Yoga Vasistha · Chapter 5.27

saptaviṃśaḥ sargaḥ

śrīvasiṣṭha uvāca /
surāsurasabhājyeṣṭhe tasminbhṛgusute gate /
manasā cintayāmāsa balirbuddhimatāṃ varaḥ

yuktamuktaṃ bhagavatā cidevedaṃ jagattrayam /
cidahaṃ cidime lokāścidāśāścidiyaṃ kriyā

sabāhyābhyantaraṃ sarvaṃ cideva paramārthataḥ /
asti cidvyatirekeṇa neha kiṃcana kutracit

ayamāditya ityarko na citā yadi cetyate /
tadarkatamasorbhedaḥ ka ihevopalabhyate

iyaṃ bhūriti bhūreṣā citā yadi na cetyate /
bhūmeḥ kiṃ nāma bhūmitvaṃ tadbhavye bhavyatāṃ gatam

imā diśo diśa iti cetyante na citā yadi /
tatkiṃ nāma diśāṃ diktvaṃ śailānāṃ cāpi kādritā

idaṃ jagajjagaditi citā yadi na cetyate /
tatkiṃ jagattvaṃ jagato nabhastvaṃ nabhaso'tha kim

kāyo'yaṃ parvatākāraścitā yadi na cetyate /
tatkiṃ nāma śarīratvaṃ śarīrasya śarīriṇām

cidindriyāṇi citkāyaścinmanaścittadeṣaṇā /
cidantaścidbahiścitkhaṃ cidbhāvāścidbhavasthitiḥ

citaivainamahaṃ sarvaṃ sparśanaiṣaṇapūrvakam /
karomi mātrāsaṃsparśaṃ śarīreṇa na kiṃcana

kimanena śarīreṇa kāṣṭhaloṣṭasamena me /
aśeṣajagadekātmā cidahaṃ cetanātmakaḥ

ahaṃ cidambare bhānāvahaṃ cidbhūtapañjare /
surāsureṣu cidahaṃ sthāvareṣu careṣu ca

cidastīha dvitīyā hi kalpanaiva na vidyate /
dvitvasyāsaṃbhavālloke kaḥ śatruḥ kaśca vā suhṛt

balināmnaḥ śarīrasya cchinne śirasi bhāsure /
citaḥ kiṃ tadbhavecchinnaṃ sarvalokāvapūraṇāt

citā saṃcetito dveṣo dveṣo bhavati nānyathā /
tasmāddveṣādayaḥ sarve bhāvābhāvāścidātmakāḥ

na cito vyatirekeṇa pravicāryāpi kiṃcana /
āsādyate kila sphārādasmāttribhuvanodarāt

na dveṣo'sti na rāgo'sti na mano nāsya vṛttayaḥ /
cinmātrasyātiśuddhasya vikalpakalanā kutaḥ

cidahaṃ sarvago vyāpī nityānandamayātmakaḥ /
vikalpakalanātīto dvitīyāṃśavivarjitaḥ

citaściditi yannāma nirnāmāyā na nāma tat /
śabdātmikaiṣā cicchaktiḥ parisphurati sarvagā

dṛśyadarśananirmuktakevalāmalarūpavān /
nityodito nirābhāso draṣṭāsmi parameśvaraḥ

kalpanāvikalākāraḥ kālakāntakalāmayaḥ /
ābhāsamātramudito nityābhāsavivarjitaḥ

bhārūpaikasvarūpe'sminsvarūpeṇa jayāmyaham /
cetyarañjanariktāya vimuktāya mahātmane

pratyakcetanarūpāya svarūpāya namo'stu te /
citaye cetyamuktāya yuktyā yuktāya yogyayā

sarvāvabhāsadīpāya mahyameva namo'stu te /
cetyanirmuktacidrūpaṃ viṣvagviśvāvapūrakam

saṃśāntasarvasaṃvedyaṃ saccinmātramahaṃ mahat /
ākāśavadananto'hamapyaṇoraṇurātataḥ

nāsādayanti māmetāḥ sukhaduḥkhadaśā dṛśaḥ /
saṃvedanamasaṃvedyamacetyaṃ cetanaṃ tatam

na śaktā māṃ paricchettuṃ bhāvābhāvā jagadgatāḥ /
atha caite jagadbhāvāḥ paricchindantu māmimam

yathābhimatamevaite matto na vyatirekiṇaḥ /
yadi svabhāvabhūtena vastunā vastu nīyate

hriyate dīyate vāpi tatkiṃ kasya kila kṣatam /
sarvadā sarvamevāhaṃ sarvakṛtsarvasaṃgataḥ

cetyamasmyahamevaitanna kiṃcidapi coditam /
kiṃ saṃkalpavikalpābhyāṃ citaṃ cidiyamekikā

saṃkṣobhayāmyahaṃ tāvacchāmyāmyātmani pāvane /
iti saṃcintayanneva baliḥ paramakovidaḥ

oṃkārādardhamātrārthaṃ bhāvayanmaunamāsthitaḥ /
saṃśāntasarvasaṃkalpaḥ praśāntakalanāgaṇaḥ

niḥśaṅkamapi dūrāstacetyacintakacintanaḥ /
dhyātṛdhyeyadhyānahīno nirmalaḥ śāntavāsanaḥ

babhūvāvātadīpābho baliḥ prāptamahāpadaḥ /
upaśāntamanāstatra ratnavātāyane baliḥ /
avasadbahukālaṃ sa samutkīrṇa ivopale

praśamitaiṣaṇayā paripūrṇayā
mananadoṣadaśojjhitayaitayā /
balirarājata nirmalasattayā
vighanamacchatayeva śarannabhaḥ

ityārṣe śrīvāsiṣṭhamahārāmāyaṇe vālmīkīye devadūtokte mo० upaśamaprakaraṇe baliviśrāntirnāma saptaviṃśaḥ sargaḥ