Yoga Vasistha · Chapter 3.74

catuḥsaptatitamaḥ sargaḥ

śrīvasiṣṭha uvāca /
tasya tatrordhvaśṛṅgasya tasyāṃ bhuvi mahāvanau /
dadarśa madhyamāṃ sūcīṃ protthitāṃ saśikhāmiva

ekapādaṃ tapasyantīṃ śuṣyantīṃ śiraūṣmaṇā /
satatānaśanāṃ śuṣkapiṇḍībhūtodaratvacam

sakṛdvikasitāsyena gṛhītvevātapānilān /
paścāttyajantīṃ hṛdaye me na māntītyanāratam

śuṣkāṃ caṇḍāṃśukiraṇairjarjarāṃ vanavāyubhiḥ /
acalantīnijātsthānātsnāpitāminduraśmibhiḥ

pūrvaṃ rajoṇunaikena saṃviṣṭacchannamastakām /
kṛtārthatvaṃ kathayatīṃ dadatānyasya nāspadam

araṇyānyeva dattvārtha ciraṃ jātaśikhāmiva /
mūrdhnyavasthāpitaprāṇajaṭājūṭavalīmiva

tāṃ prekṣya pavanaḥ sūcīṃ vismayākulacetanaḥ /
praṇamyālokya suciraṃ bhītabhīta ivāgataḥ

mahātapasvinī sūcī kimarthaṃ tapyate tapaḥ /
neti praṣṭuṃ śaśākāsau tattejorāśinirjitaḥ

bhagavatyā mahāsūcyā aho citraṃ mahātapaḥ /
ityeva kevalaṃ dhyāyanmāruto gaganaṃ yayau

samullaṅghyābhramārga tu vātaskandhānatītya ca /
siddhavṛndānadhaḥ kṛtvā sūryamārgamupetya ca

ūrdhvametya vimānebhyaḥ prāpa śakrapurāntare /
sūcīdarśanapuṇyaṃ tamāliliṅga puraṃdaraḥ

pṛṣṭaśca kathayāmāsa dṛṣṭaṃ sarvaṃ mayetyasau /
sahadevanikāyāya śakrāyāsthānavāsine

vāyuruvāca /
jambūdvīpe'sti śailendro himavānnāma sūnnataḥ /
jāmātā yasya bhagavānsākṣācchaśikalādharaḥ

tasyottare mahāśṛṅgapṛṣṭhe paramarūpiṇī /
sthitā tapasvinī sūcī tapaścarati dāruṇam

bahunātra kimuktena vātādyaśanaśāntaye /
yayā svodarasauṣiryaṃ piṇḍīkṛtvā nivāritam

śāntasaṃkocasūkṣmārthaṃ vikāsyāsyaṃ rajoṇunā /
tayādya sthagitaṃ śītavātāśananivṛttaye

tasyāstīvreṇa tapasā tuhinākaramutsṛjan /
agnyākāramayo gṛhṇan deva duḥsevyatāṃ gataḥ

taduttiṣṭhāśu gacchāmaḥ sarva eva pitāmaham /
tadvarārthamanarthāya viddhi tatsumahattapaḥ

iti vāteritaḥ śakraḥ sahadevagaṇena saḥ /
jagāma brahmaṇo lokaṃ prārthayāmāsa taṃ vibhum

sūcyā varamahaṃ dātuṃ gacchāmi himavacchiraḥ /
brahmaṇeti pratijñāte śakraḥ svargamupāyayau

etāvatātha kālena sā babhūvātipāvanī /
sūcī nijatapastāpatāpitāmaramandirā

mukharandhrasthitārkāṃśudṛśā svacchāyayaiva sā /
vikāsinyā vivartisthā coditāntamavekṣitā

kauśeyarūpayā sūcyā meruḥ sthairyeṇa nirjitaḥ /
majjanaṃ naiti vṛddhvaivaṃ muktamādyantayordine

madhyāhne tāpabhītyeva viśantyā mārutāntaram /
anyadā gauravāddṛṣṭvā dūrataḥ prekṣamāṇayā

sā tāmavekṣate kṣārāttāpādaṅge nimajjati /
saṃkaṭe vismaratyeva jano gauravasatkriyām

chāyāsūcī tāpasūcī yaścātmā sa tṛtīyayā /
trikoṇaṃ tapasā pūtaṃ vārāṇasyā samaṃ kṛtam

gatāstena trikoṇena trivarṇaparikhāvatā /
vāyavaḥ pāṃsavo ye'pi te parāṃ muktimāgatāḥ

viditaparamakāraṇādya jātā svayamanucetanasaṃvidaṃ vicārya /
svamananakalanānusāra ekastviha hi guruḥ paramo na rāghavānyaḥ

ityārṣe śravāsiṣṭhamahārāmāyaṇe utpattiprakaraṇe sūcītapaḥparipākavarṇanaṃ nāma catuḥsaptatitamaḥ sargaḥ