Yoga Vasistha · Chapter 3.90

navatitamaḥ sargaḥ

bhānuruvāca /
athendreṇaivamukto'sau rājā rājīvalocanaḥ /
muniṃ bharatanāmānaṃ pārśvasaṃsthamuvāca ha

rājovāca /
bhagavansarvadharmajña paśyāmi sudurātmanaḥ /
bhṛśamasya mukhe sphāraṃ dhārṣṭyaṃ maddārahāriṇaḥ

pāpānurūpamasyāśu śāpaṃ dehi mahāmune /
yadavadhyavadhātpāpaṃ vadhyatyāgāttadeva hi

ityukto rājasiṃhena bharato munisattamaḥ /
yathāvatpravicāryāśu pāpaṃ tasya durātmanaḥ

sahānayā duṣkṛtinyā bhartṛdrohābhibhūtayā /
vināśaṃ vraja durbuddhe iti śāpaṃ visṛṣṭavān

tatastau rājabharatau pratyūcaturidaṃ vacaḥ /
sudurmatī yuvāṃ yābhyāṃ kṣapitaṃ duścaraṃ tapaḥ

anena śāpadānena kiṃcidbhavati nāvayoḥ /
dehe naṣṭe na nau kiṃcinnaśyati svāntarūpayoḥ

svāntaṃ hi nahi kenāpi śakyate nāśituṃ kvacit /
sūkṣmatvāccinmayatvācca durlakṣyatvācca viddhi nau

śrībhānuruvāca /
sughanasnehasaṃbaddhamanaskāveva śāpataḥ /
patitau bhūtale vṛkṣavicyutāviva pallavau

atha vyasanasaṃsaktau mṛgayonimupāgatau /
tato dvāvapi saṃsaktau bhūyo jātau vihaṃgamau

athāsmākaṃ vibho sarge mithaḥsaṃbandhabhāvanau /
tapaḥparau mahāpuṇyau jātau brāhmaṇadampatī

bhārato'pi tayoḥ śāpaḥ sa samartho babhūva ha /
śarīramātrākramaṇe na manonigrahe prabho

tāvadyāpi hi tenaiva mohasaṃskārahetunā /
yatra yatra prajāyete bhavatastatra dampatī

akṛtrimapremarasānuviddhaṃ
snehaṃ tayoste prativīkṣya kāntam /
vṛkṣā api premarasānuviddhāḥ
śṛṅgāraceṣṭākulitā bhavanti

ityārṣe śrīvāsiṣṭhamahārāmāyaṇe vālmīkīye utpattiprakaraṇe kṛtrimendrāhalyānurāgo nāma navatitamaḥ sargaḥ