Yoga Vasistha · Chapter 5.22

dvāviṃśaḥ sargaḥ

śrīvasiṣṭha uvāca /
athavā raghuvaṃśākhyanabhaḥpūrṇaniśākara /
balivadbuddhibhedena jñānamāsādayāmalam

śrīrāma uvāca /
bhagavansarvadharmajña tvatprasādānmayā hṛdi /
prāptaṃ prāptavyamakhilaṃ viśrāntaṃ cāmale pade

śaradīvāmbarādabhramadabhraṃ mama cetasaḥ /
vibho vyapagataṃ sarvaṃ tṛṣṇākhyaṃ tanmahātamaḥ

amṛtāpūritaḥ svasthaḥ śītalātmā mahādyutiḥ /
tiṣṭhāmyānandavānantaḥ sāyaṃ pūrṇaṃ ivoḍurāṭ

aśeṣasaṃśayāmbhodaśaratsamaya kiṃtvaham /
tṛptimeṣāṃ na gacchāmi vacasāṃ vadatastava

balervijñānasaṃprāptiṃ punarmadbodhavṛddhaye /
vibho kathaya khidyante santo nāvanataṃ prati

śrīvasiṣṭha uvāca /
śrṛṇu rāghava te vakṣye balervṛttāntamuttamam /
śrutena yena taṃ tattvabodhaṃ prāpsyasi śāśvatam

astyasmiñjagataḥ kośe kasmiṃściddiṅnikuñjake /
pātālamiti vikhyāto loko bhūmeradhaḥ sthitaḥ

kṣīrodārṇavajātābhirdiradhābhiramṛtāṃśubhiḥ /
kvaciddānavakanyābhirbhāti nirvivarāntaraḥ

jihvāgaṇoddāmaravairvilolarasanāyugaiḥ /
kvacidbhogibhirāpūrṇaḥ sahasraśatamastakaiḥ

dehādrivalitāśeṣaviśvoddharaṇaghasmaraiḥ /
kvaciddanusutairvyāptaścaladbhiriva merubhiḥ

kumbhakūṭāgraviśrāntavasudhāmaṇḍalodaraiḥ /
kvaciddigdantibhirdantadrumādribhirupāśritaḥ

mahākaṭakaṭāśabdatrastabhūtaparamparaiḥ /
kvaciddurgandhabhūtābhairadhonārakamaṇḍalaiḥ

ābhūtalamabhiprotasaptapātālamaṇḍalaiḥ /
kvacidratnākarairvyāptaḥ pātālairvivarairiva

surāsuraśiraḥsuptapādāmbhoruhapāṃsunā /
kvacidbhagavatā tena kapilena pavitritaḥ

āsurīsaṃbhṛtānantapūjanakrīḍanaiṣiṇā /
kvacidbhagavatā tena hāṭakeśena pālitaḥ

tasminnasuradostambhadhāryamāṇamahābhare /
babhūva dānavo rājā virocanasuto baliḥ

sākrandena samaṃ sarvaiḥ suravidyādharoragaiḥ /
pādasaṃvāhanaṃ yasya surarājena vāñchitam

kośastrailokyaratnānāṃ pātā sarvaśarīriṇām /
dhartā bhuvanadhartṛṇāṃ yasya pālayitā hariḥ

airāvaṇasya saṃśoṣaṃ yannāmnā kaṭabhittayaḥ /
kekayevāhihṛnnāḍyo jagmurājagmurārtatām

pratāpogroṣmabhiryasya kalpakāla ivābdhayaḥ /
yayuḥ śoṣonmukhāḥ sapta saptatāṃ kupitākṛteḥ

yadadhvarāgryadhūmābhrarājayo valitābdhayaḥ /
brahmāṇḍakoṭarasyāsya sadā kavacatāṃ yayuḥ

yasya dṛṣṭidṛḍhāghātanunnādhārakulācalāḥ /
vinamanti diśaḥ sarvā latāḥ phalanatā iva

līlāvijitaniḥśeṣabhuvanābhogabhūṣaṇaḥ /
daśakoṭīḥ sa varṣāṇi daityo rājyaṃ cakāra ha

atha gacchatsvanalpeṣu yugeṣvāvartavṛttiṣu /
surāsuramahaugheṣu protpatatsu patatsu ca

ajasramatibhukteṣu trailokyodāravṛttiṣu /
bhogeṣvabhajadudvegaṃ balirdānavanāyakaḥ

meruśrṛṅgaśikhāratnakṛtavātāyanasthitaḥ /
ekadā cintayāmāsa svayaṃ saṃsārasaṃsthitim

kiyantamidamakṣuṇṇaśaktinaiva mayādhunā /
sāmrājyamiha kartavyaṃ vihartavyaṃ jagattraye

mahatā mama rāṣṭreṇa trailokyādbhutakāriṇā /
kiṃ vā bhavati bhuktena bhūribhogātihāriṇā

