Yoga Vasistha · Chapter 4.26

ṣaḍviṃśaḥ sargaḥ

śrīvasiṣṭha uvāca /
iti nirṇīya daityendro dāmavyālakaṭānvitām /
senāṃ saṃpreṣayāmāsa bhūtalaṃ devanāśinīm

daityāḥ sāgarakuñjebhyaḥ kandarebhyaśca sāyudhāḥ /
udagurbhīmanirhlādāḥ sapakṣagirilīlayā

rodasīkoṭaraṃ hastaprahārahatabhāskaram /
dānavāḥ pūrayāmāsurdāmavyālakaṭaidhitāḥ

athottasthurnikuñjebhyaḥ kandarebhyaḥ surācalāt /
pralayānta ivākṣubdhā bhīmāḥ svarvāsināṃ gaṇāḥ

devāsurapatākinyostadyuddhamabhavattayoḥ /
akālolvaṇakalpāntabhīṣaṇaṃ bhuvanāntare

petuḥ pralayaparyastacandrārkā iva dīptayaḥ /
śirāṃsi kunḍalohayotatejaḥpītatamāṃsyatha

jughūrṇurbhaṭanirmuktasiṃhanādavirāvitāḥ /
pralayānilasaṃpūraiḥ sphuṭahāsā ivādrayaḥ

reṇuḥ śailaśilātulyahetighātāstabhittayaḥ /
kulācalataṭābhīruviśrāntaharimaṇḍalāḥ

ceruḥ parasparāghātahatahetisamutthitāḥ /
lolānalakaṇāḥkalpaviśīrṇā iva tārakāḥ

vilesū raktamāṃsaughapūrṇaikārṇavatīragāḥ /
kalpatālavaduttālā vetālāstālatālitāḥ

prasphuradrudhirāsāraśāntapāṃsupayodhare /
vyomni hetihatakṣuṇṇā maulikuṇḍalakoṭayaḥ

babhūvurbhāskarākāraiḥ kalpabhūruhadhāribhiḥ /
prahāradalitādrīndrairdaityairnirvivarā diśaḥ

jagmurjvaladasiprāntavātapātitabhittayaḥ /
kaṇaprakaratāṃ śailāḥ kalpāgnidalitā iva

devāste ca samājagmuraśvamedhaidhitā iva /
asurānastravibhraṣṭāñjaladāniva vāyavaḥ

jagṛhustānathākramya jaraṭhāsūnivautavaḥ /
te'pi tāñjagṛhurmattānṛkṣārūḍhāniva drumān

dorvṛkṣavilasaddhetikusumāḥ śastrapallavāḥ /
rejuḥ surāsurāḥ phullā vanalolā iva drumāḥ

anyonyaṃ pūrayāmāsuḥ śastrapūrairdiśo daśa /
vanāni kusumavrātaiḥ sumerāviva mārutaḥ

ghoraṃ samabhavadyuddhaṃ devadānavasenayoḥ /
rodorandhrodumbarāntarmahāmaśakasaṃghayoḥ

athodapataduttālairlokapālebhamaṇḍalaiḥ /
kalpābhrasphūrjitākāro dāruṇaḥ samarāravaḥ

piṇḍagraheṇa nabhasi bhūbhāgamiva kuṭṭimam /
muṣṭigrāhyo mahāmeghamantharodarapīvaraḥ

rathasaṃpātasaṃpiṣṭaśastraśailaraṭannaṭaḥ /
truṭaddhṛdayaniḥsattvakarkaśākrandaghargharaḥ

pralayapratyayollāsikalpāntārāvabṛṃhaṇaḥ /
dvādaśādityasaṃghaṭṭadravatkāñcanaparvataḥ

brahmāṇḍakuṇḍasaṃghaṭṭātparāvṛttyā ca nirgataḥ /
mahāsrotaḥpayaḥpūraḥ sattvāhata ivākaraḥ

cañcatsapakṣaśailendrapakṣapātacaladdhvaniḥ /
kaṭhināpūraṇoddhūtasphuṭacchailendrakandaraḥ

mandaroddhatadugdhābdhisaṃkṣobhasadṛśāṅgakaḥ /
ratiśruddhuṃghumāsphoṭaghaṭitadvīpajantubhūḥ

senayoḥ kṣubdhayorāsīdyuddhamuddhatadānavam /
niṣpiṣṭanagaragrāmagirikānanamānavam

mahāhetiśatacchinnadānavācalapūrṇadik /
anyonyāhatahetyādicūrṇapūrṇāmbarodaram

bhuśuṇḍīmaṇḍalāsphoṭasphuṭanmeruśiraḥśatam /
śaramārutanirlūnadaityadevamukhāmbujam

