Yoga Vasistha · Chapter 3.79

ekonāśītitamaḥ sargaḥ

śrīvasiṣṭha uvāca /
ityuktvā rākṣasī praśnānsā vaktumupacakrame / /
ucyatāmiti rājñokte tānimānśṛṇu rāghava

rākṣasyuvāca /
ekasyānekasaṃkhyasya kasyāṇorambudheriva /
antarbrahmāṇḍalakṣāṇi līyante budbudā iva

kimākāśamanākāśaṃ na kiṃcitkiṃcideva kim /
ko'hamevāsi saṃpannaḥ ko bhavānapyahaṃ sthitaḥ

gacchanna gacchati ca kaḥ ko'tiṣṭhannapi tiṣṭhati /
kaścetano'pi pāṣāṇaḥ kaścidvyomni vicitrakṛt

vahnitāmajahaccaiva kaśca vahniradāhakaḥ /
avahnerjāyate vahniḥ kasmādrājannirantaram

acandrārkāgnitāro'pi ko'vināśaḥ prakāśakaḥ /
anetralabhyātkasmācca prakāśaḥ saṃpravartate

latāgulmāṅkurādīnāṃ jātyandhānāṃ tathaiva ca /
anyeṣāmapyanakṣāṇāmālokaḥ ka ivottamaḥ

janakaḥ ko'mbarādīnāṃ sattāyāḥ kaḥ svabhāvadaḥ /
ko jagadratnakośaḥ syātkasya kośo maṇerjagat

ko'ṇustamaḥprakāśaḥ syātko'ṇurasti ca nāsti ca /
ko'ṇurdūre'pyadūre ca ko'ṇureva mahāgiriḥ

nimeṣa eva kaḥ kalpaḥ kaḥ kalpo'pi nimeṣakaḥ /
kiṃ pratyakṣamasadrūpaṃ kiṃ cetanamacetanam

kaśca vāyuravāyuśca kaḥ śabdo'śabda eva kaḥ /
kaḥ sarvaṃ na ca kiṃcicca ko'haṃ nāhaṃ ca kiṃ bhavet

kiṃ prayatnaśataprāpyaṃ labdhvāpi bahujanmani /
labdhaṃ na kiṃcidbhavati kiṃtu sarvaṃ na labhyate

svasthena jīvitenoccaiḥ kenātmaivāpahāritaḥ /
kenāṇunāntaḥ kriyate merustribhuvanaṃ tṛṇam

kenāpyaṇukamātreṇa pūritā śatayojanī /
ko'ṇureva bhavanmāti na yojanaśateṣvapi

kenālokanamātreṇa jagadvālaḥ pranāṭyate /
kasyāṇorudare santi kilāvanibhṛtāṃ ghaṭāḥ

aṇutvamajahatko'ṇurmeroḥ sthūlatarākṛtiḥ /
vālāgraśatabhāgātmā ko'ṇuruccaiḥ śiloccayaḥ

ko'ṇuḥ prakāśatamasāṃ dīpaḥ prakaṭanapradaḥ /
kasyāṇorudare santi samagrānubhavāṇavaḥ

ko'ṇuratyantaniḥsvādurapi saṃsvadate'niśam /
kena saṃtyajatā sarvamaṇunā sarvamāśritam

kenātmācchādanāśaktenāṇunācchāditaṃ jagat /
jagallaye na kasyāṇoḥ sadbhūtamapi jīvati

ajātāvayavaḥ ko'ṇuḥ sahasrakaralocanaḥ /
ko nimeṣo mahākalpaḥ kalpakoṭiśatāni ca

aṇau jaganti tiṣṭhanti kasminbīja iva drumaḥ /
bījāni niṣkalāntāni sphuṭānyanuditānyapi

kalpaḥ kasya nimeṣasya bījasyevāntarasthitaḥ /
kaḥ prayojanakartṛtvamapyanāśritya kārakaḥ

dṛśyasaṃpattaye draṣṭā svātmānaṃ dṛśyatāṃ nayan /
dṛśyaṃ paśyansvamātmānaṃ ko hi paśyatyanetravān

antargalitadṛśyaṃ ca ka ātmānamakhaṇḍitam /
dṛśyāsaṃpattaye paśyanpuro dṛśyaṃ na paśyati

ātmānaṃ darśanaṃ dṛśyaṃ ko bhāsayati dṛśyavat /
kaṭakādīni hemneva vikīrṇaṃ kena ca trayam

kasmānna kiṃcicca pṛthagūrmyādīva mahāmbhasaḥ /
kasyecchayā pṛthakcāsti vīciteva mahāmbhasaḥ

dikkālādyanavacchinnādekasmādasataḥ sataḥ /
dvaitamapyapṛthakkasmāddravateva mahāmbhasaḥ

ātmānaṃ darśanaṃ dṛśyaṃ sadasacca jagattrayam /
ko'ntarbījamivāntasthaṃ sthitaḥ kṛtvā trikālagaḥ

bhūtaṃ bhavadbhaviṣyacca jagadvṛndaṃ bṛhadbhramam /
nityaṃ samasya kasyāntarbījasyāntariva drumaḥ

bījaṃ drumatayevāśu drumo bījatayeva ca /
svamekamajahadūpamudetyanudito'pi kaḥ

bisatanturmahāmerurbho rājanyadapekṣayā /
tasya kasyodare santi merumandarakoṭayaḥ

kenedamātatamanekacideva viśvaṃ
kiṃsāra evamativalgasi haṃsi pāsi /
kiṃdarśanena na bhavasyathavā sadaiva
nūnaṃ bhavasyamaladṛgvadanaḥ svaśāntyai

eṣo'sau pragalatu saṃśayo mamoccai-
ścittaśrīmukhamihikāmalānulepaḥ /
yasyāgre na galati saṃśayaḥ samūlo
naivāsau kvacidapi paṇḍitoktimeti

evaṃ me yadi na vineṣyathaḥ kramoktaṃ
saṃśāntaṃ laghutarasaṃśayaṃ subuddhī /
tadrakṣojaraṭhahutāśanendhanatvaṃ
nirvighnaṃ jhaṭiti gamiṣyathaḥ kṣaṇena

paścāttāṃ janapadamaṇḍalīṃ samantā-
dbhāvatkīmurujaṭharā kṣaṇādgrase'ham /
evaṃ te bhavatu surājateti manye
mūrkhāṇāmatirasa eva saṃkṣayāya

ityuktvā vipulagabhīrameghanāda-
prollāsaprakaṭagirā niśācarī sā /
tūṣṇīmapyativikaṭākṛtistadāsī-
cchuddhāntaḥ śaradamalābhramaṇḍalīva

ityārṣe śrīvāsiṣṭhamahārāmāyaṇe utpattiprakaraṇe ka० rākṣasīpraśro nāmaikonāśītitamaḥ sargaḥ