Yoga Vasistha · Chapter 4.20

viṃśaḥ sargaḥ

śrīvasiṣṭha uvāca /
etatte kathitaṃ sarvaṃ manorūpanirūpaṇam /
mayā rāghava nānyena kenacinnāma hetunā

dṛḍhaniścayavacceto yadbhāvayati bhūriśaḥ /
tattāṃ yātyanalāśleṣādayaḥpiṇḍo'gnitāmiva

bhāvābhāvagrahotsargadṛśaścetanakalpitāḥ /
nāsatyā nāpi satyāstā manaścāpalakāritāḥ

mano mohe tu kartṛ syātkāraṇaṃ ca jagatsthiteḥ /
viśvarūpatayaivedaṃ tanoti malinaṃ manaḥ

mano hi puruṣo nāma taṃ niyojya śubhe pathi /
tajjayaikāntasādhyā hi sarvā jagati bhūtayaḥ

puruṣaśceccharīraṃ syātkathaṃ śukro mahāmatiḥ /
agamadvividhākāraṃ janmāntaraśatabhramam

ataścittaṃ hi puruṣaḥ śarīraṃ cetyameva hi /
yanmayaṃ ca bhavatyetattadavāpnotyasaṃśayam

yadatucchamanāyāsamanupādhi gatabhramam /
yatnāttadanusaṃdhānaṃ kuru tattāmavāpsyasi

abhipatati manaḥsthitaṃ śarīraṃ
natu vapurācaritaṃ manaḥ prayāti /
abhipatatu tavātra tena satyaṃ
subhaga manaḥ prajahātvasatyamanyat

ityārṣe śrīvāsiṣṭhamahārāmāyaṇe vā० de० mokṣopāye sthitiprakaraṇe manorūpavarṇanaṃ nāma viṃśatitamaḥ sargaḥ