Yoga Vasistha · Chapter 4.45

pañcacatvāriṃśaḥ sargaḥ

śrīvasiṣṭha uvāca /
jagatsaṃpannamevedaṃ saṃpannaṃ kiṃcideva na /
śūnyameva ca bhāmātraṃ manovilasitaṃ sthitam

na deśakālāvetena brahmāṇḍenāvṛtau sthitau /
manāgapi mahārūpavatāpyākāśarūpiṇā

etatsaṃkalpamātrātma svapnadṛṣṭapuropamam /
yatraiva tatra tacchūnyaṃ kevalaṃ vyoma saṃsthitam

abhittirāgaracanamapi dṛṣṭamasanmayam /
akṛtaṃ kṛtamevaitadvyomni citraṃ vicitrakam

manasā kalpitaṃ sarvaṃ dehādibhuvanatrayam /
saṃsmṛtau kāraṇaṃ caitaccakṣurālokane yathā

ābhāsamātraṃ hi jagaddhaṭāvaṭapaṭabhramaiḥ /
āvartate na sadrūpātpṛthakkuḍyādayaḥ sthitāḥ

manasedaṃ śarīraṃ hi vāsanārthaṃ prakalpitam /
kṛmikośaprakāreṇa svātmakośa iva svayam

na tadasti ca yannāma cetaḥsaṃkalpamambaram /
na karoti na cāpnotidurgamapyatiduṣkaram

sarvaśaktidhare deve kā nāma nanu śaktayaḥ /
na saṃbhavantyāśriyante yābhirantarmanoguhāḥ

sattāsatte padārthānāṃ sarveṣāṃ sarvadaiva hi /
mahābāho saṃbhavataḥ sarvaśaktau vibhau sati

paśya bhāvanayā prāptaṃ manasaivātmajaṃ vapuḥ /
tasmāttatkalanāṃ rāma sarvaśaktiyutāṃ viduḥ

svasaṃkalpakṛtāḥ sarve devāsuranarādayaḥ /
svasaṃkalpopaśamane śāmyantyasnehadīpavat

ākāśasadṛśaṃ sarvaṃ kalanāmātrajṛmbhitam
jagatpaśya mahābuddhe sudīrghaṃ svapnamutthitam

na jāyate na mriyate iha kiṃcitkadācana /
paramārthena sumate mithyā sarvaṃ tu vidyate

na vṛddhimeti no hrāsaṃ yanna kiṃcitkadācana /
kiṃ vā tanu bhavettatra kasya kā nāma khaṇḍanā

bhūmabhūtaṃ svakāyotthamapaśyannipuṇaṃ dṛśā /
rāghavā'mahatā svāntaḥ kimajña iva muhyasi

mṛgatṛṣṇā yathā tāpānmanaso niścayāttathā /
asanta iva dṛśyante sarve brahmādayo'pyamī

dvicandravibhramaprakhyā manorathavadutthitāḥ /
mithyājñānaghanāḥ sarve jagatyākārarāśayaḥ

yathā nauyāyino mithyā sthāṇuspandamatistathā /
asatyaivotthitā nityamākārāṇāṃ paramparā

indrajālamidaṃ viddhi māyāracitapañjaram /
manomanananirmāṇaṃ na sannāsadiva sthitam

brahmaivedaṃ jagatsarvamanyatāyāstataḥ kutaḥ /
prasaṅgaḥ kīdṛśaḥ ko'sau kva vā sāparitiṣṭhati

ayaṃ girirayaṃ sthāṇurityāḍambaravibhramaḥ /
manaso bhāvanādārḍhyādasansanniva lakṣyate

prapañcapatanārambhaṃ pramattasya idaṃ jagat /
sakāmatṛṣṇāmananaṃ tyaktvānyadrāma bhāvaya

yathā svapno mahārambho bhrāntireva na vastutaḥ /
dīrghasvapnaṃ tathaivedaṃ viddhi cittopapāditam

dṛśyamānamahābhogaṃ gṛhyamāṇamavastukam /
kośamāśābhujaṅgānāṃ saṃsārāḍambaraṃ tyaja

asadetaditi jñātvā mā'tra bhāvaṃ niveśaya /
anudhāvati na prājño vijñāya mṛgatṛṣṇikām

