Yoga Vasistha · Chapter 3.88

aṣṭāśītitamaḥ sargaḥ

śrībrahmovāca /
brahmāṇo brāhmaṇā bhānurityuktvā brahmaṇo mama /
brahmanbrahmavidāṃ śreṣṭha tūṣṇīmeva babhūva saḥ

tata uktaṃ mayā tasya ciraṃ saṃcintya cetasā /
bhāno bhāno vadāśu tvaṃ kimanyatsaṃsṛjāmyaham

etāni daśa vidyante kila yatra jaganti vai /
tatrānyo mama sargeṇa ko'rthaḥ kathaya bhāskara

ityukto'tha mayā bhānuḥ saṃcintya suciraṃ dhiyā /
idamatra vaco yuktamuvāca sa mahāmune

bhānuruvāca /
nirīhasya niricchasya ko'rthaḥ sargeṇa te prabho /
vinodamātramevedaṃ sṛṣṭistava jagatpate

niṣkāmādeva bhavataḥ sargaḥ saṃpadyate prabho /
arkādiva jalādityapratibimbamivādhiyaḥ

śarīrasaṃniveśasya tyāge rāge ca te yadā /
niṣkāmo bhagavanbhāvo nābhivāñchati nojjhati

sṛjasīdaṃ tathā deva vinodāyaiva bhūtapa /
punaḥ saṃhṛtya saṃhṛtya dinaṃ dinapatiryathā

tava nityamasaṃsaktaṃ vinodāyaiva kevalam /
idaṃ kartavyameveti jaganna tūdyamecchayā

sṛṣṭiṃ cenna karoṣi tvaṃ maheśa paramātmanaḥ /
nityakarmaparityāgātkimapūrvamavāpsyasi

yathāprāptaṃ hi kartavyamasaktena sadā satā /
mukureṇākalaṅkena pratibimbakriyā yathā

yathaiva karmakaraṇe kāmanā nāsti dhīmatām /
tathaiva karmatyāge kāmanā nāsti dhīmatām

ataḥ suṣuptopamayā dhiyā niṣkāmayā tayā /
suṣuptabuddhasamayā kuru kāryaṃ yathāgatam

sargairathenduputrāṇāṃ toṣameṣi jagatprabho /
tadete toṣayiṣyanti taṃ tvāṃ sargātsureśvara

cittanetrairbhavānetānsargānanyasya no dṛśā /
avaśyaṃ cakṣuṣā sargaṃ sṛṣṭamityeva vetti kaḥ

yenaiva manasā sargo nirmitaḥ parameśvara /
sa eva māṃsanetreṇa taṃ paśyati hi netaraḥ

na caitāndaśa saṃsārāndaśa nīrajasaṃbhavān /
kaścinnāśayituṃ śaktaścittadārḍhyāccirasthitān

karmendriyairyatkriyate tadroddhuṃ kila yujyate /
na manoniścayakṛtaṃ kaścidrodhayituṃ kṣamaḥ

yo baddhapadatāṃ yāto jantormanasi niścayaḥ /
sa tenaiva vinā brahmannānyena vinivāryate

bahukālaṃ yadabhyastaṃ manasā dṛḍhaniścayam /
śāpenāpi na tasyāsti kṣayo naṣṭe'pi dehake

yadbaddhapīṭhamabhito manasi prarūḍhaṃ
tadrūpameva puruṣo bhavatīha nānyat /
tadbodhanāditaramatra kilābhyupāyaṃ
śailaughasekamiva niṣphalameva manye

ityārṣe śrīvāsiṣṭhamahārāmāyaṇe vā० utpattiprakaraṇe ai० aindavaniścayakathanaṃ nāmāṣṭāśītitamaḥ sargaḥ