Yoga Vasistha · Chapter 4.7

saptamaḥ sargaḥ

śrīvasiṣṭha uvāca /
iti śukraḥ puraṃ prāpya vaibudhaṃ svena tejasā /
visasmāra nijaṃ bhāvaṃ prāktanaṃ vyasanaṃ vinā

muhūrtamiva viśramya tasya pārśve śacīpateḥ /
svargaṃ vihartumuttasthau svargābhiparimoditaḥ

svaḥśriyaṃ sa samālokya lolalocanavāñchitām /
straiṇaṃ draṣṭuṃ jagāmāsau nalinīmiva sārasaḥ

tatra tāṃ mṛgaśāvākṣīṃ kāntāmadhyagatāmasau /
dadarśa vipināntasthāṃ bhṛguścūtalatāmiva

sāpi taṃ bhārgavaṃ rāma dṛṣṭvā paravaśābhavat /
tāmālokya lasallolavilāsavalitākṛtim

āsīdvilīyamānāṅgo jyotsnāmindumaṇiryathā /
vilīyamānasarvāṅgastāmavaikṣata kāminīm

candrakānta iva jyotsnāṃ śītalāṃ khe vilāsinīm /
tenāvalokitā sāpi tatparāyaṇatāṃ gatā

niśānte cakravākena kānteva parikūjitā /
rasādvikasitā nūnamanyonyamanuraktayoḥ

prātararkanalinyoryā śobhā saiva tayorabhūt /
saṃkalpitārthadāyitvāddeśasyābhūcca tena sā

sarvāṅgaṃ vivaśīkṛtya kāmāyaiva samarpitā /
petuḥ smaraśarāstasyā mṛduṣvaṅgeṣu bhūriśaḥ

palāśeṣviva padminyā dhārā iva payomucaḥ /
sā babhūvasmarodbhūtā lolālivalayākulā

mandavātābhinunnāyā mañjaryāḥ sahadharmiṇī /
nīlanīrajanetrāntāṃ haṃsasārasagāminīm

madanaḥ kṣobhayāmāsa gajaḥ kamalinīmiva /
atha tāṃ tādṛśīṃ dṛṣṭvā śukraḥ saṃkalpitārthabhāk

tamaḥ saṃkalpayāmāsa saṃhāra iva bhūtabhuk /
triviṣṭapasya deśo'sau babhūva timirākulaḥ

bhūlokasyāndhatamasā lokālokataṭo yathā /
lajjāndhakāratīkṣṇāṃśau tasmiṃstimiramaṇḍale

pratiṣṭhāmāgate tasya mithunasyeva maṇḍale /
teṣu sarveṣu bhūteṣu gateṣvabhimatāṃ diśam

tasmātpradeśādbhūloke dinānte vihageṣviva /
sā dīrghacañcalāpāṅgī pravṛddhamadanavyathā

ājagāma bhṛgoḥ putraṃ mayūrī vāridaṃ yathā /
dhavalāgāramadhyasthe paryaṅke parikalpite

viveśa bhārgavastatra kṣīroda iva mādhavaḥ /
sā karāvavalambyāsya viveśāvanatānanā

rarāja ca surebhasya hṛdi lagneva padminī /
uvāca cedaṃ madhuraṃ rasasnehāktayā girā

vaco madhuramānandavilāsavalitākṣaram /
paśyāmalenduvadanamaṇḍalīkṛtakārmukaḥ

abalāmanubadhnāti māmeṣa kila nāṅgakaḥ /
pāhi māmabalāṃ nātha dīnāṃ tvaccharaṇāmiha

kṛpaṇāśvāsanaṃ sādho viddhi saccaritavratam /
snehadṛṣṭimajānadbhirmūḍhaireva mahāmate

praṇayā avagaṇyante na rasajñaiḥ kadācana /
aśaṅkitopasaṃpannaḥ praṇayo'nyonyaraktayoḥ

adhaḥkaroti niṣyandaṃ candramāhlādanaṃ priya /
na tathā sukhayatyeṣā cetastribhuvaneśitā

yathā parasparānandaḥ snehaḥ prathamaraktayoḥ /
tvatpādasparśaneneyaṃ samāśvastāsmi mānada

candrapādaparāmṛṣṭā yathā niśi kumudvatī /
saṃsparśāmṛtapānena tava jīvāmi sundara

candrāṃśurasapānena cakorī capalā yathā /
māmimāṃ caraṇālīnāṃ bhramarīṃ karapallavaiḥ

āliṅgyāmṛtasaṃpūrṇe svapadmahṛdaye kuru /
ityuktvā puṣpamṛdvaṅgī sā tasya patitorasi /
vyāghūrṇitālinayanā sutaroriva mañjarī

tau dampatī tatra vilāsakāntī
viveśatustāsu vanasthalīṣu /
kiñjalkagaurānilaghūrṇitāsu
raktau dvirephāviva padminīṣu

ityārṣe śrīvāsiṣṭhamahārāmāyaṇe vā० mo० sthitiprakaraṇe bhārgavopākhyāne navasaṃgamo nāma saptamaḥ sargaḥ