Yoga Vasistha · Chapter 3.71

ekasaptatitamaḥ sargaḥ

śrīvasiṣṭha uvāca /
atha sā bahukālena karkaṭī nāma rākṣasī /
sarveṣāṃ naramāṃsānāṃ natu tṛptimupāyayau

pūrveṇaiva kilāhnā sā tṛptā rudhirabindunā /
sūcyāḥ kimiva mātyantastṛṣṇāsūcī sudurbharā

cintayāmāsa hā kaṣṭaṃ kimahaṃ sūcitā gatā /
sūkṣmāsmi hataśaktiśca api grāso na māti ca

kva me tāni viśālāni gatānyaṅgāni durdhiyaḥ /
kālameghaviśālāni vane śīrṇāni parṇavat

mayyasyāṃ mandabhāgyāyāṃ manāgapi na māti hi /
svādumāṃsarasagrāso vasāvāsita āsayan

paṅkāntarvinimajjāmi patāmi dharaṇītale /
hastāsmi janapādaughaiḥ śukreṇa malināsmi ca

hā hatāhamanāthāhamanāśvāsā nirāspadā /
duḥkhādduḥkhe nimajjāmi saṃkaṭātsaṃkaṭe'pi ca

na sakhī na ca me dāsī na me mātā na me pitā /
na me bandhurna me bhṛtyā na me bhrātā na me sutaḥ

na me deho na me sthānaṃ na me kaścitsamāśrayaḥ /
naikasthāne samāvāso bhrāmyāmi vanaparṇavat

āpadāṃ dhuri tiṣṭhāmi niviṣṭāsmi sudāruṇe /
abhāvamapi vāñchāmi so'pi saṃpadyate na me

svako dehaḥ parityakto mūḍhacetanayā mayā /
kācabuddhyā vimūḍhena hastāccintāmaṇiryathā

āpataddhi mano mohaṃ pūrvamāpatprayacchati /
paścādanarthavistārarūpeṇa parijṛmbhate

dhūmeṣu paritiṣṭhāmi mārge vilulitāsmi ca /
tṛṇeṣu preṣitāsmyantarhā me duḥkhaparamparā

parapraiṣakarī nityaṃ parasaṃcāracāriṇī /
paraṃ kārpaṇyamāyātā jātā paravaśāsmyalam

bhrāntiṃ karomi tucche ca sāpi vedhanarūpiṇī /
aho mamālpabhāgyāyā daurbhāgyamapi durbhagam

utthitaḥ sphāravetālaḥ kurvatyāḥ śāntimadya me /
sarvanāśo'vadātena pravṛttāyā mamoditā

kiṃ mandayā mayā tādṛksaṃtyaktaṃ tanmahāvapuḥ /
yathā nāśena vā bhāvyaṃ tathodetyaśubhā matiḥ

māmavāntaranirmagnāṃ sūkṣmāṃ kīṭatanorapi /
uddhariṣyati ko nāma pāṃsurāśibhirāvṛtām

viviktamanasāṃ buddhau kva sphuranti hatāśayāḥ /
grāmamārgatṛṇānīva gireruparivāsinām

sthitāyā ajñatāmbhodhau kva mamābhyudayo bhavet /
andhasyodeti prākāśyaṃ nakhadyotānusevinaḥ

ataḥ kiyantaṃ no jāne kālamāvalitāpadam /
mayāpacchvabhragarteṣu luṭhitavyaṃ hatehayā

kadā syāmañjanamahāśailaputrakarūpiṇī /
dyāvāpṛthivyorvaidhurye stambhatāmanutiṣṭhata

meghamālāsamabhujā ciraṃ vidyutpadekṣaṇā /
nīhārajālavasanā proccakeśamitāmbarā

lambodarābhrasaṃdarśapranartitaśikhaṇḍinī /
lambalolastanī śyāmā dehavātadravatstanī

hāsabhasmacchaṭācchannasūryamaṇḍalarodhinī /
kṛtāntagrasanodyuktakṛtyaikākṛtidhāriṇī

kṛśānūlūkhaladṛśā sūryasragdāmahāriṇī /
parvatātparvate śṛṅge nyasya pādau vihāriṇī

kadā me syādguruśvabhrabhāsuraṃ tanmahodaram /
kadā me syāccharanmeghamedurā nakharāvalī

kadā me syānmahārakṣovidrāvaṇakaraṃ smitam /
svasphigvādyairaraṇyānyāṃ kadā nṛtyeyamunmadā

vasāsavamahākumbhairmṛtamāṃsāsthisaṃcayaiḥ /
kadā kariṣye'virataṃ medurodarapūraṇam

kadā pītamahālokarudhirā kṣībatāṃ gatā /
bhaveyaṃ muditā dṛptā mudritā nidrayā tataḥ

mayaiva kutapovahnau tadanyaṃ bhāsuraṃ vapuḥ /
bhasmatvaṃ kanakeneva sūcitvamurarīkṛtam

kva kilāñjanaśailābhaṃ vapurbharitadiktaṭam /
kva prācikākhurasamaṃ sūcitvaṃ tṛṇapelavam

tyajatyāśu mṛdityajñaḥ prāpyāpi kanakāṅgadam /
mayā sūcitvalobhena saṃtyaktaṃ bhāsuraṃ vapuḥ

hā mahodara vindhyādrisanīhāraguhopama /
adya nāntaṃ karoṣi tvaṃ kathaṃ siṃhena hastinām

hā bhujau bharanirbhagnaśikharau śaśabhṛnnakhaiḥ /
puroḍāśadhiyā candraṃ kathamadya na bādhataḥ

hā vakṣaḥ kācavaidhuryagirīndrataṭasundara /
nādya siṃhādi yaukaṃ taddhṛtaṃ romavanaṃ tathā

hā netre kṛṣṇarajanīrajaḥśuṣkendhanaijane /
kasmānna me bhūṣayato dṛgjvālāmālayā diśa

hā skandha bandho naṣṭo'si niṣiddho'si mahītale /
kālena vinipiṣṭo'si nighṛṣṭo'si śilātale

hā mukhendo tapasi kiṃ nādya tvaṃ mama raśmibhiḥ /
kalpāntadāvasaṃśāntacandrabimbamanohara

hā hā hastau mahākārau tāvadya kva gatau mama /
saṃpannāsmi mahāsūcirmakṣikākhuradolitā

hā bhagograkarañjāḍhyasatkandaśvabhraśobhana /
vindhyādvareṇyavipulanitambāmalabimbaka

kvākāro'mbarapūrakaḥ kva ca navaṃ tucchātmasūcīvapū /
rodorandhrasamaṃ kva vāsya kuharaṃ kvedaṃ ca sūcīmukham /
kva grāso bahumāṃsabhārabahulaḥ kvābbindunā bhojanaṃ
sūkṣmāsmyetadaho mayaiva racitaṃ svātmakṣaye nāṭakam
ityārṣe śrīvāsiṣṭhamahārāmāyaṇe mokṣopāye utpattiprakaraṇe ka० sūcikāparidevanaṃ nāmaikasaptatitamaḥ sargaḥ