Yoga Vasistha · Chapter 4.5

pañcamaḥ sargaḥ

śrīrāma uvāca /
bhagavansarvadharmajña pūrvāparavidāṃ vara /
ayaṃ manasi saṃsāraḥ sphāraḥ kathamiva sthitaḥ

yathāyaṃ manasi sphāraḥ saṃsāraḥ sphurati sphuran /
dṛṣṭāntadṛṣṭyā sphuṭayā tathā kathaya me'nagha

śrīvasiṣṭha uvāca /
yathaindavānāṃ viprāṇāṃ jagantyavapuṣāmapi /
sthitāni jātadārḍhyāni manasīdaṃ tathā sthitam

lavaṇasya yathā rājñaścendrajālākulākṛteḥ /
caṇḍālatvamanuprāptaṃ tathedaṃ manasi sthitam

bhārgavasya ciraṃ kālaṃ svargabhogabubhukṣayā /
yathā bhogādhināthatvaṃ saṃsāritvaṃ babhūva ca

bhogeśvaratvaṃ ca yathā tathedaṃ manasi sthitam /
śrīrāma uvāca /
bhagavanbhṛguputrasya svargabhogabubhukṣayā

kathaṃ bhogādhināthatvaṃ saṃsāritvaṃ babhūva ca /
śrīvasiṣṭha uvāca /
śrṛṇu rāma purā vṛttaṃ saṃvādaṃ bhṛgukālayoḥ

sānau mandaraśailasya tamālaviṭapākule /
purā mandaraśailasya sānau kusumasaṃkule

atapyata tapo ghoraṃ kasmiṃścidbhagavānbhṛguḥ /
tamupāste sma tejasvī bālaḥ putro mahāmatiḥ

śukraḥ sakalacandrābhaḥ prakāśa iva bhāsuraḥ /
bhṛgurvanavare tasminsamādhāveva saṃsthitaḥ

sarvakālaṃ samutkīrṇo vanopalatalādiva /
śukraḥ kusumaśayyāsu kaladhautājireṣu ca

mandaroddāmadolāsu bālo ramaṇalīlayā /
vidyāvidyādṛśormadhye śukraḥ prāptamahāpadaḥ

triśaṅkuriva rodontaravartata tadākulaḥ /
nirvikalpasamādhisthe sa kadācitpitaryatha

avyagro'bhavadekānte jitāririva bhūmipaḥ /
dadarśāpsarasaṃ tatra gacchantīṃ nabhasaḥ pathā

kṣīrodamadhyalulitāṃ lakṣmīmiva janārdanaḥ /
mandāramālāvalitāṃ mandānilacalālakām

hārajhāṅkārigamanāṃ sugandhitanabhonilām /
lāvaṇyapādapalatāṃ madaghūrṇitalocanām

amṛtīkṛtataddeśāṃ dehendūdayadīptibhiḥ /
kāntāmālokya tasyābhūdullasattaralaṃ manaḥ

dṛṣṭanirmalapūrṇenduvapurambunidheriva /
sāpyālokya śukramukhaṃ tathā paravaśā hyabhūt

manasijeṣu parāhatamāśayaṃ
sa paribodhya manastadanūśanā /
vigalitetaravṛttitayātmanā
sa ca vadhūmaya eva vabhūva ha

ityārṣe śrīvāsiṣṭhamahārāmāyaṇe vālmīkīye mokṣopāyeṣu sthitiprakaraṇe bhārgavopākhyāne bhārgavaskhalanaṃ nāma pañcamaḥ sargaḥ