svasaṃkalpātsvarūpāḍhyāṃ manorathamayīṃ śriyam /
yo'nugacchati mūḍhātmā duḥkhasyaiva sa bhājanam

vastunyasati loko'yaṃ yātu kāmamavastuni /
yastu vastu parityajya yātyavastu sa naśyati

manovyāmoha evedaṃ rajjvāmahibhayaṃ yathā /
bhāvanāmātravaicitryācciramāvartate jagat

asadabhyuditairbhāvairjalāntaścandravaccalaiḥ /
vañcyate bāla eveha na tattvajño bhavādṛśaḥ

ya imaṃ guṇasaṃghātaṃ bhāvayansukhamīhate /
pramārṣṭi sa jaḍo jāḍyaṃ vahnibhāvanayā svayā

asadevedamābhogi dṛśyate jalapañjaram /
manomanananirmāṇahṛdaye nagaraṃ yathā

idaṃ cittecchayodeti līyate tadanicchayā / /
mithyaivaṃ dṛśyate sphītaṃ gandharvanagaraṃ yathā

rāma naṣṭe jagatyasminna kiṃcidapi naśyati /
yukte'pi ca jagatyasminna kiṃcidapi yujyate

manaḥprakalpite bhagne hṛdi vistīrṇapattane /
vṛddhiṃ copagate brūhi kiṃ vṛddhaṃ kasya kiṃ kṣatam

krīḍārthena yathodeti bālānāṃ hṛdi vartanam /
manasā tadvadevedamudetyavirataṃ jagat

na kiṃcitkasyacinnaṣṭamindrajālajale yathā /
bhraṣṭe naṣṭe tathaivāsminsaṃsāre vitathotthite

yadasattadasatsyāccenna kiṃ kasya kila kṣatam /
tato harṣaviṣādānāṃ saṃsāre nāma nāspadam

asadeva yadatyantaṃ tasmātkiṃ nāma naśyati /
nāśābhāve hi duḥkhasya kaḥ prasaṅgo mahāmate

sadeva vā yadatyantaṃ tasya kiṃ nāma naśyati /
brahmaivedaṃ jagatsarvaṃ sukhaduḥkhe kimutthite

asadvāpi yadatyantaṃ vṛddhiḥ syāttasya kīdṛśī /
vṛddherabhāve harṣasya kaḥ prasaṅgo mahāmate

sarvatrāsatyabhūte'sminprapañcaikāntakāriṇi /
saṃsāre kimupādeyaṃ prājño yadabhivāñchatu

sarvatra satyabhūte'sminbrahmatattvamaye'pi ca /
kiṃ syātrtribhuvane heyaṃ prājñāḥ pariharantu yat

asatsadvā jagadyasya tenāsau sukhaduḥkhayoḥ /
agamya eva mūrkhastu tadvināśena duḥkhitaḥ

ādāvante ca yannāsti vartamāne'pi tattathā /
yo'bhivāñchatyasadrāma tasyāsattaiva dṛśyate

ādāvante ca yatsatyaṃ vartamāne sadeva tat /
yasya sarvaṃ sadeva syāttasya sattaiva dṛśyate

asatyabhūtaṃ toyāntaścandravyomatalādikam /
bālā evābhivāñchanti manomohāya nottamāḥ

bālo hi vitatākārairvasturiktaiḥ prayojanaiḥ /
saṃtoṣametyanantāya duḥkhāya na sukhāya tu

tasmānmā tvaṃ bhavo bālo rāma rājīvalocana /
avināśamihālokya nityamāśraya susthiram

asadidamakhilaṃ mayā sametaṃ
tviti vigaṇayya viṣāditāstu mā te /
sadiha hi sakalaṃ mayā sametaṃ
tviti ca vilokya viṣāditāstu mā te

śrīvālmīkiruvāca /
ityuktavatyatha munau divaso jagāma
sāyaṃtanāya vidhaye'stamino jagāma /
snātuṃ sabhā kṛtanamaskaraṇā jagāma
śyāmākṣaye ravikaraiśca sahājagāma

ityārṣe śrīvāsiṣṭhamahārāmāyaṇe vālmīkīye mo० sthitiprakaraṇe yathābhūtārthayogopadeśo nāma pañcacatvāriṃśaḥ sargaḥ