Yoga Vasistha · Chapter 3.76

ṣaṭsaptatitamaḥ sargaḥ

śrīvasiṣṭha uvāca /
athābhavadasau sūcī karkaṭīrākṣasī punaḥ /
sūkṣmaiva sthaulyamāyātā meghalekheva vārṣikī

nijamākāśamāsādya kiṃcitpramuditā satī /
vṛhadrākṣasabhāvaṃ tadbodhātkañcukavajjahau //
tatraiva dhyāyatī tasthau baddhapadmāsanasthitiḥ /
vyālambya saṃvidaṃ śuddhāṃ saṃsthitā girikūṭavat

atha sā māsaṣaṭkena dhyānādbodhamupāgatā /
mahājaladanādena prāvṛṣīva śikhaṇḍinī

prabuddhā sā bahirvṛttirbabhūva kṣutparāyaṇā /
yāvaddehaṃ svabhāvo'sya dehasya na nivartate

atha sā kiṃ grasa iti cintayāmāsa cintayā /
bhoktavyaḥ parajīvaśca nyāyena na vinā mayā

yadāryagarhitaṃ yadvā nyāyena na samarjitam /
tasmādgrāsādvaraṃ manye maraṇaṃ dehināmidam

yadi dehaṃ tyajāmīdaṃ tannyāyopārjitaṃ vinā /
na kiṃcidasti nirnyāyaṃ bhukto'rtho hi garāyate

yatra lokakramaprāptaṃ tena bhuktena kiṃ bhavet /
na jīvitena no mṛtyā kiṃcitkāraṇamasti me

manomātramahaṃ hyāsaṃ dehādibhramabhūṣaṇam /
tacchāntaṃ svāvabodhena dehādehadṛśau kutaḥ

śrīvasiṣṭha uvāca /
evaṃ sthitā maunavatī śuśrāva gaganādgiram /
rakṣaḥsvarūpasaṃtyāgatuṣṭenoktāṃ nabhasvatā

gaccha karkaṭi mūḍhāṃstvaṃ jñānenāśvavabodhaya /
mūḍhottāraṇameveha svabhāvo mahatāmiti

bodhyamāno bhavatyāpi yo na bodhamupaiṣyati /
svanāśāyaiva jāto'sau nyāyyo grāso bhavettava

śrutvetyanugṛ'hītāsmi tvayetyuktavatī śanaiḥ /
uttasthau śailaśikharātkramādavaruroha ca

adhityakāmatītyāśu gatvā copatyakātaṭān /
viveśa śailapādasthaṃ kirātajanamaṇḍalam

bahvannapaśulokaughadravyaśaṣpauṣadhāmiṣam /
anantamūlapānānnamṛgakīṭakhagādikam

pracalitavalitāñjanācalābhā
himagiripādaniveśitaṃ sudeśam /
tadanugatavatī niśācarī sā
niśi sughanāndhatamisramārgabhūmau

ityārṣe śrīvāsiṣṭhamahārāmāyaṇe mokṣopāyeṣūtpattiprakaraṇe anyāyabādhiko nāma ṣaṭsaptatitamaḥ sargaḥ