Yoga Vasistha · Chapter 3.75

pañcasaptatitamaḥ sargaḥ

śrīvasiṣṭha uvāca /
atha varṣasahasreṇa tāṃ pitāmaha āyayau /
varaṃ putri gṛhāṇeti vyājahāra nabhastalāt

sūcī karmendriyābhāvājjīvamātrakalāvatī /
na kiṃcidvyājahārāsmai cintayāmāsa kevalam

pūrṇāsmi gatasaṃdehā kiṃ vareṇa karomyaham /
śāmyāmi parinirvāmi sukhamāse ca kevalam

jñātaṃ jñātavyamakhilaṃ śāntā saṃdehajālikā /
svaviveko vikasitaḥ kimanyena prayojanam

yathā sthiteyamasmīha saṃtiṣṭheyaṃ tathaiva hi /
satyāsatyakalāmeva tyaktvā kimitareṇa me

etāvantamahaṃ kālamavivekena yojitā /
svasaṃkalpasamutthena vetāleneva bālikā

idānīmupaśānto'sau svavicāraṇayā svayam /
īpsitānīpsitairarthaḥ ko bhavetkalitairmama

iti niścayayuktāṃ tāṃ sūcīṃ karmendriyojjhitām /
tūṣṇīṃsthitā saniyatiḥ sa paśyanbhagavānsthitaḥ

brahmā punaruvācedaṃ vītarāgāṃ prasannadhīḥ /
varaṃ putri gṛhāṇa tvaṃ kiṃcitkālaṃ ca bhūtale

bhogānbhuktvā tataḥ paścādgamiṣyasi paraṃ padam /
avyāvṛttisvarūpāyā niyatereṣa niścayaḥ

tapasānena saṃkalpaḥ saphalo'stu tavottame /
pīnā bhava punaḥ śaile himakānanarākṣasī

yayā pūrvaṃ viyuktāsi tanvā jaladarūpayā /
bījāntavṛkṣatā putri bṛhadvṛkṣatayā yathā

yogameṣyasi bhūyaśca tanvāntarbījarūpiṇī /
tayaiva rasasekena latayevāṅkurasthitiḥ

bādhāṃ viditavedyatvānna ca loke kariṣyasi /
antaḥśuddhā spandavatī śāradīvābhramaṇḍalī

aśrāntadhyānaniratā kadācillīlayā yadi /
bhaviṣyasi bahīrūpā sarvātmadhyānarūpiṇī

vyavahārātmakadhyānadhāraṇādhārarūpiṇī /
vātasvabhāvavaddehaparispandādvilāsinī

tadā virodhinī putri svakarmaspandarodhinī /
nyāyena kṣunnivṛttyarthaṃ bhūtabādhāṃ kariṣyasi

bhaviṣyasi nyāyavṛttirloke tvanyāyabādhikā /
jīvanmuktatayā dehe svavivekaikapālikā

ityuktvā gaganatalājjagāma devaḥ sūcī sā bhavatu mameti kiṃ virodhaḥ /
rāgo vābjajavacanārthavāraṇe'sminnityantaḥ svatanumayī manāgbabhūva // १९.
prādeśaḥ prathamamabhūttato'pi hasto vyāmaścāpyatha viṭapastato'bhramālā /
sodyatsvāvayavalatā babhau nimeṣātsaṃkalpadrumakaṇikāṅkurakrameṇa

tadgātrāṇyavikalaśaktimanti dehādudbhūtānyatha karaṇendriyāṇi samyak /
saṃkalpadrumavanapuṣpavatsamantādbījaughānyalamabhavaṃstirohitāni

ityārṣe śrīvāsiṣṭhamahārāmāyaṇe vālmīkīye utpattiprakaraṇe sūcyupākhyāne sūcīśarīralābho nāma pañcasaptatitamaḥ sargaḥ