Yoga Vasistha · Chapter 4.50

śrīvasiṣṭha uvāca /
tamathāsau tathā buddhiphalapallavaśālinam /
ānandamantharamanāḥ ṣuṣparūpācalopamam

kadambaṃ rodasīstambhamāruroha vanasthitam /
ekārṇavagataṃ śaurirvaṭavṛkṣamivonnatam

tatrāsau vyomalagnāyāḥ śākhāyāḥ prāntapallave /
viveśa vigatāśaṅkamekāgraṃ tapa āsthitaḥ

athopaviśya mṛduni navapallavaviṣṭare /
kṣaṇamālokitāstena diśaḥ kautukacañcalam

saridekāvalīramyāḥ śailendrastanakuḍmalāḥ /
nirmalākāśakabarā lolanīlāmbudālakāḥ

nīlapallavavasanāḥ puṣpapūrāvataṃsikāḥ /
gṛhītasāgarāpūrṇakalaśāḥ purubhūṣaṇāḥ

dhṛtapraphullapadminyaḥ sugandhimukhamārutāḥ /
nīlaghuṃghumakākalyo nirjharārāvanūpurāḥ

dyumūrdhāno mahīpādā vanālīromarājayaḥ /
jaṅgalorunitambinyaścandrārkakṛtakuṇḍalāḥ

śālisaṃsārakedārāścandanasthālikānvitāḥ /
śikharorasijālagnahimaśubhrāmbudāṃśukāḥ

mahārṇavapayaḥpūranavamaṇḍanadarpaṇāḥ /
ṛkṣaughagharmapulakā bhuvanāntaḥpurāntarāḥ

ārtavastanadhāriṇyo lagnasūryāṃśukuṅkumāḥ /
vicitrakusumopetāścandrāṃśusitacandanāḥ

gaganagatalatādalopaviṣṭaḥ
prasṛtavanāvanivārivāhaveṣāḥ /
tribhuvanavanitā dadarśa hṛṣṭaḥ
kusumanirantaramaṇḍitā daśāśāḥ

ityārṣe śrīvāsiṣṭhamahārāmāyaṇe vālmīkīye de० mo० sthitiprakaraṇe dā० dāśūrādigavalokanaṃ nāma pañcāśaḥ sargaḥ