Yoga Vasistha · Chapter 4.12

dvādaśaḥ sargaḥ

kāla uvāca /
surāsuranarākārā imā yāḥ saṃvido mune /
brahmārṇavādabhinnāstāḥ satyametanmṛṣetarat

mithyābhāvanayā brahmansvavikalpakalaṅkitāḥ /
na brahma vayamityantarniṃścayena hyadhogatāḥ

brahmaṇo vyatiriktatvaṃ brahmārṇavagatā api /
bhāvayantyo vimuhyanti bhīmāsu bhavabhūmiṣu

yā etāḥ saṃvido brāhmyo mananaikakalaṅkitāḥ /
etattatkarmaṇāṃ bījamapyakarmaiva viddhi tāḥ

saṃkalparūpayaivāntarmune kalanayaitayā /
karmajālakarañjānāṃ bījamuṣṭyā karālayā

imā jagati vistīrṇāḥ śarīropalapaṅktayaḥ /
tiṣṭhanti parivalganti rudanti ca hasanti ca

ābrahmastambaparyantaṃ spandanaiḥ pavano yathā /
ullasanti nilīyante mlāyanti vihasanti ca

tā etāḥ kāścidatyacchā yathā hariharādayaḥ /
kāścidalpavimohasthā yathoraganarāmarāḥ

kāścidatyantamohasthā yathā tarutṛṇādayaḥ /
kāścidajñānasaṃmūḍhāḥ kṛmikīṭatvamāgatāḥ

kāścicattṛṇavaduhyante dūre brahmamahodadheḥ /
aprāptabhūmikā etā yathoraganagādayaḥ

sattvamātraṃ samālokya kāścidevamupāgatāḥ /
jātājātā nikhanyante kṛtāntajaraṭhākhunā

kāścidantaramāsādya brahmatattvamahāmbudheḥ /
gatāstattāṃ samaṃ kāryairharibrahmaharādikāḥ

alpamohātmikāḥ kāścittameva brahmavāridhim /
adṛṣṭapārabhūmyaughamavalambya vyavasthitāḥ

kāścidbhoktavyajanmaughabhuktajanmaughakoṭayaḥ /
vandhyāḥ prakāśatāmasyaḥ saṃsthitā bhūtajātayaḥ

kāścidūrdhvādadho yānti yathā hastānmahatphalam /
ūdhvādūrdhvataraṃ kāścidadhastātkāścidapyadhaḥ

bahusukhaduḥkhakarākarākṣayeyaṃ
paramapadāsmaraṇātsamāgateha /
paramapadāvagamātprayāti nāśaṃ
vihagapatismaraṇādviṣavyatheva

ityārṣe śrīvāsiṣṭhamahārāmāyaṇe vā० mo० sthitiprakaraṇe bhārgavopākhyāne saṃsārotpattivistāravarṇanaṃ nāma dvādaśaḥ sargaḥ