Yoga Vasistha · Chapter 4.21

ekaviṃśaḥ sargaḥ

śrīrāma uvāca /
bhagavansarvadharmajña saṃśayo yo mahānayam /
hṛdi vyāvartate lolaḥ kallola iva sāgare

dikkālādyanavacchinne tate nitye nirāmaye /
mlānā saṃvinmanonāmnī kutaḥ keyamupasthitā

yasmādanyanna nāmāsti na bhūtaṃ na bhaviṣyati /
kutaḥ kīdṛkkathaṃ tatra kalaṅkastasya vidyate

śrīvasiṣṭha uvāca /
sādhu rāma tvayā proktaṃ jātā te mokṣabhāginī /
matiruttamaniṣyandā nandanasyeva mañjarī

pūrvāparavicārārthatatpareyaṃ matistava /
saṃprāpsyasi padaṃ proccairyatprāptaṃ śaṃkarādibhiḥ

praśnasyāsya tu he rāma na kālastava saṃprati /
siddhāntaḥ kathyate yatra tatrāyaṃ praśna ucyate

siddhāntakāle bhavatā praṣṭavyo'hamidaṃ param /
karāmalakavattena siddhāntaste bhaviṣyati

siddhāntakāle praśnoktireṣā tava virājate /
prāvṛṣīva hi kekoktiryuktā śaradi haṃsagīḥ

sahajo nīlimā vyomni śobhate prāvṛṣaḥ kṣaye /
prāvṛṣi tvatanūdagrapayodapaṭalotthitaḥ

ayaṃ prakṛta ārabdho manonirṇaya uttamaḥ /
yadvaśājjanatājanma tadākarṇaya suvrata

evaṃ prakṛtirūpeyaṃ manomananadharmiṇī /
karmeti rāma nirṇītaṃ sarvaireva mumukṣubhiḥ

śṛṇu darśanabhedena tannāmābhimatākṛtim /
vāgmināṃ vadatāṃ yātaṃ citrābhiḥ śāstradṛṣṭibhiḥ

yaṃ yaṃ bhāvamupādatte mano mananacañcalam /
tattāmeti ghanāmodamantaḥsthaḥ pavano yathā

tatastameva nirṇīya tameva ca vikalpayan /
antaḥsthayā rañjanayā rañjayansvāmahaṃkṛtim

tanniścayamupādāya tatraiva rasamṛcchati /
yanmayatvaṃ śarīre tu tato buddhīndriyeṣu ca

yanmayaṃ hi mano rāma dehastadanu tadvaśaḥ /
tattāmāyāti gandhāntaḥ pavano gandhatāmiva

buddhīndriyeṣu valgatsu karmendriyagaṇastataḥ /
sphurati svata evorvī rajolola ivānile

karmendriyagaṇe kṣubdhe svaśaktiṃ praṇayatyalam /
karma niṣpadyate sphāraṃ pāṃsujālamivānile

evaṃ hi manasaḥ karma karmabījaṃ manaḥ smṛtam /
abhinnaiva tayoḥ sattā yathā kusumagandhayoḥ

yādṛśaṃ bhāvamādatte dṛḍhābhyāsavaśānmanaḥ /
tathā spandākhyakarmākhyaprathāśākhā vimuñcati

tathā kriyāṃ tatphalatāṃ niṣpādayati cādarāt /
tatastameva cāsvādamanubhūyāśu badhyate

yaṃ yaṃ bhāvamupādatte taṃ taṃ vastviti vindati /
tattacchreyo'nyannāstīti niścayo'sya ca jāyate

dharmārthakāmamokṣārthaṃ prayatante sadaiva hi /
manāṃsi dṛḍhabhinnāni pratipattyā svayaiva ca

mano vai kāpilānāṃ tu pratipattinijāmalam /
urarīkṛtya nirṇīya kalpitāḥ śāstradṛṣṭayaḥ

mokṣe tu nānyathā prāptiriti bhāvitacetasaḥ /
svāṃ dṛṣṭiṃ pratibimbanti sthitāḥ svaniyamabhramaiḥ

vedāntavādino buddhyā brahmedamiti rūḍhayā /
muktiḥ śamadamopetā nirṇīya parikalpitā

muktau tu nānyathā prāptiriti bhāvitacetasaḥ /
svāṃ dṛṣṭiṃ pravivṛṇvanti svaireva niyamabhramaiḥ

vijñānavādino buddhyā sphuratsvabhramapūrayā /
muktiḥ śamadamopetā nirṇīya parikalpitā

muktau tu nānyathā prāptiriti bhāvitacetasaḥ /
svāṃ dṛṣṭiṃ pravivṛṇvanti svaireva niyamabhramaiḥ

