યોગવાસિષ્ઠ · અધ્યાય 4.6

ષષ્ઠઃ સર્ગઃ

શ્રીવસિષ્ઠ ઉવાચ ।
અથ તાં મનસા ધ્યાયંસ્તત્રૈવામીલિતેક્ષણઃ ।
આરબ્ધવાન્મનોરાજ્યમિદમેકઃ કિલોશના

એષા હિ લલના વ્યોમ્નિ સહસ્રનયનાલયે ।
સંપ્રાપ્તોઽયમહં સ્વર્ગમાલોલસુરસુન્દરમ્

ઇમે તે મૃદુમન્દારકુસુમોત્તંસસુન્દરાઃ ।
દ્રવત્કનકનિષ્યન્દવિલાસિવપુષઃ સુરાઃ

ઇમાસ્તા લોચનોલ્લાસદૃષ્ટનીલાબ્જદૃષ્ટયઃ ।
મુગ્ધહાસવિલાસિન્યઃ કાન્તા હરિણદૃષ્ટયઃ

ઇમે તે કૌસુમોદ્યોતા અન્યોન્યપ્રતિબિમ્બિતાઃ ।
વિશ્વરૂપોપમાકારા મરુતો મત્તકાશિનઃ

ઐરાવણકટામોદવિરક્તમધુપશ્રુતાઃ ।
ઇમાસ્તાઃ કાકલીગીતા ગીર્વાણગણગીતયઃ

ઇયં સા કનકામ્ભોજચલદ્વૈરિઞ્ચસારસા ।
મન્દાકિનીતટોદ્યાનવિશ્રાન્તસુરનાયકા

એતે તે યમચન્દ્રેન્દ્રસૂર્યાનલજલાનિલાઃ ।
લોકપાલાસ્તનુદ્યોતકીર્ણદીપ્તાનલાર્ચિષઃ

અયં સ રણવૃત્તાન્તહેતિકણ્ડૂયિતાનનઃ ।
ઐરાવણો રણે દન્તપ્રોતદૈત્યેન્દ્રમણ્ડલઃ

ઇમે તે ભૂતલસ્થાનાદ્વ્યોમ્નિ તારકતાં ગતાઃ ।
વૈમાનિકાશ્ચરચ્ચારુચામીકરમયાતપાઃ

મેરૂષલતલાસ્ફાલસીકરાકીર્ણદેવતાઃ ।
એતાસ્તાઃ કીર્ણમન્દારા ગઙ્ગાસલિલવીચયઃ

એતાઃ પ્રસૃતમન્દારમઞ્જરીપુઞ્જપિઞ્જરાઃ ।
દોલાલોલાપ્સરઃશ્રેણ્યઃ શક્રોપવનવીથયઃ

ઇમે તે કુન્દમન્દારમકરન્દસુગન્ધયઃ ।
ચન્દ્રાંશુનિકરાકારાઃ પારિજાતસમીરણાઃ

પુષ્પકેસરનીહારપટવાસરણોત્સુકૈઃ ।
લતાઙ્ગનાગણૈર્વ્યાપ્તમિદં તન્નન્દનં વનમ્

કાન્તગીતરવાનન્દપ્રનર્તિતસુરાઙ્ગનૌ ।
ઇમૌ તૌ વલ્લકીસ્નિગ્ધસ્વરૌ નારદતુમ્બુરૂ

ઇમે તે પુણ્યકર્તારો ભૂરિભૂષણભૂષિતાઃ ।
વ્યોમન્યુડ્ડીયમાનેષુ વિમાનેષુ ચ સંસ્થિતાઃ

મદમન્મથમત્તાઙ્ગ્ય ઇમાસ્તાઃ સુરયોષિતઃ ।
દેવેશ્વરં નિષેવન્તે વનં વનલતા ઇવ

ઇન્દ્રાશ્મજાલકુસુમાશ્ચિન્તામણિગુલુચ્છકાઃ ।
કલ્પવૃક્ષા ઇમે પક્વફલસ્તબકદન્તુરાઃ

ઇહ તાવદિમં શક્રમહમાસનસંસ્થિતમ્ ।
દ્વિતીયમિવ ત્રૈલોક્યસ્રષ્ટારમભિવાદયે

ઇતિ સંચિન્ત્ય શુક્રેણ મનસૈવ શચીપતિઃ ।
તેનાભિવાદિતસ્તત્ર દ્વિતીય ઇવ ખે ભૃગુઃ

અથ સાદરમુત્થાય શુક્રઃ શક્રેણ પૂજિતઃ ।
ગૃહીતહસ્ત આનીય સમીપમુપવેશિતઃ

ધન્યસ્ત્વદાગમે નાથ સ્વર્ગોઽયં શુક્ર શોભતે ।
ઉષ્યતાં ચિરમેવેહ શક્ર ઇત્થમુવાચ તમ્

અથ તત્રોપવિશ્યાસૌ ભાર્ગવઃ શોભિતાનનઃ ।
શ્રિયં જહાર શશિનઃ સકલસ્યામલસ્ય ચ

સકલસુરગણાભિવન્દિતોઽસૌ
ભૃગુતનયઃ શતમન્યુપાર્શ્વસંસ્થઃ ।
ચિરતરમતુલામવાપ તુષ્ટિં
નરપતિસત્તમલાલનં બભૂવ

ઇત્યાર્ષે શ્રીવાસિષ્ઠમહારામાયણે વા૦ મો૦ સ્થિતિપ્રકરણે ભાર્ગવોપાખ્યાને ભાર્ગવમનોરાજ્યં નામ ષષ્ઠઃ સર્ગઃ