Yoga Vasistha · Chapter 3.91

ekanavatitamaḥ sargaḥ

bhānuruvāca /
tenaitadvacmi bhavaganyathākālaṃ mano mune /
anigrāhyamabhedyaṃ ca śāpairapi durāsadaiḥ

aindavānāmataḥ sṛṣṭikramāṇāṃ pravināśanam /
yujyate na ca tadbrahmanyuktametanmahātmanaḥ

kiṃ tadasti jagatyasminvividheṣu jagatsu ca /
tavāpi nātha nāthasya yaddainyāya mahātmanaḥ

mano hi jagatāṃ kartṛ mano hi puruṣaḥ smṛtaḥ /
yanmanoniścayakṛtaṃ taddravyauṣadhidaṇḍanaiḥ

hantuṃ na śakyate jantoḥ pratibimbaṃ maṇeriva /
tasmādete'tra tiṣṭhantu bhāsuraiḥ sargasaṃbhramaiḥ

tvaṃ sṛṣṭveha prajāstiṣṭha buddhyākāśo hyanantakaḥ /
cittākāśaścidākāśa ākāśaśca tṛtīyakaḥ

anantāstraya evaite cidākāśaprakāśitāḥ /
ekaṃ dvau trīnbahūnvāpi kuru sargāñjagatpate

svecchayātmani tiṣṭha tvaṃ kiṃ gṛhītaṃ tavaindavaiḥ /
brahmovāca /
athaindavajagajjāle bhānunaivamudāhṛte

mayā saṃcintya suciramidamuktaṃ mahāmune /
yuktamuktaṃ tvayā bhāno vitataṃ hi kilāmbaram

manaśca vitataṃ vāpi cidākāśaśca vistṛtaḥ /
tadyathābhimataṃ sargaṃ nityakarma karomyaham

kalpayāmi bahūnyāśu bhūtajālāni bhāskara /
tattvamevāśu bhagavanprathamo me manurbhava

kuru sargaṃ yathākāmaṃ mayā samabhicoditaḥ /
athaitatsa mahātejā mama vākyaṃ prabhākaraḥ

aṅgīkṛtya dvidhātmānaṃ cakāra tapatāṃvara /
ekena prāktanenāsminvapuṣā sūryatāṃ gataḥ

vyomādhvagatayā sarge tatāna divasāvalim /
manmanutvaṃ dvitīyena kṛtvā svavapuṣā kṣaṇāt

sasarja sakalāṃ sṛṣṭiṃ tāṃ tāmabhimatāṃ mama

etatte kathitaṃ sarvaṃ vasiṣṭhamanaso mune /
svarūpaṃ sarvakṛttvaṃ ca śaktatvaṃ ca mahātmanaḥ

pratibhāsamupāyāti yadyadasya hi cetasaḥ /
tattatprakaṭatāmeti sthairyaṃ saphalatāmapi

sāmānyabrāhmaṇā bhūtvā pratibhāsavaśātkila /
aindavā brahmatāṃ yātā manasaḥ paśya śaktatām

yathā caindavajīvāste citratvādbrahmatāṃ gatāḥ /
vayaṃ tathaiva cidbhāvāccittatvādbrahmatāṃ gatāḥ

cittaṃ hi pratibhāsātma yacca tatpratibhāsanam /
tadidaṃ bhāti dehādi svāntaṃ nānyāsti dehadṛk

cittamātmacamatkāraṃ tacca tatkurute svataḥ /
yathāvatsaṃbhavaṃ svātmanyevāntarmaricādivat

tadetaccittavadbhātamātivāhikanāmakam /
tadevodāharantyevaṃ dehanāmnā ghanabhramam

kathyate jīvanāmnaitaccittaṃ pratanuvāsanam /
śāntadehacamatkāraṃ jīvaṃ viddhi kramātparam

nāhaṃ na cānyadastīha citraṃ cittamidaṃ sthitam /
vasiṣṭhaindavasaṃvidvadasatsattāmivāgatam

yathaindava mano brahmā tathaivāyamahaṃ sthitaḥ /
tatkṛtaṃ cāhamevedaṃ saṃkalpātmaiva bhāsate

kaściccittavilāso'yaṃ brahmāhamiha saṃsthitaḥ /
svabhāva eva dehādi viddhi śūnyatarātmakhāt