ārhatādibhiranyaiśca svayābhimatayecchayā /
citrāścitrasamācāraiḥ kalpitāḥ śāstradṛṣṭayaḥ

nirnimittotthasaumyāmbubudbudaughairivotthitaiḥ /
svaniścitairiti prauḍhā nānākārā hi rītayaḥ

sarvāsāmeva caitāsāṃ rītīnāmevamākaraḥ /
mano nāma mahābāho maṇīnāmiva sāgaraḥ

na nimbekṣū kaṭusvādū śītoṣṇau nendupāvakau /
yadyathā paramābhyastamupalabdhaṃ tathaiva tat

yastvakṛtrima ānandastadarthaṃ prayatairnaraiḥ /
manastanmayatāṃ neyaṃ yenāsau samavāpyate

dṛśyaṃ saṃpariḍimbhaṃ svaṃ tucchaṃ pariharanmanaḥ /
tajjābhyāṃ sukhaduḥkhābhyāṃ nāvaśyaṃ parikṛṣyate

apavitramasadrūpaṃ mohanaṃ bhayakāraṇam /
dṛśyamābhāsamābhogi bandhamābhāvayānagha

māyaiṣā sā hyavidyaiṣā bhāvanaiṣā bhayāvahā / /
saṃvidastanmayatvaṃ yattatkarmeti vidurbudhāḥ

dṛṣṭvā dṛśyaikatānatvaṃ viddhi tvaṃ mohanaṃ manaḥ /
pramārjayeva tanmithyā mahāmalinakardamam

dṛśyatanmayatā yaiṣā svabhāvasthānubhūyate /
saṃsāramadirā seyamavidyetyucyate budhaiḥ

anayopahato lokaḥ kalyāṇaṃ nādhigacchati /
bhāsvaraṃ tāpanālokaṃ paṭalāndhekṣaṇo yathā

svayamutpadyate sā ca saṃkalpādvyomavṛkṣavat /
asaṃkalpanamātreṇa bhāvanāyāṃ mahāmate

kṣīṇāyāṃ svarasādeva vimarśena vilāsinā /
asaṃsaṅgaḥ padārtheṣu sarveṣu sthiratāṃ gataḥ

satyadṛṣṭau prapannāyāmasatye kṣayamāgate /
nirvikalpacidacchātmā sa ātmā samavāpyate

na sattā yasya nāsattā na sukhaṃ nāpi duḥkhitā /
kevalaṃ kevalībhāvo yasyāntarupalabhyate

abhavyayā bhāvanayā na cittendriyadṛṣṭibhiḥ /
ātmano'nanyabhūtābhirapi yaḥ parivarjitaḥ

vāsanābhiranantābhirvyomeva ghanarājibhiḥ /
saṃdigdhāyāṃ yathā rajjvāṃ sarpatattvaṃ tathaiva hi

cidākāśātmanā bandhastvabandhenaiva kalpitaḥ /
kalpitaṃ kalpitaṃ vastu pratikalpanayānyathā

tadevānyatvamādatte khamahorātrayoriva /
yadatucchamanāyāsamanupādhi gatabhramam

tattatkalpanayātītaṃ tatsukhāyaiva kalpate /
śūnya eva kusūle tu siṃho'stīti bhayaṃ yathā

śūnya eva śarīre'ntarbaddho'smīti bhayaṃ tathā /
śūnya eva kusūle tu prekṣya siṃho na labhyate

tathā saṃsārabandhārthaḥ prekṣito'sau na labhyate /
idaṃ jagadayaṃ cāhamiti saṃbhrāntamutthitam

bālānāṃ madhyame kāle chāyā vaitālikī yathā /
kalpanāvaśato jantorbhāvābhāvaśubhāśubhāḥ

kṣaṇādasattāmāyānti sattāmapi punaḥ kṣaṇāt/
mātaiva gṛhiṇībhāvagṛhītā kaṇṭhalambinī

karoti gṛhiṇīkāryaṃ suratānandadā satī /
kāntaiva mātṛbhāvena gṛhītā kaṇṭhalambinī

nūnaṃ vismārayatyeva manmathaṃ mātṛbhāvanāt /
bhāvānusāriphaladaṃ padārthaughamavekṣya ca

na jñeneha padārtheṣu rūpamekamudīryate /
dṛḍhabhāvanayā ceto yadyathā bhāvayatyalam

tattatphalaṃ tadākāraṃ tāvatkālaṃ prapaśyati /
na tadasti na yatsatyaṃ na tadasti na yanmṛṣā

yadyathā yena nirṇītaṃ tattathā tena lakṣyate /
bhāvitākāśamātaṅgaṃ vyomahastitayā manaḥ

vyomakānanamātaṅgīṃ vyomasthāmanudhāvati /
tasmātsaṃkalpameva tvaṃ sarvabhāvamayātmakam

tyaja rāma suṣuptasthaḥ svātmanaiva bhavātmanaḥ /
maṇirhi pratibimbānāṃ pratiṣedhakriyāṃ prati

na śakto jaḍabhāvena natu rāma bhavādṛśaḥ /
yadātmani jagadrāma taveha pratibimbati

tadavastviti nirṇīya mā tenāgaccha rañjanam /
tadeva satyamiti vāpyabhinnaṃ paramātmanaḥ

matvāntastvamanādyantaṃ bhāvayātmānamātmanā /
cetasi pratibimbanti ye bhāvāstava rāghava /
rañjayantvanyasaktatvānmā te tvāṃ sphaṭikaṃ yathā

sphaṭikamamananaṃ yathā viśanti
prakaṭatayā na ca rañjanā vicitrā /
iha hi vimananaṃ tathā viśantu
prakaṭatayā bhuvanaiṣaṇā bhavantam

ityārṣe śrīvāsiṣṭhamahārāmāyaṇe vālmīkīye mokṣopāyeṣu sthitiprakaraṇe vijñānavādo nāmaikaviṃśaḥ sargaḥ