Yoga Vasistha · Chapter 5.26

ṣaḍviṃśaḥ sargaḥ

śrīvasiṣṭha uvāca /
iti saṃcintya balavānbalirāmīlitekṣaṇaḥ /
dadhyau kamalapatrākṣaṃ śukramākāśamandiram

sarvasthaṃ cintayānaṃ tu nityadhyāno'tha bhārgavaḥ /
cetaḥsthaṃ jñātavān śiṣyaṃ baliṃ gurvarthinaṃ pure

atha sarvagatānantacidātmā bhārgavaḥ prabhuḥ /
ānināya sa dehaṃ svaṃ ratnavātāyanaṃ baleḥ

gurudehaprabhājālaparimṛṣṭatanurbaliḥ /
bubudhe prātararkāṃśusaṃbodhitamivāmbujam

tatra ratnārghyadānena mandārakusumotkaraiḥ /
pādābhivandanairenaṃ pūjayāmāsa bhārgavam

ratnārghyaparipūrṇāṅgaṃ kṛtamandāraśekharam /
mahārhāsanaviśrāntamathovāca guruṃ baliḥ

baliruvāca /
bhagavaṃstvatprasādotthā pratibheyaṃ purastava /
niyojayati māṃ vaktuṃ kāryaṃ kartumivārkabhāḥ

bhogānprati virakto'smi mahāsaṃmohadāyinaḥ /
tattattvaṃ jñātumicchāmi mahāsaṃmohahāri yat

kiyanmātramidaṃ bhogajālaṃ kimayameva vā /
ko'haṃ kastvaṃ kimete vā lokā iti vadāśu me

śukra uvāca /
bahunātra kimuktena khaṃ gantuṃ yatnavānaham /
sarvadānavarājendra sāraṃ saṃkṣepataḥ śṛṇu

cidihāsti hi cinmātramidaṃ cinmayameva ca /
cittvaṃ cidahamete ca lokāściditi saṃgrahaḥ

bhavyo'si cettadetasmātsarvamāpnoṣi niścayāt /
no cettadvahvapi proktaṃ tvayi bhasmani hūyate

ciccetyakalanābandhastanmuktirmuktirucyate /
cidacetyākhilātmeti sarvasiddhāntasaṃgrahaḥ

enaṃ niścayamādāya vilokayasi helayā /
svayamevātmanātmānamanantaṃ padamāpsyasi

khaṃ vrajāmyahamatraiva munayaḥ sapta saṃgatāḥ /
kenāpi surakāryeṇa vastavyaṃ tatra vai mayā

rājanyāvadayaṃ dehastāvanmuktadhiyāmapi /
yathāprāptakriyātyāgo rocate na svabhāvataḥ

iti kathitavatātha bhārgaveṇa
sphuṭajalarāśipathā mahājavena /
plutamaliśabale nabhontarāle
taralataraṅgavadākule grahaughaiḥ

ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe balyupadeśayogo nāma ṣaḍviṃśaḥ sargaḥ