Yoga Vasistha · Chapter 3.66

ṣaṭṣaṣṭitamaḥ sargaḥ

śrīvasiṣṭha uvāca /
evamekaṃ paraṃ vastu rāma nānātvametyalam /
nānātvamiva saṃjātaṃ dīpāddīpaśataṃ yathā

yathābhūtamasadrūpamātmānaṃ yadi paśyati /
vicāryate'ntastadanubhāvahīnaṃ na śocati

cittamātraṃ narastasmingate śāntamidaṃ jagat /
upānadgūḍhapādasya nanu carmāstṛtaiva bhūḥ

patramātrādṛte nānyatkadalyā vidyate yathā /
bhramamātrādṛte nānyajjagato vidyate tathā

jāyate bālatāmeti yauvanaṃ vārdhakaṃ tataḥ /
mṛtiṃ svargaṃ ca narakaṃ bhramācceto hi nṛtyati

vicitrabudbudollāse svātmano vyatirekiṇi /
yathā surāyāḥ sāmarthyaṃ tathā cittasya saṃsṛtau

yathā dvitvaṃ śaśāṅkādau paśyatyakṣimalāvilam /
ciccetanakalākrāntā tathaiva paramātmani

yathā madavaśādbhrāntānkṣībaḥ paśyati pādapān /
tathā cetanavikṣubdhānsaṃsārāṃścitprapaśyati

yathā līlābhramādbālāḥ kumbhakṛccakravajjagat /
bhrāntaṃ paśyanti cittāttu viddhi dṛśyaṃ tathaiva hi

yadā ciccetati dvitvaṃ tadā dvaitaikyavibhramaḥ /
yadā na cetati dvaitaṃ tadā dvaitaikyayoḥ kṣayaḥ

yaccetyate taditaradvyatiriktaṃ cito'sti na /
kiṃcinnāstītisaṃśāntyā citaḥ śāmyati cetanaṃ

ciddhanenaikatāmetya yadā tiṣṭhati niścalaḥ /
śāmyanvyavaharanvāpi tadā saṃśānta ucyate

tanvī cetayate cetyaṃ ghanā cinnāṅga cetati /
alpakṣībaḥ kṣobhameti ghanakṣībo hi śāmyati

ciddhanaikaprapātasya rūḍhasya parame pade /
nairātmyaśūnyavedyādyaiḥ paryāyaiḥ kathanaṃ bhavet

ciccetanena cetyatvametyevaṃ paśyati bhramam /
jāto jīvāmi paśyāmi saṃsarāmītyasanmayam

svabhāvādvyatiriktaṃ tu na cittasyāsti cetanam /
spandādṛte yathā vāyorantaḥ kiṃ nāma cetyate

cetyatvaṃ saṃbhavatyevaṃ kiṃcidyaccetyate citā /
rajjusarpabhramābhāsaṃ tamavidyābhramaṃ viduḥ

saṃvinmātracikitsye'sminvyādhau saṃsāranāmani /
cittamātraparispande saṃrambho na ca kiṃcana

yadi sarvaṃ parityajya tiṣṭhasyutkrāntavāsanaḥ /
amunaiva nimeṣeṇa tanmukto'si na saṃśayaḥ

yathā rajjvāṃ bhujaṅgābhā vinaśyatyeva vīkṣaṇāt /
saṃvinmātravivartena naśyatyeva hi saṃsṛtiḥ

yatrābhilāṣastannūnaṃ saṃtyajya sthīyate yadi /
prāpta evāṅga tanmokṣaḥ kimetāvati duṣkaram

api prāṇāṃstṛṇamiva jayantīha mahāśayāḥ /
yatrābhilāṣastanmātratyāge kṛpaṇatā katham

yatrābhilāṣastattyaktvā cetasā niravagraham /
prāptaṃ karmendriyairgṛhṇastyajannaṣṭaṃ ca tiṣṭha bhoḥ

yathā karatale bilvaṃ yathā vā parvataḥ puraḥ /
pratyakṣameva tasyālamajatvaṃ paramātmanaḥ

ātmaiva bhāti jagadityuditastaraṅgaiḥ
kalpānta eka iva vāridhiraprameyaḥ /
jñātaḥ sa eva hi dadāti vimokṣasiddhiṃ
tvajñāta eva manase cirabandhanāya

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne saṃsṛtiparamayogo nāma ṣaṭaṣaṣṭitamaḥ sargaḥ