Yoga Vasistha · Chapter 4.17

saptadaśaḥ sargaḥ

śrīrāma uvāca /
bhagavanbhṛguputrasya pratibhāsānubhūtitaḥ /
yathaiṣā saphalā jātā tathānyasya na kiṃ bhavet

śrīvasiṣṭha uvāca /
iyaṃ prathamamutpannā sā tanurbrahmaṇaḥ padāt /
śuddhā jātirbhārgavasya nānyajanmakalaṅkitā

sarvaiṣaṇānāṃ saṃśāntau śuddhacittasya yā sthitiḥ /
tatsatyamucyate saiṣā vimalā cidudāhṛtā

manonirmalasattvātma yadbhāvayati yādṛśam /
tattathāśu bhavatyeva yathāvarto bhavetpayaḥ

yathā bhṛgusutasyaiva vibhramaḥ protthitaḥ svayam /
pratyekamapyevameva dṛṣṭānto'tra bhṛgoḥ sutaḥ

bījasyāṅkurapatrādi svaṃ camatkurute yathā /
sarveṣāṃ bhūtasaṅghānāṃ bhramakhaṇḍāstathaiva hi

yadidaṃ dṛśyate viśvamevamevākhilaṃ jagat /
pratyekamuditaṃ mithyā mithyaivāstamupaiti ca

nāstameti nacodeti jagatkiṃcana kasyacit /
bhrāntimātramidaṃ māyāmugdheva parijṛmbhate

yathā saṃpratibhāsasthaḥ svayaṃ saṃsārakhaṇḍakaḥ /
tathā teṣāṃ sahasrāṇi mithyā dṛṣṭāni santi hi

svapnasaṃkalpanagaravyavahārāḥ parasparam/
pṛthagyathā na dṛśyante tathaite saṃsṛtibhramāḥ

evaṃ nagaravṛndāni nabhassaṃkalparūpiṇi /
santi tāni na dṛśyante mithyājñānadṛśaṃ vinā

piśācayakṣarakṣāṃsi santyevaṃrūpakāṇi ha /
saṃkalpamātradehāni sukhaduḥkhamayāni ca

evameva vayaṃ ceme saṃpannā raghunandana /
svasaṃkalpātmakākārā mithyāsatyatvabhāvinaḥ

evaṃrūpaiva hi pare vidyate sargasaṃtatiḥ /
na vāstavī vastutā tu saṃsthitaivamavastuni

pratyekamuditaṃ viśvamevameva mudhaiva hi /
vanagulmakarūpeṇa vasantaikaraso yathā

prathamo'yaṃ svasaṃkalpaḥ prathāmabhyāgato yathā /
tathātiparamārthena dṛṣṭenetthaṃ vibhāvyate

pratyekamuditaṃ cittaṃ svasvabhāvodarasthitam /
idamitthaṃ samārambhaṃ jagatpaśyanvinaśyati

pratibhāsavaśādasti nāsti vastvavalokanāt/
dīrghasvapno jagajjālamālānaṃ cittadantinaḥ

citsattaiva jagatsattā jagatsattaiva cittakam /
ekābhāvādvayornāśaḥ sa ca satyavicāraṇāt

śuddhasya pratibhāso hi satyo bhavati cetasaḥ /
pramārjanādiva maṇermalinasyeha yuktitaḥ

ciramekadṛḍhābhyāsācchuddhirbhavati cetasaḥ /
anākrāntasya saṃkalpaiḥ pratibhodeti cetasaḥ

suvarṇaṃ na sthitiṃ yāti malavatyaṃśuke yathā /
ekā dṛṣṭiḥ sthitiṃ yāti na mlāne cittake tathā

śrīrāma uvāca /
pratibhāsātmani jagatyete kālakriyākramāḥ /
sodayāstamayā jātāḥ kathaṃ śukrasya cetasaḥ

śrīvasiṣṭha uvāca /
yādṛgjagadidaṃ dṛṣṭaṃ śukreṇa pitṛśāstrataḥ /
tādṛkkasya sthitaṃ citte mayūrāṇḍe mayūravat

svabhāvakośasthamidaṃ tadetena kramoditam /
bījenāṅkurapatrādilatāpuṣpaphalaṃ yathā

jīvo yadbāsanābaddhastadevāntaḥ prapaśyati /
svarūpaṃ cātra dṛṣṭānto dīrghasvapnastvidaṃ jagat

pratyekamudito rāma nūnaṃ saṃsṛtikhaṇḍakaḥ /
rātrau sainyanarasvapnajālavatsvātmani sphuṭaḥ

śrīrāma uvāca /
eṣa saṃsṛtikhaṇḍottho mithaḥ sa milati svayam /
no vā milati tanme tvaṃ yathāvadvaktumarhasi

śrīvasiṣṭha uvāca /
malinaṃ hi mano'vīryaṃ na mithaḥ śleṣamarhati /
ayo'yasi ca saṃtapte śuddhe taptaṃ tu līyate

cittatattvāni śuddhāni saṃmilanti parasparam /
ekarūpāṇitoyāni yāntyaikyaṃnāvilāni hi

śuddhirhi cittasya vivāsanatva-
mabhūtasaṃvedanamekarūpam /
tasyāśu śuddhyā bhavati prabuddha-
stanmātrayuktyā parasaṃgameti

ityārṣe śrīvāsiṣṭhamahārāmāyaṇe vālmīkīye mo० sthi० bhārgavopākhyāne manorājyasaṃmelanaṃ nāma saptadaśaḥ sargaḥ