Yoga Vasistha · Chapter 5.10

daśamaḥ sargaḥ

śrīvasiṣṭha uvāca /
iti cintayatastasya puraḥ saṃpraviveśa ha /
pratīhāraḥ paro bhānoḥ syandanāgra ivāruṇaḥ

pratīhāra uvāca /
deva doḥstambhaviśrāntasamastavasudhābhara /
saṃpādayottiṣṭha dinavyāpāraṃ nṛpatocitam

etāḥ kusumakarpūrakuṅkumāmbughaṭāḥ striyaḥ /
snānabhūmau sthitāḥ sajjā nadyo mūrtiyutā iva

etāḥ kamalakahlārakānanabhrāntaṣaṭpadāḥ /
kṛtāḥ kamalinīpāśaracitāṃśukamaṇḍapāḥ

etāḥ kamalinītīrabhuvaśchatraiḥ prapūritāḥ /
sacāmararathebhāśvaiḥ snānāvasarasevinām

samagrasumanaḥpūrṇairannauṣadhipūriplutaiḥ /
sajjīkṛtāḥ paṭalakairdevārcanagṛhāstathā

snātaḥ pavitrahastaśca parijapyāghamarṣaṇaḥ /
tvāmeva prekṣate deva dakṣiṇārho dvijavrajaḥ

lasaccāmarahastābhiḥ pālyate parameśvara /
sajjīkṛtāste kāntābhiḥ śītā bhojanabhūmayaḥ

śīghramuttiṣṭha bhadraṃ te niyataṃ kāryamācara /
na kālamativartante mahāntaḥ sveṣu karmasu

pratīhārapatāvitthamuktavatyatha pārthivaḥ /
tathaiva cintayāmāsa citrāṃ saṃsārasaṃsthitim

kiyanmātramidaṃ nāma rājyaṃ sukhamiti sthitam /
na prayojanametena mameha kṣaṇabhaṅginā

sarvameva parityajya mithyāśambaraḍambaram /
ekānta eva tiṣṭhāmi saṃśānta iva vāridhiḥ

alamebhirasatprāyairmama bhogavijṛmbhitaiḥ /
tyaktvā sarvāṇi karmāṇi sukhaṃ tiṣṭhāmi kevalam

citta cāturyametasmādbhogābhyāsakusaṃbhramāt/
tyaja janmajarājāḍyajālajambālaśāntaye

daśāsu svāsu yāsveva saṃbhramaṃ citta paśyasi /
tābhya evābhiracitaṃ paramaṃ duḥkhameṣyasi

pravṛttaṃ sannivṛttaṃ sadbhūyobhūyaściraṃciram /
bhogabhūmiṣu sarvāsu cittaṃ tṛptiṃ na gacchati

tasmātpāpālamanayā tucchayā bhogacintayā /
bhavatyakṛtrimā tṛptiryenābhipata taṃ tataḥ

iti saṃcintya janakastūṣṇīmeva babhūva ha /
śāntacāpalacetastvāllipikarmārpitopamaḥ

pratīhāro'pi novāca gauraveṇa bhayena ca /
punarvākyaṃ mahīpānāṃ cittavṛttiṣu śikṣitaḥ

tūṣṇīmatha kṣaṇaṃ sthitvā janako janajīvitam /
punaḥ saṃcintayāmāsa manasā śamaśālinā

kimupādeyamastīha yatnātsaṃsādhayāmyaham /
kasminvastuni badhnāmi dhṛtiṃ nāśavivarjite

kiṃ me kriyāparatayā kiṃ me niṣkriyayāpi vā /
na tadasti vināśena varjitaṃ yatkiloditam

kriyāvānakriyo vāstu kāyo'yamasadutthitaḥ /
samasthitasya śuddhasya citaḥ kā nāma me kṣatiḥ

nābhivāñchāmyasaṃprāptaṃ saṃprāptaṃ na tyajāmyaham /
svastha ātmani tiṣṭhāmi yanmamāsti tadastu me

na mameha kṛtenārtho nākṛteneha kaścana /
kriyayā'kriyayā vāpi yatprāptaṃ tadasanmayam

akurvataḥ kurvato vā yuktāyuktāḥ kriyā mama /
nābhivāñchitamastīha yadupādeyatāṃ gatam

tadutthāya kramaprāptāṃ kāyo'yaṃ prakṛtāṃ kriyām /
karotvaspanditāṅgastu kimayaṃ sādhu śuṣyati

sthite manasi niṣkāme same vigatarañjane /
kāyāvayavajau kāryau spandāspandau phale samau

karmajāsu phalaśrīṣu manasā kartṛbhoktṛte /
tasminpraśāntimāyāte kṛtamapyakṛtaṃ nṛṇām

yo niścayo'ntaḥ puruṣasya rūḍhaḥ
kriyāsvasau tanmayatāmupaiti /
anāmayaṃ me padamāhatā dhī-
radhīratāmantaralaṃ tyajāmi

ityārṣe śrīvāsiṣṭhamahārāmāyaṇe vālmīkīye de० mokṣopāye upaśamaprakaraṇe janakaniścayo nāma daśamaḥ sargaḥ