Yoga Vasistha · Chapter 4.6

ṣaṣṭhaḥ sargaḥ

śrīvasiṣṭha uvāca /
atha tāṃ manasā dhyāyaṃstatraivāmīlitekṣaṇaḥ /
ārabdhavānmanorājyamidamekaḥ kilośanā

eṣā hi lalanā vyomni sahasranayanālaye /
saṃprāpto'yamahaṃ svargamālolasurasundaram

ime te mṛdumandārakusumottaṃsasundarāḥ /
dravatkanakaniṣyandavilāsivapuṣaḥ surāḥ

imāstā locanollāsadṛṣṭanīlābjadṛṣṭayaḥ /
mugdhahāsavilāsinyaḥ kāntā hariṇadṛṣṭayaḥ

ime te kausumodyotā anyonyapratibimbitāḥ /
viśvarūpopamākārā maruto mattakāśinaḥ

airāvaṇakaṭāmodaviraktamadhupaśrutāḥ /
imāstāḥ kākalīgītā gīrvāṇagaṇagītayaḥ

iyaṃ sā kanakāmbhojacaladvairiñcasārasā /
mandākinītaṭodyānaviśrāntasuranāyakā

ete te yamacandrendrasūryānalajalānilāḥ /
lokapālāstanudyotakīrṇadīptānalārciṣaḥ

ayaṃ sa raṇavṛttāntahetikaṇḍūyitānanaḥ /
airāvaṇo raṇe dantaprotadaityendramaṇḍalaḥ

ime te bhūtalasthānādvyomni tārakatāṃ gatāḥ /
vaimānikāścaraccārucāmīkaramayātapāḥ

merūṣalatalāsphālasīkarākīrṇadevatāḥ /
etāstāḥ kīrṇamandārā gaṅgāsalilavīcayaḥ

etāḥ prasṛtamandāramañjarīpuñjapiñjarāḥ /
dolālolāpsaraḥśreṇyaḥ śakropavanavīthayaḥ

ime te kundamandāramakarandasugandhayaḥ /
candrāṃśunikarākārāḥ pārijātasamīraṇāḥ

puṣpakesaranīhārapaṭavāsaraṇotsukaiḥ /
latāṅganāgaṇairvyāptamidaṃ tannandanaṃ vanam

kāntagītaravānandapranartitasurāṅganau /
imau tau vallakīsnigdhasvarau nāradatumburū

ime te puṇyakartāro bhūribhūṣaṇabhūṣitāḥ /
vyomanyuḍḍīyamāneṣu vimāneṣu ca saṃsthitāḥ

madamanmathamattāṅgya imāstāḥ surayoṣitaḥ /
deveśvaraṃ niṣevante vanaṃ vanalatā iva

indrāśmajālakusumāścintāmaṇigulucchakāḥ /
kalpavṛkṣā ime pakvaphalastabakadanturāḥ

iha tāvadimaṃ śakramahamāsanasaṃsthitam /
dvitīyamiva trailokyasraṣṭāramabhivādaye

iti saṃcintya śukreṇa manasaiva śacīpatiḥ /
tenābhivāditastatra dvitīya iva khe bhṛguḥ

atha sādaramutthāya śukraḥ śakreṇa pūjitaḥ /
gṛhītahasta ānīya samīpamupaveśitaḥ

dhanyastvadāgame nātha svargo'yaṃ śukra śobhate /
uṣyatāṃ cirameveha śakra itthamuvāca tam

atha tatropaviśyāsau bhārgavaḥ śobhitānanaḥ /
śriyaṃ jahāra śaśinaḥ sakalasyāmalasya ca

sakalasuragaṇābhivandito'sau
bhṛgutanayaḥ śatamanyupārśvasaṃsthaḥ /
cirataramatulāmavāpa tuṣṭiṃ
narapatisattamalālanaṃ babhūva

ityārṣe śrīvāsiṣṭhamahārāmāyaṇe vā० mo० sthitiprakaraṇe bhārgavopākhyāne bhārgavamanorājyaṃ nāma ṣaṣṭhaḥ sargaḥ