Yoga Vasistha · Chapter 4.53

śrīvasiṣṭha uvāca /
athāpṛcchatsutastatra jambūdvīpe mahāniśi /
kadambāgrāvacūḍasthaṃ pitaraṃ pāvanāśayam

putra uvāca /
ko'sau khottha iti khyāto bhūpastātottamākṛtiḥ /
kathitaṃ ca kimetanme tvayeti brūhi tattvataḥ

kva bhaviṣyati nirmāṇaṃ vartamāne kva gamyatā /
ubhayārthaviruddhatvānmanmohāya vacastava

dāśūra uvāca /
śṛṇu putra yathābhūtametatte kathayāmyaham /
yena saṃsāracakrasya tattvamasyāvabudhyase

asadapyutthitārambhamavastumayamātatam /
saṃsārasaṃsthānamidamevamākathitaṃ mayā

paramānnabhaso jātaḥ saṃkalpaḥ khottha ucyate /
jāyate svayamevāsau svayameva vilīyate

tatsvarūpamidaṃ sarvaṃ jagadābhogi vidyate /
jāyate tatra jāte tu tasminnaṣṭe vinaśyati

brahmaviṣṇvindrarudrādyāstasyaivāvayavānviduḥ /
viṭapāniva vṛkṣasya śṛṅgāṇīva mahībhṛtaḥ

śūnye vyomani tenedaṃ nirmitaṃ trijagatpuram /
pratibhāsānusaṃdhānamātreṇaitya viriñcitām

yatreme vitatālokā lokakośāścaturdaśa /
vanopavanamālāśca yatrodyānaparamparāḥ

krīḍāśikhariṇo yatra sahyamandarameravaḥ /
śītoṣṇadīptī candrārkau dīpau yatrānalākṛtī

sūryāṃśukacadālolataraṅgottuṅgamauktikāḥ /
vahanti sarito yatra sanmuktāvalayaścalāḥ

ikṣukṣīrādisalilā maṇiratnabisāṅkurāḥ /
aurvānalāmbujā yatra vāpyaḥ sapta mahārṇavāḥ

adha urvyāṃ tathordhvaṃ khe puṇyāpuṇyadhanaśriyaḥ /
narāmarakirāṭānāṃ yatrāntaḥ krayavikrayau

tasminneva jagatyasminpure saṃkalpabhūbhṛtā /
krīḍārthamātmanaścitrā dehāpavarakāḥ kṛtāḥ

kecidgīrvāṇanāmāna ūrdhva eva niyojitāḥ /
naranāgādayaḥ kecidadha eva niyojitāḥ

vātayantrapravāheṇa calanto māṃsamṛnmayāḥ /
sitāsthidāravaścitrāstvaglepamasṛṇāmalāḥ

keciccireṇa naśyanti kecicchīghravināśinaḥ /
kecitkeśolapollāsaracitācchādanaśriyaḥ

karṇākṣināsāpramukhairdvārairnavabhiranvitāḥ /
anāratavahatprāṇapavanenoṣṇaśītalāḥ

karṇanāsāsyatālvādivātāyanagaṇānvitāḥ /
bhujādyaṅgapratolīkāḥ pañcendriyakudīpakāḥ

māyayā racitāsteṣu saṃkalpena mahāmate /
ahaṅkāramahāyakṣāḥ paramālokabhīravaḥ

dehāpavarakeṣvantarmahāhaṅkārayakṣakaiḥ /
saha saṃkrīḍate'tyarthaṃ sa sadaivāsadutthitaiḥ

yathā kusūle mārjāro bhastrāyāṃ bhujago yathā /
muktāphalaṃ yathā veṇāvahaṅkārastathā tanau

kṣaṇamabhyudayaṃ yānti kṣaṇaṃ śāmyanti dīpavat /
dehageheṣu saṃkalpataraṅgāḥ sāgareṣviva

bhaviṣyannavanirmāṇaṃ sa vyāpnoti tadā puram /
yadā saṃkalpitaṃ vastu kṣaṇādeva prapaśyati

asaṃkalpanamātreṇa svenevāśu vinaśyati /
śreyase paramāyasya nāśatvena tu saṃbhavaḥ

