યોગવાસિષ્ઠ · અધ્યાય 3.87

સપ્તાશીતિતમઃ સર્ગઃ

ભાનુરુવાચ ।
પિતામહક્રમે તસ્મિંસ્તતસ્તે બહુભાવનાત્ ।
કર્મભિસ્તૈઃ સમાક્રાન્તમનસ્કાસ્તસ્થુરાદૃતાઃ

યાવત્તે દેહકાસ્તેષાં તાપેન પવનૈસ્તથા ।
કાલેન શોષમભ્યેત્ય ગલિતાઃ શીર્ણપર્ણવત્

જક્ષુસ્તાન્દેહકાંસ્તત્ર ક્રવ્યાદા વનવાસિનઃ ।
ઇતશ્ચેતશ્ચ લુઠિતાન્સુફલાનીવ મર્કટાઃ

અથ તે શાન્તબાહ્યાર્થા બ્રહ્મત્વે કૃતભાવનાઃ ।
તસ્થુશ્ચતુર્યુગસ્યાન્તે યાવત્કલ્પઃ ક્ષયં ગતઃ

ક્ષીયમાણે તતઃ કલ્પે તપત્યાદિત્યસંચયે ।
પુષ્કરાવર્તકેષૂચ્ચૈર્વર્ષત્સુ કઠિનારવમ્

વહત્સુ કલ્પવાતેષુ સ્થિત એકમહાર્ણવે ।
ક્ષીણેષુ ભૂતવૃન્દેષુ તે તથૈવ વ્યવસ્થિતાઃ

તતો રાત્રિક્રમપરે સર્વાં સંહૃત્ય તાં સ્થિતિમ્ ।
સ્થિતે ત્વય્યાત્મનિ વિભો તે તથૈવ વ્યવસ્થિતાઃ

અદ્ય પ્રબુદ્ધે ભવતિ સ્રષ્ટુમિચ્છતિ સંસૃતિમ્ ।
સુખેનૈવ ક્રમેણોચ્ચૈસ્તે તથૈવ વ્યવસ્થિતાઃ

તથૈતે ભગવન્બ્રહ્મન્બ્રહ્મણો બ્રાહ્મણા દશ ।
ત એતે દશ સંસારા મનોવ્યોમનિ સંસ્થિતાઃ

તેષામેકતમસ્યાહમયમાકાશમન્દિરે ।
ભાનુર્ભુવિ વિભો કાલકલાકર્મણિ યોજિતઃ

એષ તે કથિતઃ સર્ગો દિશાનામલસંભવ ।
બ્રહ્મણાં સંભવો વ્યોમ્નિ યથેચ્છસિ તથા કુરુ

વિવિધકલ્પનયા વલિતામ્બરં
યદિદમુત્તમ જાગતમુત્થિતમ્ ।
કરણજાલકમાહિતમોહનં
તદખિલં નિજચેતસિ વિભ્રમઃ

ઇત્યાર્ષે શ્રીવાસિષ્ઠમહારામાયણે વાલ્મીકીયે દે૦ મો૦ ઉ૦ ઐન્દવો૦ દશજગદ્વર્ણનં નામ સપ્તાશીતિતમઃ સર્ગઃ