Yoga Vasistha · Chapter 3.87

saptāśītitamaḥ sargaḥ

bhānuruvāca /
pitāmahakrame tasmiṃstataste bahubhāvanāt /
karmabhistaiḥ samākrāntamanaskāstasthurādṛtāḥ

yāvatte dehakāsteṣāṃ tāpena pavanaistathā /
kālena śoṣamabhyetya galitāḥ śīrṇaparṇavat

jakṣustāndehakāṃstatra kravyādā vanavāsinaḥ /
itaścetaśca luṭhitānsuphalānīva markaṭāḥ

atha te śāntabāhyārthā brahmatve kṛtabhāvanāḥ /
tasthuścaturyugasyānte yāvatkalpaḥ kṣayaṃ gataḥ

kṣīyamāṇe tataḥ kalpe tapatyādityasaṃcaye /
puṣkarāvartakeṣūccairvarṣatsu kaṭhināravam

vahatsu kalpavāteṣu sthita ekamahārṇave /
kṣīṇeṣu bhūtavṛndeṣu te tathaiva vyavasthitāḥ

tato rātrikramapare sarvāṃ saṃhṛtya tāṃ sthitim /
sthite tvayyātmani vibho te tathaiva vyavasthitāḥ

adya prabuddhe bhavati sraṣṭumicchati saṃsṛtim /
sukhenaiva krameṇoccaiste tathaiva vyavasthitāḥ

tathaite bhagavanbrahmanbrahmaṇo brāhmaṇā daśa /
ta ete daśa saṃsārā manovyomani saṃsthitāḥ

teṣāmekatamasyāhamayamākāśamandire /
bhānurbhuvi vibho kālakalākarmaṇi yojitaḥ

eṣa te kathitaḥ sargo diśānāmalasaṃbhava /
brahmaṇāṃ saṃbhavo vyomni yathecchasi tathā kuru

vividhakalpanayā valitāmbaraṃ
yadidamuttama jāgatamutthitam /
karaṇajālakamāhitamohanaṃ
tadakhilaṃ nijacetasi vibhramaḥ

ityārṣe śrīvāsiṣṭhamahārāmāyaṇe vālmīkīye de० mo० u० aindavo० daśajagadvarṇanaṃ nāma saptāśītitamaḥ sargaḥ