svayaṃ saṃkalpanāmātraṃ jāyate bālayakṣavat /
anantāyātmaduḥkhāya nānandāya kadācana

idaṃ sphāraṃ jagadduḥkhaṃ pratanotyātmasattayā /
asattayā nāśayati ghanamāndhyaṃ yathā tamaḥ

svayaiva duḥkhadāyinyā ceṣṭayā pariroditi /
kāṣṭhāvaṣṭabdhavṛṣaṇaḥ kīlotpāṭī kapiryathā

saṃkalpitānandalavastiṣṭhatyuddharakandharam /
akasmātpracyutamadhubindubhukkarabho yathā

kṣaṇaṃ viratimāyāti ratimeti kṣaṇaṃ svayam /
kṣaṇaṃ vikāramāyāti saṃkalpenaiva bālavat

enaṃ sakalabhāvebhyaḥ kṛtvā nirmūlamādarāt /
matirantaḥpadaṃ yāti yathā putra tathā kuru

trayastasyā materdehā adhamottamamadhyamāḥ /
tamaḥsattvarajaḥsaṃjñāḥ kāraṇaṃ jagataḥ sthiteḥ

tamorūpo hi saṃkalpo nityaṃ prākṛtaceṣṭayā /
parāṃ kṛpaṇatāmetya prayāti kṛmikīṭatām

sattvarūpo hi saṃkalpo dharmajñānaparāyaṇaḥ /
adūrakevalībhāvaṃ svārājyamadhitiṣṭhati

rajorūpo hi saṃkalpo lokasaṃvyavahāravān /
paritiṣṭhati saṃsāre putradārānurañjitaḥ

trividhaṃ tu parityajya rūpametanmahāmate /
saṃkalpaḥ paramāyāti padamātmaparikṣaye

sarvā dṛṣṭīḥ parityajya niyamya manasā manaḥ /
sabāhyābhyantarārthasya saṃkalpasya kṣayaṃ kuru

yadi varṣasahasrāṇi tapaścarasi dāruṇam /
yadi vā vilayātmānaṃ śilāyāṃ cūrṇayasyalam

yadi vāgniṃ praviśasi vaḍavāgnimathāpi vā /
yadi vā patasi śvabhre khaḍgadhārājavetathā

haro yadyupadeṣṭā te hariḥ kamalajo'pi vā /
atyantakaruṇākrānto lokanātho'thavā yatiḥ

pātālasthasya bhūsthasya svargasthasyāpi tattava /
nānyaḥ kaścidupāyo'sti saṃkalpopaśamādṛte

anābādhe'vikāre ca sukhe paramapāvane /
saṃkalpopaśame yatnaṃ pauruṣeṇa paraṃ kuru

saṃkalpatantāvakhilā bhāvāḥ protāḥ kilānagha /
chinne tantau na jāne te kva yānti viśarāravaḥ

asatsatsadasatsarva saṃkalpādeva nānyataḥ /
saṃkalpaṃ sadasaccaivamiha satyaṃ kimucyatām

saṃkalpyate yathā yadyattattathā bhavati kṣaṇāt /
mā kiṃcidapi tattvajña saṃkalpaya kadācana

niḥsaṃkalpo yathāprāptavyavahāraparo bhava /
cidacetyonmukhatvaṃ hi yāti saṃkalpasaṃkṣaye

utthāya sattvarūpeṇa yonyā satyamayātmakam /
na tajjagaduḥkhamidaṃ vyarthaṃ sadṛśamātmanaḥ

tena duḥkhāya mahate kiṃ mṛtena tavānagha /
yadaduḥkhāya tatprājñāḥ saṃśrayantīha netarat

adhigataparamārthatāmupetya prasabhamapāsya vikalpajālamuccaiḥ /
adhigamaya padaṃ tadadvitīyaṃ vitatasukhāya suṣuptacittavṛttiḥ

ityārṣe śrīvāsiṣṭhamahārāmāyaṇe vālmīkīye de० mo० sthiti० dāśūro० saṃsāranagaravikalpayogavicāro nāma tripañcāśaḥ sargaḥ