āpātamātramadhuramāvaśyakaparikṣayam /
bhogopabhogamātraṃ me kiṃ nāmedaṃ sukhāvaham

punardinaikakalanāśarvarīsaṃsthitiḥ punaḥ /
punastānyeva karmāṇi lajjāyai naca tuṣṭaye

punarāliṅgyate kāntā punareva ca bhujyate /
seyaṃ śiśujanakrīḍā lajjāyai mahatāmiha

tameva bhuktavirasaṃ vyāpāraughaṃ punaḥpunaḥ /
divase divase kurvanprājñaḥ kasmānna lajjate

punardinaṃ punā rātriḥ punaḥ kāryaparamparāḥ /
punaḥpunarahaṃ manye prājñasyeyaṃ viḍambanā

ūrmitāṃ punarāsādya punareti nirūrmitām /
yathā jalaṃ tathaivāyaṃ tāṃ tāmeti kriyāṃ janaḥ

unmattaceṣṭitākārā punaḥpunariyaṃ kriyā /
janaṃ hāsayate prājñaṃ bālalīlopamā muhuḥ

kṛtayāpyanayā nityaṃ kriyayā kṛtakāryayā /
ko'rthaḥ syāttādṛśo yena punaḥ karma na vidyate

kiyantamathavā kālamidamāḍamvaraṃ mahat /
ihāsmābhiranuṣṭheyaṃ kiṃ tāvatsamavāpyate

ananteyaṃ śiśukrīḍā vastuśūnyaiva vastutaḥ /
āvṛttyā kriyate vyarthamanarthaprasarārthibhiḥ

phalamekaṃ mahodāraṃ neha paśyāmi kiṃcana /
kāryamastītaratprāpte yasminnāma na kiṃcana

bhogādṛte kimanyatsyāttadbhavyamavināśi yat /
evaṃ saṃcintayāmyāśu dadhyau matvetyasau baliḥ

athābhyuvācāsurarāḍāḥ saṃsmṛtamiti kṣaṇāt /
svātmanyeva manasyarthaṃ sabhrūbhaṅgaṃ vimarśayan

purā kileha bhagavānpṛṣṭo'bhūtsa virocanaḥ /
pitā mayātmatattvajño dṛṣṭalokaparāvaraḥ

yathā sakaladuḥkhānāṃ sukhānāṃ ca mahāmate /
yatra sarve bhramāḥ śāntāḥ ko'sau sīmānta ucyate

kopaśānto manomohaḥ kvātītāḥ sakalaiṣaṇāḥ /
virāmarahitaṃ kutra tāta viśramaṇaṃ ciram

kiṃ prāpteha samastebhyaḥ prāpye'smiṃstṛptimānpumān /
kiṃ dṛṣṭvā darśanaṃ bhūyo na tātopakarotyalam

atyantabahavo'pyete bhogā hi na sukhāvahāḥ /
kṣobhayanti mano mohe pātayanti satāmapi

tattātāvihatānandasundaraṃ kiṃcideva me /
tādṛkkathaya yatrasthaściraṃ viśrāntimemyaham

ityākarṇya purā niśākarakaraspardhālugucchaskhala-
tpuṣpāpūrakṛtāvaguṇṭhanapadasyoktaṃ tale tena me /
pitrā svargahṛtasya sāgarataroḥ saṃropitasyājire
sphārākārarasāyanāsavasamaṃ saṃmohaśāntyai vacaḥ //
ityārṣe śrīvāsiṣṭhamahārāmāyaṇe vālmīkīye de० mokṣopāyeṣūpaśamaprakaraṇe virocanasmaraṇaṃ nāma dvāviṃśaḥ sargaḥ