śuddhacitparamārthaikarūpiṇītyeva bhāvanāt /
jīvo bhūyo mano bhūtvā vettītthaṃ dehatāṃ mudhā

sarvamaindavasaṃsāravadidaṃ bhāti cidvapuḥ /
saṃpannasaṃprabodhātmā svapno dīrghaḥ svaśaktijaḥ

dvicandravibhramākāraṃ tanmātrābhāsapūrvakam /
aindavāmbaravadrūḍhaṃ cittādevākhilaṃ bhavet

na sannāsadahaṃrūpaṃ sattāsatte tadeva ca /
upalambhena sadrūpamasatyaṃ tadvirodhataḥ

jaḍājaḍaṃ mano viddhi saṃkalpātma bṛhadvapuḥ /
ajaḍaṃ brahmarūpatvājjaḍaṃ dṛśyātmatāvaśāt

dṛśyānubhavasatyātma na sadbhāve vilāsi tat /
kaṭakatvaṃ yathā hemni tathā brahmaṇi saṃsthitam

sarvatvādbrahmaṇaḥ sarvaṃ jaḍaṃ cinmayabheva ca /
asmadādiśilāntātma na jaḍaṃ na ca cetanam

dārvādīnāmacittvena nopalambhasya saṃbhavaḥ /
upalambho hi sadṛśasaṃbandhādeva jāyate/

upalabdhe'jaḍaṃ viddhi tenedaṃ sarvameva hi /
upalambho hi sadṛśasaṃbandhātsyātsamātmanoḥ

jaḍacetanabhāvādiśabdārthaśrīrna vidyate /
anirdeśyapade patralatādīva mahāmarau

cito yaccetyakalanaṃ tanmanastvamudāhṛtam /
cidbhāgo'trājaḍo bhāgo jāḍyamatra hi cetyatā

cidbhāgo'trāvabodhāṃśo jaḍaṃ cetyaṃ hi dṛśyate /
iti jīvo jagadbhāntiṃ paśyangacchati lolatām

cittasya eva bhāvo'sau śuddha eva dvidhā kṛtaḥ /
ataḥ sarvaṃ jagatsaiva dvaitalabdhaṃ ca saiva tat

svamevānyatayā dṛṣṭvā citirdṛśyatayā vapuḥ /
nirbhāgāpyekabhāgābhaṃ bhramatīva bhramāturā

na bhrāntirasti bhramabhāṅgā naivetīha niścayaḥ /
paripūrṇārṇavaprakhyāvetītthaṃ saṃsthitā citiḥ

sarvaṃ syājjāḍyamapyasyāścitiścittvaṃ ca vetsi tat /
cidbhāgoṃśo'vabodhasya tvahaṃtājaḍatodayaḥ

ahaṃtādipare tattve manāgapi na vidyate /
ūrmyādīva pṛthaktoye saṃvitsāraṃ hi tadyataḥ

ahaṃpratyayasaṃdṛśyaṃ cetyaṃ viddhi samutthitam /
mṛgatṛṣṇāmbvivāntasthaṃ nūnaṃ vidyata eva no

ahaṃtāpadamantātmapadaṃ viddhi nirāmayam /
vidaṃ vidurahaṃtādi śaityameva yathā himam

citteva cetyate jāḍyaṃ svapne svamaraṇopamam /
sarvātmatvātsarvaśaktīḥ kurvatī naiti sāmyatām

manaḥ padārthāditayā sarvarūpaṃ vijṛmbhate /
nānātmācittadeho'yamākāśaviśadākṛtiḥ

dehādidehapratibhārūpātmyaṃ tyajatā satā /
vicāryaṃ pratibhāsātma cittaṃ cittena vai svayam

cittatāmre śodhite hi paramārthasuvarṇatām /
gate'kṛtrima ānandaḥ kiṃ dehopalakhaṇḍakaiḥ

yadvidyate śodhyate tadbodhaḥ ke ca khapādapāḥ /
dehādyavidyā satyā cedyukta etāṃ prati grahaḥ

asatyaviniviṣṭānāṃ dehavācitayā tviha /
ye nāmopadiśantyajñāḥ kiṃcitte puruṣaiḍakāḥ

yathaitadbhāvayetsvāntaṃ tathaiva bhavati kṣaṇāt /
dṛṣṭānto'traindavāhalyākṛtrimendrādiniścayāḥ

yadyadyathā sphurati supratibhātmacittaṃ
tattattathā bhavati dehatayoditātma /
deho'yamasti na na cāhamiti svarūpaṃ
vijñānamekamavagamya niricchamāssva

deho'yameṣa ca kilāyamiti svabhāvā-
ddeho'yametadakhilaṃ tata eti nāśam /
yakṣādikalpanavaśādbhayameti bālo
niryakṣadehagata eva kayāpi yuktyā

ityārṣe śrīvāsiṣṭhamahārāmāyaṇe vālmīkīye utpattiprakaraṇe jīvāvataraṇakramopadeśo nāmaikanavatitamaḥ sargaḥ