Yoga Vasistha · Chapter 3.98

aṣṭanavatitamaḥ sargaḥ

śrīvasiṣṭha uvāca /
yataḥkutaścidutpannaṃ cittaṃ yatkiṃcideva hi /
nityamātmavimokṣāya yojayedyatnato'nagha

saṃyojitaṃ pare cittaṃ śuddhaṃ nirvāsanaṃ bhavet /
tatastu kalpanāśūnyamātmatāṃ yāti rāghava

cittāyattamidaṃ sarvaṃ jagatsthiracarātmakam /
cittādhīnavato rāma bandhamokṣāvapi sphuṭam

atrārthe kathyamānaṃ me cittākhyānamanuttamam /
brahmaṇā yatpurā proktaṃ śrṛṇu rāmātiyatnataḥ

asti rāmāṭavī sphārā śūnyāśāntātibhīṣaṇā /
yojanānāṃ śataṃ yasyāṃ lakṣyate kaṇamātrakam

tasyāmeko hi puruṣaḥ sahasrakaralocanaḥ /
paryākulamatirbhīmaḥ saṃsthito vitatākṛtiḥ

sa sahasreṇa bāhūnāmādāya parighānbahūn /
praharatyātmanaḥ pṛṣṭhe svātmanaiva palāyate

dṛḍhaprahāraiḥ praharansvayamevātmanātmani /
pravidravati bhītātmā sa yojanaśatānyapi

krandanpalāyamāno'sau gatvā dūramitastataḥ /
śramavānvivaśākāro viśīrṇacaraṇāṅgakaḥ

patito'vaśa evāśu mahatyandho'ndhakūpake /
kṛṣṇarātritamobhīme nabhogambhīrakoṭare

tataḥ kālena bahunā so'ndhakūpātsamutthitaḥ /
punaḥ prahāraiḥ praharanvidravatyātmanātmanaḥ

punardūrataraṃ gatvā karañjavanagulmakam /
praviṣṭaḥ kaṇṭakavyāptaṃ śalabhaḥ pāvakaṃ yathā

tasmātkarañjagahanādviniḥsṛtya kṣaṇādiva /
punaḥ prahāraiḥ praharanvidravatyātmanātmanaḥ

punardūrataraṃ gatvā śaśāṅkakaraśītalam /
kadalīkānanaṃ kāntaṃ saṃpraviṣṭo hasanniva

kadalīkhaṇḍakāttasmādviniḥsṛtya kṣaṇātpunaḥ /
svayaṃ prahāraiḥ praharanvidravatyātmanātmani

punardūrataraṃ gatvā tamevāndho'ndhakūpakam /
sa saṃpraviṣṭastvarayā viśīrṇāvayavākṛtiḥ

andhakūpātsamutthāya praviṣṭaḥ kadalīvanam /
kadalīkānanācchvabhraṃ karañjavanagulmakam

karañjakānanātkūpaṃ kūpādrambhāvanāntaram /
praviśanpraharaṃścaiva svayamātmani saṃsthitaḥ

evaṃrūpanijācāraḥ so'valokya ciraṃ mayā /
avaṣṭabhya balādeva muhūrtaṃ rodhitaḥ pathi

pṛṣṭaḥ sa kastvaṃ kimidaṃ kenārthena karoṣi vā /
kiṃ nāmābhimataṃ te'tra kiṃ mudhā parimuhyasi

iti pṛṣṭena kathitaṃ tena me raghunandana /
nāhaṃ kaścinna caivedaṃ mune kiṃcitkaromyaham

tvayāhamavabhagno'smi tvaṃ me śatruraho vata/
tvayā dṛṣṭo'smi naṣṭo'smi duḥkhāya ca sukhāya ca

ityuktvā viklavānyaṅgānyālokya svānyatuṣṭimān /
rurodātiravaṃ dīno megho varṣannivāṭavīm

kṣaṇamātreṇa tatrāsāvupasaṃhṛtya rodanam /
svānyaṅgāni samālokya jahāsa ca nanāda ca

athāṭṭahāsaparyante sa pumānpurato mama /
krameṇa tāni tatyāja svānyaṅgāni samaṃtataḥ

prathamaṃ patitaṃ tasya śiraḥ paramadāruṇam /
tataste bāhavaḥ paścādvakṣastadanu codaram

atha kṣaṇena sa pumāṃstānyaṅgāni yathākramam /
saṃtyajya niyateḥ śaktyā kvāpi gantumupasthitaḥ

dṛṣṭavānahamekānte punaranyaṃ tathā naram /
so'pi prahārānparitaḥ prayacchansvayamātmani

bāhubhiḥ pīvarākāraiḥ svayameva palāyate /
kūpe patati kūpāttu samutthāyābhidhāvati

punaḥ patati kuṇḍe'ntaḥ punarārtaḥ palāyate /
punaḥ praviśati śvabhraṃ kṣaṇaṃ śiśirakānanam

kaṣṭaṃ punaḥpunastuṣṭaḥ punaḥ praharati svayam /
evaṃprāyanijācāraściramālokya sasmayam

sa mayā samavaṣṭabhya paripṛṣṭastathaiva hi /
tenaivāsau krameṇādya ruditvā saṃprahasya ca

aṅgairviśīrṇatāmetya yayāvalamalakṣyatām /
vicārya niyateḥ śaktiṃ tato gantumupasthitaḥ

dṛṣṭavānahamekānte punaranyaṃ tathā naram /
praharaṃstadvadevāsau svayameva palāyate

palāyamānaḥ patito mahatyandhe'ndhakūpake /
tatrāhaṃ suciraṃ kālamavasaṃ tatpratīkṣakaḥ

yāvatsa sucireṇāpi kūpānnābhyuditaḥ śaṭhaḥ /
athāhamutthito gantuṃ dṛṣṭavānpuruṣaṃ punaḥ

tādṛśaṃ tādṛśākāraṃ prapatantaṃ tathaiva ca /
avaṣṭabhya tathaivāśu tasya proktaṃ punarmayā

tathaivotpalapatrākṣa nāsau tadavabuddhavān /
kevalaṃ māmasau mūḍho naiva jānāsi kiṃcana

āḥ pāpa durdvijetyuktvā svavyāpāraparo yayau /
atha tasminmahāraṇye tathā viharatā mayā

bahavastādṛśā dṛṣṭāḥ puruṣā doṣakāriṇaḥ /
matpṛṣṭāḥ kecidāyānti svapnasaṃbhramavacchamam

maduktaṃ nābhinandanti kecicchavatanuṃ yathā /
vinipatyāndhakūpebhyaḥ kecittatprotthitāḥ punaḥ

kadalīkhaṇḍakātkeciccireṇāpi na nirgatāḥ /
kecidantarhitāḥ sphāre karañjavanagulmake

na kvacitsthitimāyānti keciddharmaparāyaṇāḥ /
evaṃvidhā sā vitatā raghūdvaha mahāṭavī

adyāpi vidyate yasyāmitthaṃ te puruṣāḥ sthitāḥ /
sā ca dṛṣṭā tvayā rāma tvayeha vyavahāriṇī /
bālyāttu buddhitattvasya na tāṃ smarasi rāghava

sā bhīṣaṇā vividhakaṇṭakasaṅkaṭāṅgī
ghorāṭavī ghanatamogahanāpi loke /
āgatya nirvṛtimalabdhaparāvabodhai-
rāsevyate kusumagulmakavāṭikeva

ityārṣe śrīvāsiṣṭhamahārāmāyaṇe vālmīkīye utpattiprakaraṇe cittopākhyānaṃ nāmāṣṭanavatitamaḥ sargaḥ