāto'hamajitākṛtiḥ /
sarvadvandvapadātīto mahimnā parameṇa hi

tribhuvanabhavanodaraikamūrti prasabhavibhinnasamastaduṣṭasattvam /
ghanagiritṛṇakānanāntarasthaṃ sakalabhayāpaharaṃ vapuḥ praṇaumi

ityārṣe śrīvāsiṣṭhamahārāmāyaṇe vālmīkīye de० mokṣo० upaśamaprakaraṇe prahlādanirvāṇe nārāyaṇīkaraṇaṃ nāmaikatriṃśaḥ sargaḥ