cakrāvartaśatabhrāntadevadaityajarattaṇam /
senāprahārakallolavalanāvalitāmbaram

hetyugravātaniṣpiṣṭapatadvaimānikavrajam /
astroditābdhivāryoghaplāvitavyomapattanam

vahanmahāstrapātāsiśūlaśaktinadīśatam /
śailapakṣodbhaṭāsphoṭaluṭhadbrahmāṇḍamaṇḍapam

daityapārṣṇiprahāraughapatallokeśapattanam /
nārīhalahalārāvaraṇatkaṅkaṇamandiram

luṭhaddaityavalodbhūtamattāsraughajalānvitam /
raktadhautanaraughogramuktanādadravajjanam

lokapānīkapāmbhojacchannācchannayamānvitam /
punaḥ surāsurairghātairdṛṣṭasainyakulākulam

sapakṣaparvatākāradānavādrigamāgamaiḥ /
vahacchavaśavāśabdabhūribhāṅkārabhīṣaṇam

āyudhāgravibhinnogradaityaparvatanirjharaiḥ /
raktairaruṇitāśeṣavasudhārṇavaparvatam

utsannarāṣṭranagaravipinagrāmagahvaram /
dhṛtāsaṃkhyāsurebhāśvamanuṣyaśavaparvatam

sutālottālanārācarājirocitavāraṇam /
muṣṭiprahārapiṣṭāṃsamattairāvaṇavāraṇam

kalpābhrapaṭalāsāradhārādalitaparvatam /
mahāśaniviniṣpeṣapiṣṭoḍḍīnakulācalam

kupitāgnijvalajjvālājālajvalitadānavam /
ekāñjalipuṭānītasamudrotsāditānalam

caṇḍadaityātisaṃbhāraśilīkṛtamahājvalam /
vanavyūhendhanāgnyarcirdrāvitāmbuśiloccayam

astranirmitadurvāratamaḥkalpāntarātrikam /
māyāsūryagaṇoddyotaiḥ pītātanutamaḥpaṭam

māyāgnivarṣaniṣpītakalābhraghanavarṣaṇam /
sasītkārāgnivamanaśastrasaṃghaṭṭavarṣaṇam

vajravarṣāstranirdhūtaśailavarṣāstrasaṃbhramam /
nidrābodhāstrayuddhāḍhyaṃ saṃgharṣāvagrahāśrayam

vahatkrakacavṛkṣāstraṃ jalāgnyasmaraṇāndhitam /
brahmāstrayuddhaviṣamaṃ tamastejostrasāritam

astrodgīrṇāyudhānīkanīrandhrasakalāmbaram /
śilāvarṣāstradalitaṃ vahnivarṣāstrabhāsuram

patākāspṛṣṭaśaśikaiścakracītkāragarjitaiḥ /
muhūrtena rathairlaṅghitodayāstamayācalam

vajraprahārāviratamriyamāṇamahāsuram /
śukrāmaramahāvidyājīvamānamahāsuram

vidravaddevasaṃghātaṃ jayaproḍḍāmarāmaram /
śubhagrahamahāketumālikānāmitastataḥ

utpātamaṅgalaughānāṃ buddheruddharakandharam /
sādrikhorvīsamudradyujagadrudhiravāridhi

phullaikakiṃśukavanaṃ kurvaddurvāravairataḥ /
parvatapratimāsaṃkhyaṃ śavapūrṇamahārṇavam

samagrataruśākhāgralambalolamahāśavam /
dīpyamānaiḥ svavātārtaiḥ pakṣapuṣpairlasatphalaiḥ

tālottālaiḥ śaravrātavanairvyāptanabhasthalam /
parvatapratimāsaṃkhyakabandhaśatabāhubhiḥ

nṛtyadbhiḥ pātitāmbhodavimānasuratārakam /
śaraśaktigadāprāsapaṭṭiśaprotaparvatam

lokasaptakavibhraṣṭakuḍyakhaṇḍacitāmbaram /
anāratarasanmattakalpābhradṛḍhadundubhi

evaṃ śabdaśatonnādapātālatalavāraṇam /
vināyakakarākṛṣṭadīrghadānavaparvatam

ekadikkaraniṣpandasiddhasādhyamarudgaṇam /
palāyamānagandharvakinnarāmaracāraṇam

vaghuraśaninipātakhaṇḍitāṅgā
dalitaśilāśakalāḥ kakummukheṣu /
pralayasamayasūcakāḥ surāṇāṃ
suratarughargharaghasmarāḥ samīrāḥ

ityārṣe śrīvāsiṣṭhamahārāmāyaṇe vā० mo० sthitiprakaraṇe dāmavyālakaṭasaṃgrāmavarṇanaṃ nāma ṣaḍviṃśaḥ sargaḥ